ମହାକାଳପଡ଼ା,୧୧।୬ (ଡି.ଏନ.ଏ.): ଦାରିଦ୍ର୍ୟ ଜୀବନକୁ ବାଟବଣା କରେ। ପେଟ ଚାଖଣ୍ଡକ ପାଇଁ ଥାଳ ଧରି ଡହଡହ ଟାଣ ଖରାରେ ବାରଦୁଆର ବୁଲି ଭାତ ମୁଠେ ପାଇଁ ସଂଗ୍ରାମ କରୁଥିବା କୁନି ପିଲାଟିର ମୁହଁରୁ ସ୍ପଷ୍ଟ ବାରି ହୋଇପଡ଼ୁଥାଏ କ୍ଷୁଧା। ସମୟ ପାଖାପାଖି ମଧ୍ୟାହ୍ନ ଯେତେବେଳେ ଅସହ୍ୟ ଗ୍ରୀଷ୍ମ ପ୍ରବାହ ଜନଜୀବନ ଅସ୍ତବ୍ୟସ୍ତ କରି ବିଶ୍ରାମ ଖୋଜୁଥାଏ ଠିକ୍ ସେତିକି ବେଳେ ନିଜର ବାପା ସହ କବାଟ ପାଖରେ ଡାକ ଦିଏ ବାବୁ ଆମକୁ କିଛି ଦିଅ। ଏହି କୁନିପିଲାର ଡାକ ଶୁଣି ଯିଏ ଯାହା ଯଥା, ଭାତ ତରକାରିଠୁ ଆରମ୍ଭକରି ଚାଉଳ, ଟଙ୍କା ପଇସା ପର୍ଯ୍ୟନ୍ତ ଦେଇଥାନ୍ତି। ଯାହା ମିଳିଥାଏ ତାକୁ ଖାଇ ଟିକେ ବିଶ୍ରାମ ନେଇ ପୁଣି ଅପରାହ୍ନରେ ଘରକୁ ଘର ବୁଲିବାକୁ ପଡ଼େ। ରାତି ହେଲେ ଗଁା ବିଦ୍ୟାଳୟ ବାରଣ୍ଡା, ବାତ୍ୟା ଆଶ୍ରୟସ୍ଥଳ ପିଣ୍ଡାରେ ରାତ୍ରିଯାପନ କରିଥାନ୍ତି। ଯେଉଁ ବୟସରେ କୁନି ପିଲାଟି କାନ୍ଧରେ ବସ୍ତାନି ପକାଇ ବିଦ୍ୟାଳୟ ଯିବା କଥା, ସେହି ବୟସରେ ପେଟର ଭୋକ ପାଇଁ ହାତରେ ଥାଳ ଧରି ବାରଦୁଆର ବୁଲୁଥିବା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ଗଁାରେ। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ସର୍ବଶିକ୍ଷା ଅଭିଯାନରେ ସଭିଁଏ ପଢ଼ିବେ ସଭିଁଏ ବଢ଼ିବେ ନାରା ସତେଯେମିତି ଉପାନ୍ତ ଅଞ୍ଚଳରେ ହୋଇଛି ବାଟବଣା। ବିଦ୍ୟାଳୟଗୁଡ଼ିକରେ ମାଗଣାରେ ନାମଲେଖାଠାରୁ ଆରମ୍ଭକରି ମଧ୍ୟାହ୍ନଭୋଜନ ଯୋଗାଣ, ପୋଷାକ, ପୁସ୍ତକ, ସାଇକେଲ, ଷ୍ଟାଇପେଣ୍ଡ, ଭିଟାମିନ ଔଷଧ ଆଦି ମାଗଣାରେ ଯୋଗାଇ ଦିଆଯାଉଛ। ଏସବୁ ସତ୍ତ୍ୱେ ମଧ୍ୟ ପିଲାମାନେ ବିଦ୍ୟାଳୟ ପ୍ରତି ବିମୁଖ ହେଉଛନ୍ତି ତାହା ବୁଦ୍ଧିଜୀବୀ ମହଲରେ ଦୁଃଖ ପ୍ରକାଶ ପାଇଛି। ଶିକ୍ଷା ବିଭାଗର କେଉଁଠି ରହୁଛି ତ୍ରୁଟି, ସଚେତନତା ଅଭାବ ପାଇଁ ଏଭଳି ଅନେକ ପିଲା ଦାରିଦ୍ର୍ୟ ବାଧକ ଯୋଗୁ ମା’ବାପାଙ୍କ ସହିତ ଇଟାଭାଟିରେ କାମ କରୁଥିବା ବେଳେ ଆଉ କିଏ ପର ଘରେ ଘୁଷୁରି ଚରାଇବା, କିଏ କଙ୍କଡ଼ା ମାଛ ଧରିବାରେ ଶୈଶବ କାଟୁଛନ୍ତି। ପିଢ଼ି ପରେ ପିଢ଼ି ମା’ବାପାଙ୍କ କାର୍ଯ୍ୟକୁ ଅନୁସରଣ କରି ନିଜର ସନ୍ତାନମାନେ ସେହି ପ୍ରଥାକୁ ଆପଣେଇ ନେଉଛନ୍ତି ବୋଲି ଦେଖିବାକୁ ମିଳୁଛି। ତେବେ ଏଠାରେ ପ୍ରଶ୍ନ ଉଠେ ଏମାନଙ୍କୁ ମୁଖ୍ୟସ୍ରୋତକୁ ଆଣିବାକୁ ହେଲେ ସରକାରଙ୍କ ଜନ କଲ୍ୟାଣ ଯୋଜନାଗୁଡ଼ିକରେ ସାମିଲ କରାଗଲେ ଅନ୍ତତଃ ପକ୍ଷେ ସାର୍ବଜନିନ ଶିକ୍ଷାରୁ ବଞ୍ଚତ୍ତ ହେବେ ନାହିଁ। ଏହି ଶିଶୁମାନଙ୍କୁ ଚିହ୍ନଟ କରି ଶିକ୍ଷାବର୍ଷ ଆରମ୍ଭରୁ ଜିଲା ଶିକ୍ଷା ବିଭାଗ ଏମାନଙ୍କ ଥଇଥାନ ପାଇଁ ସରକାରୀ ସ୍ତରରେ ଉଦ୍ୟମ କରିବା ଆବଶ୍ୟକ ବୋଲି ସାମାଜିକ କର୍ମୀ ସୁବାସ ସ୍ବାଇଁ କହିଛନ୍ତି। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ତନ୍ମୟ କୁମାର ବେହେରାଙ୍କୁ ପଚାରିବାରେ ଏହି ଶିଶୁମାନଙ୍କ ଶିକ୍ଷା ପାଇଁ ସ୍ବତନ୍ତ୍ର ଅନୁସନ୍ଧାନ କରାଯାଇ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
