ଭୁବନ, ୧୯।୭(ବିପିନ ବିହାରୀ ସେଠୀ): ସ୍ବାମୀ ଘରକୁ ଆଣିଲେ ଦ୍ୱିତୀୟ ସ୍ତ୍ରୀ। ଏହାକୁ ନେଇ ସୃଷ୍ଟି ହୋଇଥିଲା ଦାମ୍ପତ୍ୟ ଜୀବନରେ ଝଡ଼। କଜିଆ ଉଗ୍ରରୂପ ନେବା ପରେ ପ୍ରଥମ ସ୍ତ୍ରୀଙ୍କୁ ରାସ୍ତାରୁ ସବୁଦିନ ପାଇଁ ହଟାଇ ଦେଇଥିଲେ ସ୍ବାମୀ। ପ୍ରମାଣ ନଷ୍ଟ କରିବାକୁ ମୃତଦେହକୁ ପ୍ରାୟ ୧୫ କି.ମି. ଦୂର ଗାଡ଼ିରେ ଆଣି ଜଙ୍ଗଲରେ ଫିଙ୍ଗି ଦେଇଥିଲେ। ହେଲେ ପୋଲିସର ତନାଘନା ପରେ ସତ ପଦାକୁ ଆସିଛି ଏବଂ ଢେଙ୍କାନାଳ ଜିଲା ଭୁବନ ଥାନା ବାଲିବୋ ଗ୍ରାମ ନିକଟରୁ ଗତ ଶନିବାର ମହିଳାଙ୍କ ଗଳିତ ମୃତଦେହ ଜବତ ଘଟଣାର ରହସ୍ୟ ଉନ୍ମୋଚିତ ହୋଇଛି। ମୃତା ମହିଳା ହେଲେ ଯାଜପୁର ଜିଲା ସୁକିନ୍ଦା ଥାନା ଅନ୍ତର୍ଗତ ବିରିଗୁଡ଼ା ଗ୍ରାମରେ ରହୁଥିବା ଅନୁ ନାୟକ। ଏହି ଘଟଣାରେ ଅଭିଯୁକ୍ତ ସ୍ବାମୀ ଭୁବନ ଥାନା ଗରୁଡ଼ବନ୍ଦୀ ଗ୍ରାମର ସନ୍ତୋଷ ନାୟକ ଗିରଫ ହୋଇଥିବା ଥାନାଧିକାରୀ ସୌଭାଗ୍ୟ କୁମାର ସ୍ବାଇଁ କହିଛନ୍ତି।
ପୋଲିସ ସୂଚନା ଅନୁଯାୟୀ, ସୁକିନ୍ଦା ଥାନା ଜାମୁପଶି ଗ୍ରାମର ବାବୁଲି ପ୍ରଧାନଙ୍କ ଝିଅ ଅନୁ ଗରୁଡ଼ବନ୍ଦୀ ଗ୍ରାମରେ ପ୍ରଥମ ବିବାହ କରିଥିଲେ। ତେବେ ୪ ବର୍ଷ ତଳେ ଗ୍ରାମର ପଦ୍ମନାଭ ନାୟକଙ୍କ ପୁଅ ସନ୍ତୋଷଙ୍କ ସହ ପଳାଇ ଯାଇଥିଲେ। ଦୁହେଁ ବିରିଗୁଡ଼ା ଗ୍ରାମରେ ରହୁଥିଲେ। ସନ୍ତୋଷ ସେଠାକାର ରମେଶ ବେହେରାଙ୍କ ଗାଡ଼ି ଚଳାଉଥିଲେ। ୪ ମାସ ତଳେ ଝାଡ଼ଖଣ୍ଡର ଲଳିତା ନାମ୍ନୀ ଜଣେ ଯୁବତୀଙ୍କୁ ବିବାହ କରି ସନ୍ତୋଷ ଘରକୁ ଆଣିଥିଲେ। ଏହାକୁ ନେଇ ଅନୁ ଏବଂ ସନ୍ତୋଷଙ୍କ ଦାମ୍ପତ୍ୟ ଜୀବନରେ ଝଡ଼ ସୃଷ୍ଟି ହୋଇଥିଲା। ଗତ ୯ ତାରିଖ ରାତିରେ ଏହା ଉଗ୍ରରୂପ ନେଇଥିଲା। ଉତ୍ତ୍ୟକ୍ତ ସନ୍ତୋଷଙ୍କ ଆକ୍ରମଣରେ ଅନୁଙ୍କ ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା। ପ୍ରମାଣ ଲୁଚାଇବାକୁ ମୃତଦେହକୁ ସେ ଚଲାଉଥିବା ଗାଡ଼ିରେ ଆଣି ବାଲିବୋ ନିକଟର୍ତ୍ତୀ ଏକ ନାଳ ପାଖରେ ଫିଙ୍ଗିଦେଇଥିଲେ। ୧୫ ତାରିଖରେ ମହିଳାଙ୍କ ଗଳିତ ମୃତଦେହ ପୋଲିସ ଜବତ କରିଥିଲା। ଧରାପଡ଼ିଯିବା ଭୟରେ ସୁକିନ୍ଦା ଥାନାରେ ସନ୍ତୋଷ ସେହିଦିନ ଏକ ନିଖୋଜ ମାମଲା (ନଂ.୨୯/୨୩) ରୁଜୁ କରିଥିଲେ। ତେବେ ଘଟଣାସ୍ଥଳରୁ ଜବତ ଶାଢ଼ି, ସୁକିନ୍ଦା ଥାନାରେ ହୋଇଥିବା ନିଖୋଜ ମାମଲା ଏବଂ ଅନୁଙ୍କ ବାପା ବାବୁଲିଙ୍କଠାରୁ ମିଳିଥିବା ତଥ୍ୟରୁ ପୋଲିସ ସନ୍ତୋଷ ନିକଟରେ ପହଞ୍ଚତ୍ଥିଲା। ସେ ରାଜ୍ୟ ବାହାରକୁ ଚମ୍ପଟ ମାରିବାକୁ ଉଦ୍ୟମ କରୁଥିବାବେଳେ ପୋଲିସ ତାଙ୍କୁ ଗିରଫ କରିଥିଲା। ପଚରାଉଚରା ବେଳେ ସନ୍ତୋଷ ସ୍ତ୍ରୀଙ୍କୁ ହତ୍ୟା କରିଥିବା ସ୍ବୀକାର କରିଥିଲେ। ଏହା ପରେ ତାଙ୍କୁ ସୁକିନ୍ଦା ପୋଲିସକୁ ହସ୍ତାନ୍ତର କରାଯାଇଛି।
ପୂର୍ବରୁ ଏ ସଂକ୍ରାନ୍ତରେ ଭୁବନ ଥାନାରେ ନଂ.୧୦/୨୩ରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବାବେଳେ ବାବୁଲିଙ୍କ ଅଭିଯୋଗକ୍ରମେ ୧୭ ତାରିଖରେ ଏକ ହତ୍ୟା ମାମଲା (ନଂ.୧୬୮/୨୩)ରୁଜୁ ହୋଇଛି। ଅନୁଙ୍କ ଗଳିତ ମୃତଦେହ କଟକରେ ବ୍ୟବଚ୍ଛେଦ ପରେ ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟ ଶବାଗାରରେ ରଖାଯାଇଥିଲା। ଏହାକୁ ତାଙ୍କ ପରିବାରକୁ ହସ୍ତାନ୍ତର କରାଯାଇଛି।
