କେସିଙ୍ଗା, ୧୩.୭.(ତୁମେଶ୍ୱର ସାହୁ):କଳାହାଣ୍ଡି ଜିଲା କେସିଙ୍ଗା ବ୍ଲକ ଉତ୍କେଲା ଗ୍ରାମପଞ୍ଚାୟତ ଅଧୀନରେ ଥିବା ପଖାନ ବନ୍ଦ ନିକଟରେ ଏକ ଖୋଲା ଜିମ କେନ୍ଦ୍ର ନିର୍ମାଣାଧୀନ ରହିଛି। ଖୋଲା ଜିମ କେନ୍ଦ୍ର ନିର୍ମାଣ ଶେଷ ପର୍ଯାୟରେ ଥିବାବେଳେ ସୂଚନା ଫଳକ ନାହିଁ। ତେଣୁ କେଉଁ ବିଭାଗ ଦ୍ୱାରା କାର୍ଯ୍ୟ କରାଯାଉଛି ତାହା ଜଣାପଡୁନାହିଁ ଏବଂ ଏହାର ଚୁକ୍ତିନାମା ମୂଲ୍ୟ କେତେ ଓ ଏହା କେଉଁ ଉଦ୍ଦେଶ୍ୟରେ ନିର୍ମାଣ କରାଯାଉଛି ତାହା ମଧ୍ୟ ଜାଣି ହେଉ ନାହିଁ। ଉତ୍କେଲା ବିକାଶ ମଞ୍ଚପକ୍ଷରୁ ବିଡ଼ିଓଙ୍କ ନିକଟରେ ଏନେଇ ଅଭିଯୋଗ କରିଛନ୍ତି। ଏହି କାମ ଜୋରସୋରରେ ଚାଲିଥିବାବେଳେ ତଦାରଖ କରିବା ପାଇଁ ବିଭାଗୀୟ ଯନ୍ତ୍ରୀ ନାଁ ଠିକାସଂସ୍ଥା ଠିକାଦାରଙ୍କ ଦେଖା ନାହିଁ। କେବଳ ଜଣେ ମୁନସୀ ମାଧ୍ୟମରେ କାମ ଚଲାଇଥିବା ଅଭିଯୋଗ ହେଉଛି ଓ ଅତି ନିମ୍ନମାନର କାମ ହେଉଥିବା ବିକାଶ ମଞ୍ଚର ଅଭିଯୋଗ କରିଥିବାର ଜଣାପଡିଛି।
ଏନେଇ ସ୍ଥାନୀୟ ଲୋକଙ୍କ ମଧ୍ୟରେ ଉଦବେଗ ପ୍ରକାଶ ପାଇଛି। ଲୋକଙ୍କ ଅଭିଯୋଗକୁ ଭିତ୍ତି କରି ବିକାଶ ମଞ୍ଚ ପ୍ରତିନିଧି ଦଳ ନିର୍ମାଣସ୍ଥଳକୁ ଯାଇ କାର୍ଯ୍ୟ ଦେଖିଥିଲେ। ସେଠାରେ ଶସ୍ତା ସିମେଣ୍ଟ ଓ ନିମ୍ନମାନର ସାମଗ୍ରୀ କାମ ହେଉଥିବା ଜାଣିବାକୁ ପାଇଥିଲେ। ଅତି ନିମ୍ନମାନର କାମ ହେଉଥିବାରୁ ବିକାଶ ମଞ୍ଚ ପକ୍ଷରୁ ବିଡ଼ିଓଙ୍କ ନିକଟରେ ଅଭିଯୋଗ କରିଛନ୍ତି। ଜିମ କେନ୍ଦ୍ରକୁ ଯାଇ କାମ ବନ୍ଦ କରିଛନ୍ତି। ବିକାଶ ମଞ୍ଚ ସଭାପତି ଅନିରୁଦ୍ଧ ସାହୁ, ସମ୍ପାଦକ ଟଙ୍କ ନାଏକ, ଗିରିଜା ବେହେରା ଓ ସମସ୍ତ ବିକାଶ ମଞ୍ଚର ପ୍ରତିନିଧି ଉପସ୍ଥିତ ରହିଁଥିଲେ। ଏ ସଂକ୍ରାନ୍ତରେ କେସିଙ୍ଗା ବିଡ଼ିଓ ଜନ୍ମେଜୟ ସ୍ବାଇଁଙ୍କୁ ପଚାରିବାରୁ ମୁଁ ତଦନ୍ତ କରିବି ଏବଂ ଠିକ କାମ କରିବାକୁ ଜେଇଙ୍କୁ ନିର୍ଦ୍ଦେଶ ଦେବି ବୋଲି ପ୍ରକାଶ କରିଥିଲେ।
Dharitri – Odisha’s No.1 Odia Daily
