ଜଗନ୍ନାଥ ପ୍ରସାଦ ,୪।୭(ବିଭୁ ପ୍ରସାଦ ପଟ୍ଟନାୟକ): ରାଜ୍ୟରେ ସରକାର ଏବଂ ଆନ୍ଦୋଳନରତ ଡାକ୍ତରମାନଙ୍କ ମଧ୍ୟରେ ଚାଲିଥିବା ଆଲୋଚନା ବିଫଳ ହେବା ପରେ ଗଞ୍ଜାମ ଜିଲା ଜଗନ୍ନାଥପ୍ରସାଦ ବ୍ଲକ ଅଞ୍ଚଳରେ ସ୍ୱାସ୍ଥ୍ୟ ସେବା ସମ୍ପୂର୍ଣ୍ଣ ଭୁଶୁଡ଼ି ପଡ଼ିଛି। ଉଭୟ ପକ୍ଷ ନିଜ ନିଜ ଜିଦରେ ଅଟଳ ରହିବା ଫଳରେ ସରକାରୀ ମେଡିକାଲଗୁଡ଼ିକରେ ସେବା ପ୍ରଦାନ ବାଧାପ୍ରାପ୍ତ ହୋଇଛି। ଏହାର ସିଧାସଳଖ ପ୍ରଭାବ ଗ୍ରାମାଞ୍ଚଳର ଗରିବ ଓ ଅସହାୟ ରୋଗୀଙ୍କ ଉପରେ ପଡ଼ିଛି।
ମିଳିଥିବା ସୂଚନା ଅନୁଯାୟୀ, ଜଗନ୍ନାଥପ୍ରସାଦ ବ୍ଲକ ଅଧୀନରେ ଥିବା ୪ଟି ଯାକ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର (PHC) ଅଳସୁ, ଛାମୁଣ୍ଡା,ବାର ଗାଁ, ତାରାସିଂ ରେ ଚିକିତ୍ସା ସେବା ସମ୍ପୂର୍ଣ୍ଣ ରୂପେ ଠପ୍ ହୋଇଯାଇଛି। ସେଠାରେ ରୋଗୀଙ୍କୁ ସାଧାରଣ ପ୍ରାଥମିକ ଚିକିତ୍ସା ଟିକିଏ ମଧ୍ୟ ମିଳିପାରୁ ନାହିଁ। ଅନ୍ୟପଟେ, ବଡ଼ ଆଶା ନେଇ ସମଗ୍ର ବ୍ଲକର ଶହ ଶହ ରୋଗୀ ଜଗନ୍ନାଥପ୍ରସାଦ ଗୋଷ୍ଠୀସ୍ୱାସ୍ଥ୍ୟ କେନ୍ଦ୍ର (CHC) କୁ ଆସୁଥିବା ବେଳେ, ସେଠାରେ ଏବେ ମାତ୍ର ଜଣେ ମାତ୍ର ଆୟୁଷ ଡାକ୍ତର ଅଛନ୍ତି। ସେହି ଜଣେ ଡାକ୍ତରଙ୍କ ଉପରେ ଏବେ ସମଗ୍ର ଅଞ୍ଚଳର ଜରୁରୀକାଳୀନ ଏବଂ ଓପିଡି (OPD) ସେବାର ସମସ୍ତ ବୋଝ ରହିଛି, ଯାହା ସ୍ଥିତିକୁ ଅତି ଗମ୍ଭୀର ହେଲାଣି I ଜଗନ୍ନାଥପ୍ରସାଦ ମେଡିକାଲକୁ ଆସୁଥିବା ରୋଗୀ ଓ ସେମାନଙ୍କ ସମ୍ପର୍କୀୟମାନେ ଏବେ ନାହିଁ ନଥିବା ହନ୍ତସନ୍ତ ହେଉଛନ୍ତି। ବିଶେଷ କରି ଜରୁରୀକାଳୀନ ରୋଗୀ, ବୃଦ୍ଧବୃଦ୍ଧା ଏବଂ ଗର୍ଭବତୀ ମହିଳାମାନେ ସବୁଠାରୁ ଅଧିକ ସମସ୍ୟାର ସମ୍ମୁଖୀନ ହେଉଛନ୍ତି। ଦୂରଦୂରାନ୍ତ ଗାଁରୁ ଆସୁଥିବା ଗରିବ ଲୋକେ ବାଧ୍ୟ ହୋଇ ଧାର କରଜ କରି ନୟାଗଡ, ବ୍ରହ୍ମପୁର, ଭୁବନେଶ୍ୱର ଘରୋଇ ନର୍ସିଂହୋମ ମୁହାଁ ହେଉଛନ୍ତି।
ଆଜି ଜଣେ ସ୍କୁଲ ଛାତ୍ରୀ ଛାତି ଯନ୍ତ୍ରଣାକୁ ନେଇ ଆଜି ଆସିଥିବା ବେଳେ ମୁଖ୍ୟ ଡାକ୍ତର ନଥିବା କାରଣରୁ ପରିବାର ପକ୍ଷରୁ ଅସନ୍ତୋଷ ଦେଖିବାକୁ ମିଳିଛି I ସରକାର ଏବଂ ଡାକ୍ତରଙ୍କ ଏହି ଲଢ଼େଇ ଭିତରେ ସାଧାରଣ ଜନତା କେବଳ ବଳି ପଡ଼ୁଥିବାରୁ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜଗନ୍ନାଥପ୍ରସାଦ ଅଞ୍ଚଳବାସୀ ଏବେ ଦାବି କରିଛନ୍ତି ଯେ ସରକାର ତୁରନ୍ତ ଏହି ସ୍ୱାସ୍ଥ୍ୟ ସଂକଟର ସମାଧାନ କରନ୍ତୁ ଏବଂ ମେଡିକାଲରେ ଡାକ୍ତର ବ୍ୟବସ୍ଥା କରିବାକୁ ଦାବି ରଖିଛନ୍ତି I
