ନୂଆଦିଲ୍ଲୀ,୧୮।୮: ଆଫଗାନିସ୍ତାନରେ ତାଲିବାନର ଜଣେ କମାଣ୍ଡର ତଥା ହକ୍କାନି ନେଟୱାର୍କ ଆତଙ୍କବାଦୀ ଗୋଷ୍ଠୀର ବରିଷ୍ଠ ନେତା ଅନାସ ହକାନି ଆଫଗାନିସ୍ତାନର ପୂର୍ବତନ ରାଷ୍ଟ୍ରପତି ହମିଦ କାରଜାଇଙ୍କୁ ସାକ୍ଷାତ କରିବା ସହିତ କେତେକ ପ୍ରସଙ୍ଗ ଉପରେ ଆଲୋଚନା କରିଛନ୍ତି ବୋଲି ତାଲିବାନ ଅଧିକାରୀ ବୁଧବାର ସୂଚନା ଦେଇଛନ୍ତି। ଦେଶରେ ମିଳିତ ସରକାର ଗଠନ ଉପରେ ଚର୍ଚ୍ଚା ହୋଇଥିବା ଅନୁମାନ କରାଯାଉଛି। ଏହି ବୈଠକରେ କାରଜାଇଙ୍କ ସହିତ ଆଫଗାନିସ୍ତାନର ପୂର୍ବତନ ସରକାରଙ୍କ ମୁଖ୍ୟ ଶାନ୍ତି ଦୂତ ଅବଦୁଲ୍ଲା ଅବଦୁଲ୍ଲା ମଧ୍ୟ ଯୋଗ ଦେଇଥିଲେ। ତେବେ ଆଲୋଚନା କେଉଁ କେଉଁ ବିଷୟ ଉପରେ ଚର୍ଚ୍ଚା ହୋଇଥିଲା ସେ ନେଇ ଅଧିକାରୀ ଜଣକ କୌଣସି ସୂଚନା ଦେବାକୁ ମନା କରିଛନ୍ତି।
ସୂଚନାଯୋଗ୍ୟ, ରବିବାର ଦିନ ରାଜଧାନୀ କାବୁଲକୁ ତାଲିବାନର ଗୁରୁତ୍ୱପୂର୍ଣ୍ଣ ହକ୍କାନି ନେଟୱାର୍କ ସଦସ୍ୟମାନେ ନିଜ ଦଖଲକୁ ନେଇଥିଲେ। ହକ୍କାନି ତାଲିବାନ ସଂଗଠନର ଏକ ଗୁରୁତ୍ୱପୂର୍ଣ୍ଣ ଅଂଶ।
