ଅହମଦାବାଦ, ୩୧ା୧୦: ଗୁଜରାଟର ମୋର୍ବି ସ୍ଥିତ ମାଛୁ ନଦୀରେ ରବିବାର ଏକ ୧୦୦ ବର୍ଷ ପୁରୁଣା ଝୁଲା ପୋଲ ଭୁଶୁଡ଼ିବା ଘଟଣାରେ ୧୩୪ରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୪୭ ଜଣ ପିଲା ରହିଥିବା ଜଣାପଡ଼ିଛି। ଶତାବ୍ଦୀ ପୁରୁଣା ପୋଲଟିର ମରାମତି କାମ କରାଇଥିବା ଗୁଜରାଟର ଓରେବା କମ୍ପାନୀକୁ କାର୍ଯ୍ୟରେ ଅବହେଳା ପାଇଁ ଦାୟୀ କରାଯାଇଛି। ଏ ନେଇ ମୋରବ୍ ‘ବି’ ଥାନାରେ ମାମଲା ରୁଜୁ ହେବା ସହ ୯ ଜଣଙ୍କୁ ସୋମବାର ଗିରଫ କରାଯାଇଛି। ଗିରଫଙ୍କ ମଧ୍ୟରେ ଓରେବା କମ୍ପାନୀ ମ୍ୟାନେଜର, ବ୍ରିଜ୍ କଣ୍ଟ୍ରାକ୍ଟର, ଟିକେଟ୍ କଲେକ୍ଟର ଏବଂ ୩ ସୁରକ୍ଷାକର୍ମୀ ରହିଛନ୍ତି। ସମ୍ପୃକ୍ତ ସୁରକ୍ଷାକର୍ମୀ ଭିଡ଼ ନିୟନ୍ତ୍ରଣରେ ବିଫଳ ହୋଇଥିବା ଅଭିଯୋଗ ରହିଛି। ବ୍ରିଜ୍ ସୁରକ୍ଷା କାମରେ ଓରେଭା କମ୍ପାନୀ ଅନେକ ଖିଲାପ କରିଥିବା ଅଭିଯୋଗ ଆସିଛି। ତେବେ ଅଦ୍ୟାବଧି କମ୍ପାନୀର କୌଣସି ବଡ଼ ଅଧିକାରୀଙ୍କୁ ଗିରଫ କରାଯାଇନାହିଁ। ଦୋଷୀଙ୍କୁ ଛଡ଼ାଯିବ ନାହିଁ। ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ମୋରବି ପୋଲିସ ମୁଖ୍ୟ ଅଶୋକ ଯାଦବ କହିଛନ୍ତି। ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନ୍ଡିଆର୍ଏଫ୍)ର ୫ ଟିମ୍, ରାଜ୍ୟ ବିପର୍ଯ୍ୟୟ ପ୍ରଶମନ ବଳ (ଏସ୍ଡିଆର୍ଏଫ୍)ର ୬ ପ୍ଲାଟୁନ୍ ଫୋର୍ସ, ଭାରତୀୟ ବାୟୁସେନା ଓ ନୌସେନାର ଏକ ଟିମ୍ ଏବେ ବି ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି। ଉଦ୍ଧାର କାର୍ଯ୍ୟର ୨୪ ଘଣ୍ଟା ପରେ ବି ଶତାଧିକ ଲୋକ ନିଖୋଜ ଅଛନ୍ତି। ରାତି ଯୋଗୁ ସୋମବାର ରେସ୍କ୍ୟୁ ଅପରେଶନ ବନ୍ଦ ହୋଇଛି। ମଙ୍ଗଳବାର ପୁଣି ଉଦ୍ଧାର କାର୍ଯ୍ୟ ଜାରି ରହିବ ବୋଲି କୁହାଯାଇଛି।
