ଲକ୍ଷ୍ନୌ,୪।୪: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୋମବାର ଗୋରଖପୁରରେ ପହଞ୍ଚିଛନ୍ତି। ଗୋରଖପୁରରେ ପହଞ୍ଚିବା ପରେ ବିଆର୍ଡି ମେଡିକାଲ କଲେଜ ଏବଂ ହସ୍ପିଟାଲକୁ ଯାଇ ଆହତ ପୋଲିସ କର୍ମୀଙ୍କୁ ଭେଟିଛନ୍ତି। ଏଥିସହ ସେମାନଙ୍କ ସ୍ବାସ୍ଥ୍ୟାବସ୍ଥା ପଚାରିବୁଝିଛନ୍ତି। ସୂଚନାଯୋଗ୍ୟ, ଗୋରଖନାଥ ମନ୍ଦିର ବାହାରେ ଆତଙ୍କବାଦୀ ଘଟଣା ଘଟାଇବା ପାଇଁ ଆକ୍ରମଣକାରୀ ମନ୍ଦିର ପରିସରରେ ପ୍ରବେଶ କରିବାକୁ ଉଦ୍ୟମ କରୁଥିଲେ। ଯାହାକୁ ପିଏସି ଏବଂ ପୋଲିସ କର୍ମଚାରୀ ସଫଳ ହେବାକୁ ଦେଇ ନ ଥିଲେ। ତେବେ ଉକ୍ତ ଘଟଣାରେ ୨ଜଣ ପିଏସି କର୍ମଚାରୀ ଗୁରୁତର ଭାବେ ଆହତ ହୋଇଛନ୍ତି ବୋଲି ଅଧିକାରୀ କହିଛନ୍ତି। ଏହି ଆକ୍ରମଣ ଘଟଣାରେ ଏଟିଏସ୍ ଏବଂ ଏସ୍ଟିଏଫ ମିଳିତ ଭାବେ ଯାଞ୍ଚ କରୁଥିବା ଜଣାପଡ଼ିଛି। ଇତିମଧ୍ୟରେ ଅଭିଯୁକ୍ତ ଅହମ୍ମଦ ମୁର୍ତଜାଙ୍କୁ ସୋମବାର କୋର୍ଟରେ ହାଜର କରାଯାଇଥିଲା। କୋର୍ଟ ତାଙ୍କୁ ୧୪ ଦିନିଆ ନ୍ୟାୟିକ ରିମାଣ୍ଡରେ ପଠାଇଛନ୍ତି। ଏହି ଆକ୍ରମଣ ଏକ ଗୁରୁତର ଷଡ଼ଯନ୍ତ୍ରର ଏକ ଅଂଶ। ତେବେ ଉପଲବ୍ଧ ତଥ୍ୟକୁ ଆଧାର କରି ଏହା ଏକ ଆତଙ୍କବାଦୀ ଘଟଣା ବୋଲି ଲକ୍ଷ୍ନୌରେ ଅତିରିକ୍ତ ମୁଖ୍ୟ ସଚିବ ଗୃହ ଅବନୀଶ ଅୱସ୍ତି ଏବଂ ପୋଲିସର ଅତିରିକ୍ତ ମହାନିର୍ଦ୍ଦେଶକ ପ୍ରଶାନ୍ତ କୁମାର ଏକ ଖବରଦାତା ସମ୍ମିଳନୀ କରି କହିଛନ୍ତି। ଅନ୍ୟପଟେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପିଏସି ଗୋପାଳ ଗୌଡ ଓ ଅନିଲ ପାସୱାନ ତଥା ନାଗରିକ ପୋଲିସ କର୍ମୀ ଅନୁରାଗ ରାଜପୁତଙ୍କୁ ୫ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଛନ୍ତି।
