ଛତ୍ରପୁର,୧୭।୭(ଡି.ଏନ୍.ଏ): ଗଞ୍ଜାମ ଜିଲାରେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି। ଜିଲାରେ କୋଭିଡ୍ ପରିଚାଳନା ଓ ନିୟନ୍ତ୍ରଣ କରିବାରେ ରାଜ୍ୟ ସରକାର ଓ ଜିଲା ପ୍ରଶାସନ ସମ୍ପୂର୍ଣ୍ଣ ରୂପେ ବିଫଳ ହୋଇଥିବା ଭାଜପା ପକ୍ଷରୁ ଶୁକ୍ରବାର ଛତ୍ରପୁରଠାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଅଭିଯୋଗ କରାଯାଇଛି । କୋଭିଡ୍ ଟେଷ୍ଟିଂ ମଧ୍ୟ ଠିକ୍ ଭାବେ କରାଯାଉନି । ଜିଲାରେ ଥିବା କୋଭିଡ୍ ହସ୍ପିଟାଲ ଓ କୋଭିଡ୍ କେୟାର ସେଣ୍ଟରରେ ସ୍ବାସ୍ଥ୍ୟ ସେବାଠାରୁ ଆରମ୍ଭ କରି ଖାଦ୍ୟ, ପାଣି, ପରିମଳ ଆଦି ଅବ୍ୟବସ୍ଥା ନେଇ ସେଠାରେ ଥିବା ରୋଗୀମାନେ ଦୈନିକ ଭିଡିଓ ଭାଇରାଲ କରୁଛନ୍ତି। ଜିଲାରେ ଥିବା କୋଭିଡ୍ ସେଲ୍କୁ ମଧ୍ୟ ସେମାନେ ଫୋନ୍ କରି ଅଭିଯୋଗ ଜଣାଉଛନ୍ତି ।
ମାତ୍ର ଏହି ସମସ୍ୟା ସମାଧାନ ପାଇଁ ଜିଲାପ୍ରଶାସନ ପକ୍ଷରୁ ପଦକ୍ଷେପ ନିଆଯାଉ ନ ଥିବା ଭାଜପା ଅଭିଯୋଗ କରିଛି । ତୁରନ୍ତ ଏହା ଉପରେ ଉଚିତ୍ ପଦକ୍ଷେପ ନିଆ ନ ଗଲେ ଆଗାମୀ ଦିନରେ ଭାଜପା ଆନ୍ଦୋଳନକୁ ଓହ୍ଲାଇବ ବୋଲି ଭାଜପା ନେତା ପ୍ରଶାନ୍ତ କୁମାର କର ଚେତାବନୀ ଦେଇଛନ୍ତି । ସରକାର ଓ ପ୍ରଶାସନର ପଦକ୍ଷେପ କେବଳ ଶଟ୍ଡାଉନ୍ ଓ ଲକ୍ଡାଉନ୍ରେ ସିମୀତ ରହିଛି ବୋଲି କଣମଣା ମଣ୍ଡଳ ଭାଜପା ସଭାପତି ତଥା ଓକିଲ ପଦ୍ମଚରଣ ସାହୁ କହିଛନ୍ତି । ଗାଁରେ ରାଶନ ସାମଗ୍ରୀ ମିଳୁନି । କୋଭିଡ୍ ଟେଷ୍ଟିଂ ବୃଦ୍ଧି, ବୁଦ୍ଧିଜିବୀ, ରାଜନୈତିକ ଦଳର ପ୍ରତିନିଧି, ବରିଷ୍ଠ ନାଗରିକ ଓ ଓକିଲଙ୍କ କୋଭିଡ୍ ପରିଚାଳନା ଉପରେ ମତାମତ ନିଆଯାଉ ବୋଲି ସଭାପତି ସାହୁ ଦାବି କରିଛନ୍ତି । ଉକ୍ତ ଖବରଦାତା ସମ୍ମିଳନୀରେ ଛତ୍ରପୁର ମଣ୍ଡଳ ଭାଜପା ସଭାପତି ସଞ୍ଜିତ କୁମାର ରାଉଳ, ସାଧାରଣସମ୍ପାଦକ ଡି. ସୁରେଶ ରେଡ୍ଡୀ, ଅମରେଶ ମହାରଣା ପ୍ରମୁଖ ଉପସ୍ଥିତ ଥିଲେ ।
