ଫୁଲବାଣୀ ଅଫିସ,୨।୮: କନ୍ଧମାଳ ଜିଲା ଫୁଲବାଣୀ ସହର ପଟାବାଲି ସାହିରେ ଜଣେ ବ୍ୟବସାୟୀଙ୍କ ଘରୁ ଲକ୍ଷାଧିକ ଟଙ୍କାର ସୁନା ଗହଣା ଏବଂ ଟଙ୍କା ଲୁଟ୍ ହୋଇଛି । ୩ଜଣ ଦୁର୍ବୃତ୍ତ ଘରେ ପଶି ବନ୍ଧୁକ ଦେଖାଇ ଲୁଟ୍ କରିଥିବା ବ୍ୟବସାୟୀ ଜଣକ ଟାଉନ ଥାନାରେ ସୋମବାର ଅଭିଯୋଗ କରିଛନ୍ତି।
ଅଭିଯୋଗ ମୁତାବକ, ବ୍ୟବସାୟୀ ପ୍ରଶାନ୍ତ କୁମାର ପ୍ରାଣୀଗ୍ରାହୀଙ୍କ ପୁଅ ବୋହୁ ରବିବାର ବ୍ରହ୍ମପୁରକୁ ଯାଇଥିଲେ ା ପ୍ରଶାନ୍ତ ଘରେ ଏକା ଥିଲେ । ରବିବାର ରାତି ପ୍ରାୟ ୧୧ଟାରେ ୩ ଦୁର୍ବୃତ୍ତ ଘରେ ପଶି ବନ୍ଧୁକ ଦେଖାଇ ଟଙ୍କା, ସୁନା ଅଳଙ୍କାର କେଉଁଠି ଅଛି ପଚାରିଥିଲେ। ପ୍ରଶାନ୍ତ ଭୟରେ ଆଲମାରିରେ ଥିବା କହିଥିଲେ। ପରେ ଦୁବୃର୍ତ୍ତମାନେ ଲକ୍ ଭାଙ୍ଗି ନଗଦ ଟଙ୍କା ସହ ସୁନା ଅଳଙ୍କାର ଲୁଟି ନେଇଥିଲେ। ପ୍ରଶାନ୍ତଙ୍କଠାରୁ ଖବରପାଇ ସଦର ଏସଡିପିଓ ମହେନ୍ଦ୍ର ନାଥ ମୁର୍ମୁ, ଥାନା ଅଧିକାରୀ ସୁଶାନ୍ତ କୁମାର ସେଠୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ।
