ଦାରିଙ୍ଗବାଡ଼ି,୬ା୭(ଅରୁଣ ସାହୁ): କନ୍ଧମାଳ ଜିଲାରେ ଗୁରୁବାର ବିଳମ୍ବିତ ରାତିରୁ ଲଗାଣବର୍ଷା ଜାରି ରହିଛି। ଫଳରେ ଅଞ୍ଚଳରେ ଏକ ପ୍ରକାର ଅଚଳାବସ୍ଥା ଦେଖାଯାଇଛି। ବର୍ଷା ପରଠାରୁ ବିଦ୍ୟୁତ୍ ବାରମ୍ବାର ଅଚଳ ହୋଇପଡ଼ିଥିବା ବେଳେ ଶନିବାରଠାରୁ ଦାରିଙ୍ଗବାଡ଼ି ବ୍ଲକର ଏକାଧିକ ଫିଡ଼ର ଅଚଳ ହୋଇପଡିଛି ଉକ୍ତ ବ୍ଲକର ଦାରିଙ୍ଗବାଡ଼ି ସମେତ ଶ୍ରାନିକେତା, ସିମନବାଡ଼ି, କିରିକୁଟି, ତିଲୋରୀ, ବୁଡ଼ାଗୁଡା, ଗୁମିକିଆ, କୋଟଗଡ଼ ବ୍ଲକ ପକାରୀ ଓ ବାଲିଗୁଡ଼ା ବ୍ଲକ ଋତୁଙ୍ଗିଆ ପର୍ଯ୍ୟନ୍ତ ଅନ୍ଧାରରେ ରହିଛନ୍ତି ଉପଭୋକ୍ତା। ଦାରିଙ୍ଗବାଡ଼ି ସବଷ୍ଟେଶନକୁ କ. ନୂଆଗାଁଠାରୁ ୩୩ କେଭି ବିଦ୍ୟୁତ୍ ସଂଯୋଗ ହୋଇଥିବା ବେଳେ ଦାରିଙ୍ଗବାଡ଼ିଠାରୁ ଦାସିଙ୍ଗବାଡ଼ି, ପର୍ତ୍ତମାହା, ସିମନବାଡ଼ି ଆଦିକୁ ୧୧ କେଭି ବଦ୍ୟୁତ୍ ସଂଯୋଗ ଯାଇଛି କିନ୍ତୁ ୩ ଦିନ ହେଲା ଲଘୁଚାପ ଜନିତ ବର୍ଷା ଯୋଗୁଁ ବିଦ୍ୟୁତ୍ ଠପ୍ ହୋଇଯାଇଛି। ସେହିପରି ବିଦ୍ୟୁତ୍ ଅଚଳର କିଛି ସମୟ ମଧ୍ୟରେ ସିମନବାଡ଼ିର ବିଏସ୍ଏନ୍ଏଲ ଓ ଜିଓ ନେଟ୍ଓ୍ବର୍କ ଫେଲ୍ ହୋଇଯାଇଛି। ସିମନବାଡ଼ି ମୋବାଇଲ ଟାଓ୍ବାରରେ ୨ଟି ଯାକ ନେଟଓ୍ବର୍କ ରହିଥିବା ବେଳେ ଦୀର୍ଘ୍ବର୍ଷ ଧରି ଜେନେନେଟର ଅଚଳ ଯୋଗୁ ବିଦ୍ୟୁତ୍ କାଟ୍ ହେବାର କିଛି ସମୟ ମଧ୍ୟରେ ମୋବାଇଲ, ଇଣ୍ଟରନେଟ୍ ସେବା ସମ୍ପୂର୍ଣ୍ଣ ଅଚଳ ହୋଇପଡୁଛି। ଏନେଇ ଜିଲା ପ୍ରଶାସନ ନିକଟରେ ବାରମ୍ବାର ଅଭିଯୋଗ ହୋଇଥିଲେ ମଧ୍ୟ କେବଳ ପ୍ରତିଶ୍ରୁତି ମିଳୁଛି କିନ୍ତୁ ଏହାର ସମାଧାନ ହେଉ ନ ଥିବା ସିମନବାଡ଼ିର ଅଭିଯୋଗକାରୀ ଅମରେନ୍ଦ୍ର ପ୍ରଧାନ କହିଛନ୍ତି। ସେହିପରି କିରିକୁଟି, ବୁଡ଼ାଗୁଡା ଅଞ୍ଚଳରେ ମଧ୍ୟ ବିଏସ୍ଏନ୍ଏଲ ସେବା ବିଦ୍ୟୁତ୍ କାଟ୍ ଯୋଗୁ ଅଚଳ ହୋଇପଡ଼ିଛି। ବିଦ୍ୟୁତ୍ ଏବଂ ମୋବାଇଲ ସେବା ଅଚଳ ଯୋଗୁ ଜରୁରୀକାଳିନ ସେବା ବିଶେଷ କରି ଆମ୍ବୁଲାନ୍ସକୁ ଯୋଗାଯୋଗ ସମ୍ଭବ ହେଉ ନ ଥିବା ଯୋଗୁ ରୋଗୀମାନେ ବହୁ ହଇରାଣ ଭୋଗୁଛନ୍ତି। ସେହିପରି ଜନସେବା କେନ୍ଦ୍ର, ବ୍ୟାଙ୍କ ପ୍ରତିଷ୍ଠାନ, ଥାନା, ବ୍ଲକ କାର୍ଯ୍ୟାଳୟ ତହସିଲ କାର୍ଯ୍ୟାଳୟ, ଓ ଅନ୍ୟାନ୍ୟ କାର୍ଯ୍ୟାଳୟ ସମେତ ବେସରକାରୀ ସଂସ୍ଥାଗୁଡ଼ିକରେ ଅଚଳାବସ୍ଥା ସୃଷ୍ଟି ହୋଇଛି। ଏନେଇ ଦାରିଙ୍ଗବାଡ଼ ବିଦ୍ୟୁତ ବିଭାଗ ସହକାରୀ ଯନ୍ତ୍ରୀ ଶିବ ପ୍ରସାଦ ନାୟକ କହିଛନ୍ତି ଯେ, ଫିରିଙ୍ଗିଆରୁ କ. ନୂଆଗାଁ ଏବଂ ଜି. ଉଦୟଗିରିରୁ କ. ନୂଆଗାଁକୁ ବିଦ୍ୟୁତ୍ ସଂଯୋଗ ବିଛିନ୍ନ ହୋଇଛି। ସେ ୨ଟି ବିଦ୍ୟୁତ ସଂଯୋଗରୁ ଗୋଟିଏ ବି ଷ୍ଟାଣ୍ଡ ହୋଇଗଲେ ଦାରିଙ୍ଗବାଡ଼ି ସ୍ବାଭାବିକ ହୋଇପାରେ ବୋଲି ପ୍ରତିକ୍ରିୟା ରଖିଛନ୍ତି।
ସିମନବାଡ଼ିରେ ନେଟଓ୍ବର୍କ ନ ଥିବା ସମ୍ପର୍କରେ କନ୍ଧମାଳ ଜିଲାପାଳ ବେଦଭୂଷଣ କହିଛନ୍ତି, ସେ ତୁରନ୍ତ ସେ ବିଏସ୍ଏନ୍ଏଲକୁ ନିର୍ଦ୍ଦେଶ ଦେବେ ସିମନବାଡ଼ିର ଉଭୟ ନେଟ୍ଓ୍ବର୍କ ସ୍ବାଭାବିକ କରିବା ପାଇଁ। ସେହିପରି ଗୋଟିଏ ମାସ ଧରି ବନ୍ଦ ରହିଥିବା ଏସ୍ବିଆଇର ଏଟିଏମ୍କୁ ମଧ୍ୟ ମରାମତି କରାଯାଇ ସ୍ବାଭାବିକ ପାଇଁ ପଦକ୍ଷେପ ନିଆଯିବ ବୋଲି ଜିଲାପାଳ କହିଛନ୍ତି।
