ଲଣ୍ଡନ,୮ା୯: ବ୍ରିଟେନର ନବନିର୍ବାଚିତ ପ୍ରଧାନମନ୍ତ୍ରୀ ଲିଜ ଟ୍ରସ୍ ଗୁରୁବାର କହିଛନ୍ତି, ଆଗାମୀ ଦିନରେ ପ୍ରବଳ ଥଣ୍ଡା ପାଗର ସମ୍ମୁଖୀନ ହେବାକୁ ପଡ଼ିବ। ତେଣୁ ତାଙ୍କ ସରକାର ଘରୋଇ ତଥା ବ୍ୟବସାୟିକ ଉଦ୍ଦେଶ୍ୟରେ ବ୍ୟବହୃତ ବିଦ୍ୟୁତ୍ ଶକ୍ତି ମୂଲ୍ୟ ହ୍ରାସ କରିବେ।
ସଂସଦରେ ଏମ୍ପିମାନଙ୍କ ଆଗରେ ଟ୍ରସ୍ ଦୁଇ ବର୍ଷର ‘ଶକ୍ତି ମୂଲ୍ୟ ଗ୍ୟାରେଣ୍ଟି’ ଘୋଷଣା କରିଥିଲେ। ଅର୍ଥାତ୍ ଘରୋଇ ଶକ୍ତି ବ୍ୟବହାର ପାଇଁ ବିଲ୍ ୨୫୦୦ ପାଉଣ୍ଡରୁ ଅଧିକ ହେବ ନାହିଁ। ଅକ୍ଟୋବରରୁ ଏହି ବିଲ୍ ୩୫୦୦ ପାଉଣ୍ଡ (୪୦୦୦) ପର୍ଯ୍ୟନ୍ତ ବୃଦ୍ଧି ହେବାର ଥିଲା, ଯାହା ପୂର୍ବ ବର୍ଷ ତୁଳନାରେ ପ୍ରାୟ ୩ ଗୁଣ ଅଧିକ।
ବିଦ୍ୟୁତ୍ ମୂଲ୍ୟ ବୃଦ୍ଧି ହେବାର କାରଣ ହେଉଛି ୟୁକ୍ରେନରେ ଚାଲିଥିବା ସାମରିକ ଅଭିଯାନ, କରୋନା ମହାମାରୀ ଏବଂ ବ୍ରେକ୍ସିଟ। ଟ୍ରସ୍ କହିଛନ୍ତି ଶୀତଦିନର ମୁକାବିଲା ପାଇଁ ଆମେ ଆମ ଦେଶକୁ ସାହାଯ୍ୟ କରିବୁ ଏବଂ ଶକ୍ତି ମୂଲ୍ୟ ବୃଦ୍ଧି ପାଇଁ ଦାୟୀ ଥିବା କାରଣଗୁଡ଼ିକ ସହିତ ମଧ୍ୟ ମୁକାବିଲା କରିବାକୁ ଚେଷ୍ଟା କରିବୁ ଯାହା ଦ୍ୱାରା ଆଗାମୀ ସମୟରେ ଏଥିରେ କୌଣସି ଅସୁବିଧା ହେବ ନାହିଁ।
ଟ୍ରସ କହିଛନ୍ତି, କେବଳ ଘର ନୁହେଁ, ଡାକ୍ତରଖାନା ଏବଂ ବିଦ୍ୟାଳୟଗୁଡ଼ିକୁ ମଧ୍ୟ ସାହାଯ୍ୟ କରାଯିବ, କିନ୍ତୁ ଏଗୁଡ଼ିକର ସହାୟତା ସମୟ ସୀମା ଦୁଇ ବର୍ଷ ନୁହେଁ, ମାତ୍ର ୬ ମାସ ହେବ। ସରକାର କହିଛନ୍ତି, ଏହା ବ୍ରିଟେନରେ ମୁଦ୍ରାସ୍ଫୀତି ବୃଦ୍ଧି ହାରକୁ ୪ରୁ ୫ପ୍ରତିଶତ ହ୍ରାସ କରିବ।
