ଜଗତ୍ସିଂହପୁର ଅଫିସ,୧୧।୬: ଚଳିତ ମାସରୁ ମଧୁବାବୁ ପେନ୍ସନ୍ ଯୋଜନାର ହିତାଧିକାରୀଙ୍କୁ ନଗଦ ଟଙ୍କା ଆକାରରେ ପେନସନ୍ ଦିଆଯିବ। ୮୦ ବର୍ଷରୁ ଅଧିକ ବୟସର ବୃଦ୍ଧା, ବୃଦ୍ଧ, ଭିନ୍ନକ୍ଷମ ଓ ଶଯ୍ୟାଶାୟୀ ହିତାଧିକାରୀଙ୍କୁ କର୍ମଚାରୀମାନେ ସେମାନଙ୍କ ଘରେ ଭତ୍ତା ରାଶି ପ୍ରଦାନ କରିବେ। ଜାତୀୟ ସାମାଜିକ ସୁରକ୍ଷା ଯୋଜନାରେ ମଧ୍ୟ ୮୦ ବର୍ଷରୁ ଅଧିକ ବୟସର ଭିନ୍ନକ୍ଷମ ଓ ଶଯ୍ୟାଶାୟୀ ହିତାଧିକାରୀଙ୍କୁ ବ୍ୟାଙ୍କ ପ୍ରତିନିଧିମାନେ ସେମାନଙ୍କ ଘରେ ପହଞ୍ଚତ୍ ଭତ୍ତା ରାଶି ଦେବେ। ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ବ୍ୟାଙ୍କ ସମୂହ ଜିଲା ପରାମର୍ଶଦାତା କମିଟି ଓ ଜିଲାସ୍ତରୀୟ ସମୀକ୍ଷା କମିଟି ବୈଠକରେ ଜିଲାପାଳ ପାରୁଲ ପଟୁଓ୍ବାରି ଉପସ୍ଥିତ ଅଧିକାରୀ ଓ କର୍ମଚାରୀଙ୍କୁ ଏହି ପରାମର୍ଶ ଦେଇଛନ୍ତି। ସେ ଏ କଥା ମଧ୍ୟ କହିଥିଲେ, ଯେଉଁମାନେ ଋଣ କରିଛନ୍ତି ସେମାନଙ୍କଠାରୁ ବିଭିନ୍ନ ସରକାରୀ ଯୋଜନାରେ ଦିଆଯାଉଥିବା ଭତ୍ତା ରାଶିରୁ କଟାଯାଇପାରିବ ନାହିଁ। ବ୍ୟାଙ୍କର୍ସମାନେ ଏଥିପ୍ରତି ଧ୍ୟାନ ଦେବେ। ଯେଉଁ ହିତାଧିକାରୀଙ୍କର ଏକାଧିକ ବ୍ୟାଙ୍କ ଆକାଉଣ୍ଟ ରହିଛି, ସେମାନେ ବ୍ଲକସ୍ତରର ମୋ ସେବାକେନ୍ଦ୍ରରେ ଆଧାର ଲିଙ୍କ୍ କରି ପ୍ରାଥମିକ ଆକାଉଣ୍ଟ ସଂଶୋଧନ କରିପାରିବେ। ବଡ଼କଥା ହେଲା, ମୋ ଘର ଯୋଜନା ହେଉଛି ରାଜ୍ୟ ସରକାରଙ୍କ ଫ୍ଲାଗ୍ଶିପ୍ ପ୍ରୋଗ୍ରାମ। ଏହି ଯୋଜନାରେ ହିତାଧିକାରୀଙ୍କୁ ଗୃହଋଣ ପ୍ରଦାନ କରିବାରେ ବ୍ୟାଙ୍କର୍ସମାନେ ତ୍ୱରିତ ପଦକ୍ଷେପ ଗ୍ରହଣ କରିବା ଜରୁରୀ ବୋଲି ଜିଲାପାଳ ପରାମର୍ଶ ଦେଇଥିଲେ। ଅଗ୍ରିମ ବ୍ୟାଙ୍କ ପରିଚାଳକ, ନାବାର୍ଡ ଡିଡିଏମ୍ ନିଜ ସ୍ତରରେ ବିଭାଗୀୟ କ୍ଷେତ୍ର ଅଧିକାରୀଙ୍କୁ ନେଇ ପ୍ରସ୍ତୁତି ବୈଠକ କରିବେ। ଏଥିରେ ବ୍ୟାଙ୍କସ୍ତରରେ ବିଚାରାଧୀନ ଥିବା ଅର୍ଥାତ୍ ଅନୁମୋଦିତ ହୋଇ ନ ଥିବା ଋଣ ରାଶିର ସଂଶୋଧନ କରାଯାଇପାରିବ। ଆବଶ୍ୟକ ପଡ଼ିଲେ ପୁନର୍ବାର ଆବେଦନ କରାଯାଇପାରିବ। କ୍ଷେତ୍ରୀୟ ଅଧିକାରୀମାନେ ବ୍ୟାଙ୍କ ଅଧିକାରୀଙ୍କ ସହ ସମ୍ପର୍କ ରଖି ଋଣ ସ୍ଥିତି ସମ୍ପର୍କରେ ଅବଗତ ହେବା ଆବଶ୍ୟକ ବୋଲି ଜିଲାପାଳ କହିଥିଲେ। ବୈଠକରେ ଅନ୍ୟମାନଙ୍କ ମଧ୍ୟରେ ଜିଲା ପରିଷଦ ସଭାପତି ମନୋଜ କୁମାର ଭୋଇ ଯୋଗ ଦେଇଥିଲେ। ଏହି ଅବସରରେ ପୂର୍ବ ବୈଠକର ବିବରଣୀ ଦୃଢ଼ୀକରଣ କରାଯାଇଥିଲା। ଜିଲାରେ ମାର୍ଚ୍ଚ ୨୦୨୩ ସୁଦ୍ଧା କ୍ରେଡିଟ୍-ଡେବିଟ୍ ଅନୁପାତ ୪୯:୭୮ ପ୍ରତିଶତକୁ ବୃଦ୍ଧି ପାଇଛି । ମାର୍ଚ୍ଚ ସୁଦ୍ଧା ଆନୁଆଲ କ୍ରେଡିଟ୍ ପ୍ଲାନ୍ ୧୦୩:୩୧ ପ୍ରତିଶତ ହୋଇଥିବା ଅଗ୍ରଣୀ ବ୍ୟାଙ୍କ ପରିଚାଳକ ଚିନାରା ବାପୁଜୀ ସୁବୁଦ୍ଧି ପ୍ରକାଶ କରିଥିଲେ। ବୈଠକରେ କୃଷି ଟର୍ମ ଲୋନ୍, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ, ଖଦି ଓ ଗ୍ରାମ ଶିଳ୍ପ, ମହିଳା ଏସ୍ଏଚ୍ଜି ବ୍ୟାଙ୍କ ଲିଙ୍କେଜ, ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା, ପିଏମ୍ଇଜିପି, ପିଏମ୍ଏଫ୍ଏମ୍ଇ, ଶିଳ୍ପୀ ଉନ୍ନତି ଯୋଜନା, ଷ୍ଟାଣ୍ଡ ଅଫ୍ ଇଣ୍ଡିଆ, ବଳରାମ, ଜାତୀୟ ସହରାଞ୍ଚଳ ଜୀବିକା ମିଶନ, ଫାଇନାନ୍ସିଆଲ ଲିଟେରାସି କ୍ୟାମ୍ପ, ପ୍ରଧାନମନ୍ତ୍ରୀ ସ୍ବନିଧି ଯୋଜନା, ଉଦ୍ୟାନ କୃଷି, ମତ୍ସ୍ୟ ଚାଷ, କୁକୁଡ଼ା ଚାଷ, ଦୁଗ୍ଧ ଉତ୍ପାଦନ ଆଦି ସମ୍ପର୍କରେ ଆଲୋଚନା ହୋଇଥିଲା। ଏଥିରେ ରିଜର୍ଭ ବ୍ୟାଙ୍କ ପ୍ରତିନିଧିଭାବେ ମୋହିତ ଅଗ୍ରୱାଲ, ଷ୍ଟେଟବ୍ୟାଙ୍କ ଆଞ୍ଚଳିକ ପରିଚାଳକ ଦେବାଶିଷ ରଥ, ଡିଡିଏମ୍ ନାବାର୍ଡ ବିଶ୍ୱଭୂଷଣ ମହାନ୍ତି, ମଦର୍ସ ସିଏଫ୍ଏଲ୍ ମୁଖ୍ୟ ପ୍ରମୋଦ କୁମାର ଦାସ, ବିଭିନ୍ନ ବ୍ୟାଙ୍କ ଶାଖା ପରିଚାଳକ, ଜିଲା ମୁଖ୍ୟ କୃଷି ଅଧିକାରୀ, ଜିଲା ଶିଳ୍ପକେନ୍ଦ୍ର ସାଧାରଣ ପରିଚାଳକ, ଡିପିସି, ମିଶନ ଶକ୍ତି ଓ ଜିଲାସ୍ତରୀୟ ଅଧିକାରୀ ପ୍ରମୁଖ ଅଂଶଗ୍ରହଣ କରିଥିଲେ।
