ମୁଗେଲୋ, ୧୪ା୯ (ଇଟାଲି): ରବିବାର ଅନୁଷ୍ଠିତ ପ୍ରଥମ ଟସ୍କାନ ଫର୍ମୁଲା ଓ୍ବାନ୍ ଗ୍ରାଁ ପ୍ରି ମୋଟର ରେସ୍ରେ ବିଶ୍ୱ ଚାମ୍ପିୟନ ଲୁଇସ୍ ହାମିଲଟନ ତାଙ୍କ ମର୍ସିଡିଜ୍ ଟିମ୍ମେଟ୍ ଭାଲ୍ଟେରି ବୋଟାସଙ୍କ ପଛରେ ପକାଇ ଟାଇଟଲ ବିଜୟୀ ହୋଇଛନ୍ତି। ଏହା ହେଉଛି ତାଙ୍କର ୯୦ ତମ ଗ୍ରାଁ ପ୍ରି ବିଜୟ। ଆଉ ଏକ ବିଜୟ ଦ୍ୱାରା ସେ ମାଇକେଲ ସୁମାକର (୯୧)ଙ୍କ ରେକର୍ଡ ସମକକ୍ଷ ହୋଇ ପାରିବେ। ଆସନ୍ତା ରବିବାର ରୁଷିଆର ସୋଚିଠାରେ ପରବର୍ତ୍ତୀ ରେସ୍ ହେବ। ହାମିଲଟନଙ୍କ ପାଇଁ ଏଥିରେ ସୁଯୋଗ ରହିଛି। ରେଡ୍ବୁଲ୍ର ଆଲେକ୍ସ ଆଲ୍ବନ ତୃତୀୟ ସ୍ଥାନ ସହ ପ୍ରଥମ ଥର ଫର୍ମୁଲା ଓ୍ବାନ ପୋଡିୟମ ଫିନିଶ କରିଛନ୍ତି। ଡାନିଏଲ ରିକାର୍ଡୋ (ରେନଲ୍ଟ) ଚତୁର୍ଥ ଏବଂ ସର୍ଗିଓ ପେରେଜ (ରେସିଂ ପଏଣ୍ଟ) ୫ମ ହୋଇଛନ୍ତି।
୬ଷ୍ଠ ରୁ ୧୦ମ ସ୍ଥାନ ଯଥାକ୍ରମେ ଲାଣ୍ଡୋ ନୋରିସ୍(ମ୍ୟାକଲରେନ), ଡାନିଲ କ୍ୟାତ୍ (ଆଲ୍ଫା ତାଉରି), ଚାଲର୍ସ ଲେକ୍ରେକ୍(ଫେରାରି), କିମି ରାଇକୋନେନ (ଆଲ୍ଫା ରୋମିଓ) ଓ ସେବାଷ୍ଟିଆନ ଭେଟେଲ (ଫେରାରି)ଅଧିକାର କରିଥିଲେ। ଘଟଣାବହୁଳ ଏହି ରେସ୍ର ପ୍ରଥମ ୮ଲାପ୍ ମଧ୍ୟରେ ଦୁଇଥର ସେଫ୍ଟି କାର୍ରର ସହାୟତା ନେବାକୁ ପଡ଼ିଥିଲା। କାର୍ଲୋସ ସେଞ୍ଜ (ମ୍ୟାକଲରେନ), ଲତିଫି (ଓ୍ବିଲିୟମ୍ସ), କେଭିନ୍ ମାଗ୍ନସେନ୍ (ହାସ୍)ଙ୍ କାର୍ ମଧ୍ୟରେ ସଂଘର୍ଷ ଘଟିଥିଲା। ଫଳରେ ରେସ୍ରେ ସେମାନେ ବାଦ୍ ପଡ଼ିଥିଲେ। ଦୁଇଥର ରେଡ୍ ଫ୍ଲାଗ୍ ହେବା ଦିବସର ଅନ୍ୟତମ ଉଲ୍ଲେଖନୀୟ ଘଟଣା। ରେନଲ୍ଟର ଏଷ୍ଟିବାନ୍ ଓକନଙ୍କୁ ରିଟାୟର୍ଡ ନେବାକୁ ହୋଇଥିଲା। ୨୦୨୦ ସିଜନର ଏହା ଥିଲା ୯ମ ରେସ୍।
