ରାଞ୍ଚି,୨୮।୧: ଭାରତୀୟ କ୍ରିକେଟ ଟିମ୍ ରାଞ୍ଚିରେ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟି୨୦ ମୁକାବିଲାରେ ପରାଜିତ ହୋଇଥିଲା। ଟସ୍ ହାରି ପ୍ରଥମେ ବ୍ୟାଟିଂ ନିମନ୍ତ୍ରଣ ପାଇଥିବା ନ୍ୟୁଜିଲାଣ୍ଡ ୨୦ ଓଭରରେ ୧୭୬ ରନ୍ କରିଥିଲା। ଜବାବରେ ଭାରତ ୨୦ ଓଭରରେ ୯ ଉଇକେଟ ହରାଇ ୧୫୫ ରନ୍ କରିବାରେ ସଫଳ ହୋଇଥିଲା।
ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପରାଜୟ ପରେ କହିଥିଲେ, ପିଚ୍ ଏଭଳି ଆଚରଣ କରିବ ବୋଲି କେହି ଭାବି ନ ଥିଲେ।ଉଭୟ ଟିମ୍ ଏଥିରେ ଆଶ୍ଚର୍ଯ୍ୟ ହୋଇଥିଲେ। ହେଲେ ନ୍ୟୁଜିଲାଣ୍ଡ ଆମ ଅପେକ୍ଷା ଭଲ ପ୍ରଦର୍ଶନ କରିଛି। ପୁରୁଣା ବଲ୍ ଅପେକ୍ଷା ନୂଆ ବଲ୍ ଅଧିକ ସ୍ପିନ ହେଉଥିଲା। ଏହାସତ୍ତ୍ୱେ ସୂର୍ଯ୍ୟକୁମାର ଏବଂ ମୁଁ ଖେଳିବା ସମୟରେ ଆମେ ପ୍ରତ୍ୟାବର୍ତ୍ତନ କରିବୁ ବୋଲି ଭାବୁଥିଲୁ। ହେଲେ ତାହା ହେଲା ନାହିଁ।
ଏହାଛଡ଼ା ୧୭୬ ରନ୍ ସ୍କୋରକୁ ଅଧିକ ବୋଲି କହି ହାର୍ଦ୍ଦିକ କହିଛନ୍ତି, ଆମେ ବୋଲିଂ ସମୟରେ ୨୫ ରନ୍ ଅଧିକ ଦେଇଦେଇଥିଲୁ। ଓ୍ବାଶିଂଟନ ସୁନ୍ଦର ଯେଉଁଭଳି ବୋଲିଂ, ବ୍ୟାଟିଂ ଏବଂ ଫିଲ୍ଡିଂ କଲେ, ତାକୁ ଦେଖି ଲାଗୁଥିଲା ଯେ ଏହି ମ୍ୟାଚ୍ ଭାରତ ବନାମ ନ୍ୟୁଜିଲାଣ୍ଡରୁ ଅଧିକ ଓ୍ବାଶିଂଟନ ବନାମ ନ୍ୟୁଜିଲାଣ୍ଡ ହୋଇଯାଇଥିଲା। ଯଦି ସେ ଏବଂ ଅକ୍ଷର ପଟେଲ ଏଭଳି ପ୍ରଦର୍ଶନ ଜାରି ରଖିବେ ତେବେ ଏହା ଭାରତୀୟ କ୍ରିକେଟ ଟିମ୍ ପାଇଁ ଆଗକୁ ଶୁଭଙ୍କର ହେବ ବୋଲି ସେ କହିଛନ୍ତି।
