ଭବାନୀପାଟଣା,୯।୧(ଉତ୍ତମ କୁମାର ଦାଶ): କଳାହାଣ୍ଡି ଜିଲାରେ ଡିସେମ୍ୱରରୁ ଶୀତର ଲହରି ଆରମ୍ଭ ହୋଇଛି। ଶୀତ ଋତୁ ଆରମ୍ଭରୁ ପ୍ରାୟ ୧୨ରୁ ଅଧିକ ବିଦେଶୀ ପ୍ରଜାତିର ପରିବ୍ରାଜକ ପକ୍ଷୀଙ୍କ ଠିକଣା ପାଲଟିଛି କଳାହାଣ୍ଡି ଜିଲା ଜୁନାଗଡ଼ ବ୍ଲକର ଭତ୍ରାଡ୍ୟାମ। ଏବେ ଉକ୍ତ ଡ୍ୟାମରେ ପ୍ରାୟ ୨୫୦ ପ୍ରଜାତିର ପକ୍ଷୀଙ୍କ ବାସସ୍ଥାନ ପାଲଟିଛି।
ଜିଲାର ଇନ୍ଦ୍ରାବତୀ ଜଳଭଣ୍ଡାର ସହ ଭତ୍ରାଯୋର ସଂଯୋଗ ଥିବା ଏହାର ତଟର୍ତ୍ତୀ ଅଞ୍ଚଳରେ ବିଭିନ୍ନ ପରିବ୍ରାଜକ ପକ୍ଷୀଙ୍କ ଆଗମନ ପ୍ରାୟ ଅକ୍ଟୋବରରୁ ଆରମ୍ଭ ହୋଇଛି। ଭତ୍ରାଡ୍ୟାମ ସମେତ କର୍ଲାପାଟ ଅଭୟାରଣ୍ୟ ଓ ବିଭିନ୍ନ ଜଳ ଉତ୍ସଗୁଡ଼ିକରେ ଏହି ପକ୍ଷୀମାନେ ବିଚରଣ କରୁଛନ୍ତି। ଜୁନାଗଡ଼ ବ୍ଲକ ଭତ୍ରାଯୋର ଡ୍ୟାମ ଇକୋଟୁରିଜମ ଯୋଜନାରେ ବନବିଭାଗ ପକ୍ଷରୁ ନୌକାବିହାର କେନ୍ଦ୍ର ଭାବେ କାର୍ଯ୍ୟକାରୀ ହେଉଛି।
ଏଠାକୁ ବିଭିନ୍ନ ପ୍ରଜାତିର ପକ୍ଷୀମାନେ ଆସୁଥିବାରୁ ପକ୍ଷୀ ଅଭୟାରଣ୍ୟ ଘୋଷଣା ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି। ଯାହାକି ଏବେ ବିଚାର ଧୀନ ରହିଛି। କେତେକ ସାଇବେରିଆନ ପକ୍ଷୀ ମଧ୍ୟ ଭତ୍ରାଜୋର ଡ୍ୟାମ ଓ ଜୟପାଟଣା ବ୍ଲକ ସ୍ଥିତ ସୁନ୍ଦରୀ ଯୋରରେ ଦେଖାଯାଉଛନ୍ତି।
ଏଠାରେ ବିଦେଶୀ ପକ୍ଷୀ ଗାର୍ଡୱାଲ, ରେଡ ହୋଡେଡ଼ ପୋଚାର୍ଡ, ନର୍ଥନ ପିଣ୍ଡେଲ, ସାରବାର୍ଡ, ଉତସେଣ୍ଡ ପାଇପର, ଗ୍ରୀନ୍ସେଣ୍ଡ ପାଇପର, ଟେରମେରିକା ୱିଣ୍ଟ, ଲିଟିଲ ରିଙ୍ଗ ପାଲଭର, ବ୍ଲାକୱିଙ୍ଗ ସ୍କେଲଡ଼, ହିସକଡ ଷ୍ଟେର୍ଣ୍ଣ, ରୋଜିଷ୍ଟାରଲିଙ୍ଗ, ଗାରଗେନୀ, ୟୁରୋପିଏନ ଷ୍ଟୋନ ସମେତ ପ୍ରାୟ ୧୨ଟି ପ୍ରଜାତିର ପକ୍ଷୀ ବର୍ତ୍ତମାନ ଦେଖାଯାଉଛନ୍ତି।
ସେହିପରି ହିମାଳୟ ପାଦଦେଶର ଇଣ୍ଡିଆନପିକଟା, ବ୍ରାଉନକେପଡ, ପିଗମି ଉପ୍ଲେକର, ରେପଡ ଇବିସ ଭଳି ବହୁ ପ୍ରଜାତିର ପ୍ରାୟ ୨୫୦ରୁ ଅଧିକ ପକ୍ଷୀ କଳାହାଣ୍ଡିକୁ ଆସିଥାନ୍ତି ବୋଲି ପକ୍ଷୀ ବିଶାରଦ ଦାବି କରୁଛନ୍ତି।
ଭତ୍ରାଯୋର ଅଞ୍ଚଳର ଚାଷଜମି ଓ ପୋଖରୀ ନିକଟରେ ପରିବ୍ରାଜକ ପକ୍ଷୀମାନେ ଦଳଦଳ ହୋଇ ଖାଦ୍ୟ ଅନ୍ୱେଷେଣ କରୁଛନ୍ତି। ଖାଦ୍ୟ ଅନ୍ୱେଷେଣରେ ଆମେରିକା, ଦକ୍ଷିଣ ଆମେରିକା, ଆଫ୍ରିକା, ଅଷ୍ଟ୍ରେଲିଆରୁ ଏହି ପ୍ରଜାତିର ପକ୍ଷୀ ଆସିଥିବା ପକ୍ଷୀ ବିଶେଷଜ୍ଞ ଆଇନଜୀବୀ ମହମ୍ମଦ ଖଲିଲ ପ୍ରକାଶ କରିଛନ୍ତି ।
ସେ ବିଭିନ୍ନ ସ୍ଥାନରେ ପକ୍ଷୀ ଚିହ୍ନଟ ପାଇଁ ଅନ୍ୱେଷଣରେ ଥିବାବେଳେ ଅନେକ ବିରଳ ପକ୍ଷୀ ଦଳକୁ ଦେଖିବାକୁ ପାଇଥିଲେ ବୋଲି ପ୍ରକାଶ କରିଛନ୍ତି। ବନ୍ୟପ୍ରାଣୀ ବନାଞ୍ଚଳ ବନଖଣ୍ଡ ପକ୍ଷରୁ ଭତ୍ରାଡ୍ୟାମକୁ ନୌକାବିହାର ଭାବେ ବିକାଶ କରାଯାଇଥିବାବେଳେ ପକ୍ଷୀଙ୍କ ଆନୁଷଙ୍ଗିକ ସୁରକ୍ଷା ବ୍ୟବସ୍ଥା, ପକ୍ଷୀ ସୁରକ୍ଷା ଶିବିର କରାଯାଇପାରିବ।
