ଦିଗପହଣ୍ଡି,୩|୭(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଥାନା ଶୁଣ୍ଡିପଲ୍ଲୀ ଗ୍ରାମର ବର୍ଷା ସିଂ(୨୦)ଙ୍କୁ ଯୌତୁକ ପାଇଁ ଶ୍ବଶୁର ଘର ଲୋକେ ଶାରୀରିକ ଓ ମାନସିକ ନିର୍ଯ୍ୟାତନା ପରେ ହତ୍ୟା ଉଦ୍ୟମ କରାଯାଇଥିବା ଅଭିଯୋଗ ହୋଇଛି। ବର୍ଷା ଏ ନେଇ ଦିଗପହଣ୍ଡି ଥାନାରେ ଏତଲା ଦେବା ପରେ ଆଇଆଇସି କିଶୋର କୁମାର ସାମଲ ମାମଲା ନଂ.୨୭୦/୨୬ ଭାରତୀୟ ନ୍ୟାୟ ସଂହିତା ର ଦଫା – ୮୫/୧୧୫(୨)/୩୨୯(୪)/୨୯୬/୧୦୯/୩୫୧(୨)/୩(୫) ଏବଂ ଯୌତୁକ ନିରୋଧ ଆଇନର ଧାରା -୪ ଅନୁଯାୟୀ ଅଭିଯୁକ୍ତ ସ୍ବାମୀ ଆକାଶ ସିଂ, ଶାଶୁ ଜ୍ୟୋସ୍ନା ରାଣୀ ସିଂ,ନଣନ୍ଦ ରାଜଶ୍ରୀ ସିଂ,ଦେଢ଼ ଶାଶୁ ଜୟଶ୍ରୀ ସିଂଙ୍କ ବିରୋଧରେ ମକଦ୍ଦମା ରୁଜୁ କରି ଏଏସଆଇ ଦିଲ୍ଲୀପ କୁମାର ଗରଡ଼ଙ୍କୁ ନିର୍ଦ୍ଦେଶ ଦେଇଥିଲେ। ତଦନ୍ତକାରୀ ଅଧିକାରୀ ଶୁକ୍ରବାର ବର୍ଷାଙ୍କ ସ୍ବାମୀ ଗଜପତି ଜିଲା ମୋହନା ଥାନା ଲିଲିଗଡ଼ ଗ୍ରାମର ଗ୍ରୋସରି ଦୋକାନୀ ଆକାଶ ସିଂ(୩୩)ଙ୍କୁ ଗିରଫ କରି ସନ୍ଧ୍ୟାରେ କୋର୍ଟ ଚାଲାଣ କରିଛନ୍ତି। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ଗତ ୨୦୨୩ ଜୁଲାଇ ୧୨ ତାରିଖରେ ବର୍ଷା ଗଜପତି ଜିଲା ମୋହନା ଥାନା ଲିଲିଗଡ଼ ଗ୍ରାମର ମୃତ୍ୟୁଞ୍ଜୟ ସିଂଙ୍କ ପୁଅ ଆକାଶ ଙ୍କୁ ବିବାହ କରିଥିଲେ। ବିବାହ ସମୟରେ ସ୍ବାମୀ ଓ ଶ୍ବଶୁର ଘର ଲୋକଙ୍କ ଦାବି ପ୍ରକାରେ ସମସ୍ତ ଯୌତୁକ ସାମଗ୍ରୀ ଘର କରଣା ଆସବାବ ପତ୍ର ଦିଆଯାଇଥିଲା। ବାହାଘରର ପ୍ରାୟ ୫ ମାସ ହସଖୁସିରେ କଟି ପରେ ଅଧିକା ଯୌତୁକ ପାଇଁ ତାଙ୍କୁ ସ୍ବାମୀ ଓ ଶ୍ବଶୁର ଘର ଲୋକେ ମାନସିକ ଓ ଶାରୀରିକ ନିର୍ଯ୍ୟାତନା ଦେଇଥିଲେ। ସବୁ ନିର୍ଯ୍ୟାତନା ସହ୍ୟ କରି ବର୍ଷା ଶାଶୁଘରେ ରହିଥିଲେ। ବାହାଘରର ପ୍ରାୟ ୧ ବର୍ଷ ପରେ ଉଭୟଙ୍କ ଔରସରୁ ଏକ କନ୍ୟା ସନ୍ତାନ ଜନ୍ମ ହୋଇଥିଲା। କନ୍ୟା ସନ୍ତାନ ଜନ୍ମ ହେବା ପରେ ସ୍ବାମୀ ଓ ଶ୍ବଶୁର ଘର ଲୋକେ ତାଙ୍କୁ ଯୌତୁକ ପାଇଁ ଅଧିକା ନିର୍ଯ୍ୟାତନା ଦେବା କାରଣରୁ ସେ ଶୁଣ୍ଡିପଲ୍ଲୀ ବାପଘରକୁ ଚାଲି ଆସିଥିଲେ। ଗତ ରବିବାର ସକାଳ ପ୍ରାୟ ୧୦ ଟାରେ ବର୍ଷାଙ୍କ ସ୍ବାମୀ ଶାଶୁ,ନଣନ୍ଦ,ଦେଢ଼ଶାଶୁ ଶୁଣ୍ଡିପଲ୍ଲୀ ସ୍ଥିତ ତାଙ୍କ ବାପ ଘରକୁ ଆସି ତାଙ୍କୁ ବିଭିନ୍ନ ପ୍ରକାର ଆପତ୍ତିଜନକ ଭାଷାରେ ଗାଳି କରିଥିଲେ। ସେ ପ୍ରତିବାଦ କରିବାରୁ ନଣନ୍ଦ ତାଙ୍କ ଡାହାଣ ହାତକୁ ମୋଡ଼ି ଦେଲେ।ସ୍ବାମୀ ତାଙ୍କ ଚୁଟି ଧରି ଘୋଷାଡି ତଳେ ପକାଇ ଦେଲେ। ଶାଶୁ ଓ ଦେଢ଼ଶାଶୁ ତାଙ୍କ ପିଠି, ଛାତି ଓ ପେଟକୁ ଲାତ ଗୋଇଠା ମାରିବା ସହ ବାମ ହାତକୁ ଚପଲରେ ମାରିବାରୁ ସେ ଆହାତ ହୋଇଥିଲେ। ପରେ ସ୍ବାମୀ ତାଙ୍କ ମୁହଁ ରେ ତକିଆ ଚାପି ଶ୍ୱାସରୁଦ୍ଧ କରି ତାଙ୍କୁ ହତ୍ୟା ଉଦ୍ୟମ କରିଥିଲେ ବୋଲି ଏତଲାରେ ଉଲ୍ଲେଖ ରହିଛି।
