ଖଇରା/ଔପଦା, ୨୭।୧୧(ଡି.ଏନ.ଏ.): ବାଲେଶ୍ୱର ଜିଲା ଖଇରା ବ୍ଲକରେ ପୂର୍ତ୍ତ ବିଭାଗ ଅଧୀନରେ ବିଭିନ୍ନ ସ୍ଥାନରେ ଚାଲିଥିବା କାର୍ଯ୍ୟକୁ ନେଇ ସାଧାରଣରେ ସନ୍ଦେହ ସୃଷ୍ଟି ହୋଇଛି। ବିଶେଷ କରି ବେପରୁଆ ଭାବେ ଚାଲିଥିବା ଗଣ୍ଡିବେଡ-ଔପଦା ଏବଂ ୫ରୁ ଅଧିକ ରାସ୍ତା କାମର ଉଚ୍ଚସ୍ତରୀୟ ତଦନ୍ତ କରି ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଖଇରା ବ୍ଲକର ବିଭିନ୍ନ ସଙ୍ଗଠନ ତରଫରୁ ଦାବି କରାଯାଇଛି। ୬କି.ମି. ରାସ୍ତା ପ୍ରଶସ୍ତୀକରଣ ପାଇଁ ପାଖାପାଖି ୧୨ କୋଟି ଟଙ୍କା ମଞ୍ଜୁରି ମିଳିଥିଲା । ଜୁଲାଇ ୧୧ ତାରିଖରେ ରାସ୍ତା ଶିଳାନ୍ୟାସ ହେବା ପରେ ଏହି ରାସ୍ତାରେ ଯାତାୟାତ କରୁଥିବା ବାଲେଶ୍ୱର, ମୟୂରଭଞ୍ଜ ଓ ଭଦ୍ରକ ୩ ଜିଲାର ଯାତ୍ରୀ ଆଶ୍ୱସ୍ତ ହୋଇଥିଲେ। ଦୈନିକ ହନ୍ତସନ୍ତ ହୋଇ ଯାଆସ କରୁଥିବା ହଜାର ହଜାର ଯାତ୍ରୀଙ୍କ ମନରେ ନୂଆ ଆଶା ସଞ୍ଚାର ହୋଇଥିଲା। ଆଉ ତାଙ୍କୁ ପ୍ରତି ମୂହୁର୍ତ୍ତରେ ଦୁର୍ଘଟଣାର ସମ୍ମୁଖୀନ ହେବାକୁ ପଡିବନି ବୋଲି ସେମାନେ ଭାବିଥିଲେ। ଏବେ ରାସ୍ତା ଆରମ୍ଭ ହେବା ସହ କାର୍ଯ୍ୟର ମାନ ଦେଖିବା ପରେ ଯାତ୍ରୀ ତଥା ରାସ୍ତା ସଂଲଗ୍ନ ଗ୍ରାମବାସୀଙ୍କର ସବୁ ଆଶା ବିଶ୍ୱାସ ପାଣି ଫୋଟକା ପରି ମିଳେଇ ଯାଇଛି। ଏଷ୍ଟିମେଟ ଅନୁଯାୟୀ କାର୍ଯ୍ୟ କରାଯିବା ବଦଳରେ ବେପରୁଆ କାମକୁ ନେଇ ଯାତ୍ରୀଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି । ଏବେ କଲଭର୍ଟ ଓ ପୋଲ କାମ ଚାଲିଥିବା ବେଳେ ଠିକ୍ ଭାବେ ଡାଇଭର୍ଶନ ନିର୍ମାଣ କରାଯାଇ ନ ଥିବାରୁ ଗାଡି ଚାଳକମାନେ ଦୁର୍ଘଟଣା ସମ୍ମୁଖୀନ ହେଉଛନ୍ତି । ବ୍ୟବହୃତ କଞ୍ଚାମାଲ ମଧ୍ୟ ଠିକ୍ଠାକ୍ ନ ଥିବାରୁ କଲଭର୍ଟ ସ୍ଥାୟିତ୍ୱକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ସେହିଭଳି ଯାତ୍ରୀଙ୍କ ସୂଚନା ପାଇଁ ଫଳକ ଲଗାଯିବାର ନିୟମ ଥିଲେ ହେଁ କାମ ଆରମ୍ଭର ୫ ମାସ ଅତିକ୍ରାନ୍ତ ହେବାକୁ ବସିଥିବା ବେଳେ ଏହା ଲଗାଯାଇ ନ ଥିବାରୁ କାର୍ଯ୍ୟକୁ ନେଇ ଯାତ୍ରୀମାନଙ୍କୁ ଅନ୍ଧାରରେ ରଖାଯାଇଥିବା ଅଭିଯୋଗ ହୋଇଛି। ସେପଟେ ଉକ୍ତ କାର୍ଯ୍ୟ ସମ୍ପର୍କରେ ଅଭିଯୋଗ ଦେବାକୁ ଯାତ୍ରୀମାନେ ଗଣ୍ଡିବେଡସ୍ଥିତ କାର୍ଯ୍ୟାଳୟକୁ ଦୌଡୁଥିଲେ ହେଁ ତାଙ୍କର ଦେଖା ନ ପାଇ ନିରାଶ ହୋଇ ଫେରୁଥିବା ଅଭିଯୋଗ ହୋଇଛି । ବିଶେଷ କରି ରାସ୍ତା ଦାୟିତ୍ୱରେ ଥିବା ଯନ୍ତ୍ରୀ ଦୀର୍ଘଦିନ ଧରି ସୋର ସବଡିଭିଜନର ଅଧୀନରେ ରହିଥିବାରୁ ଗୋଟିଏ ହେଲେ କାର୍ଯ୍ୟ ଠିକ୍ ଢଙ୍ଗରେ ସମ୍ପୂର୍ଣ୍ଣ ହୋଇପାରୁନାହିଁ । ନିକଟରେ ଶେଷ ହୋଇଥିବା କୁପାରୀ-ଶାରୀଶୁଆ, ବର୍ତ୍ତନା- ଆଗରପଡା ରାସ୍ତା ଏବଂ ଏବେ ଚାଲିଥିବା ବାରାପୁର-କୁପାରୀ ରାସ୍ତା ଭଳି ଅନ୍ୟ ରାସ୍ତାରେ ରାଜ୍ୟସ୍ତରର ଅଧିକାରୀ ଥରେ ଆଖି ପକାଇଲେ ଅଭିଯୋଗର ସତ୍ୟତା ଉପଲବ୍ଧି କରିପାରିବେ ବୋଲି ବିଭିନ୍ନ ସଙ୍ଗଠନ ତରଫରୁ ଅନୁରୋଧ କରାଯାଇଛି । ଏ ସମ୍ପର୍କରେ ସୋର ସହକାରୀ ଯନ୍ତ୍ରୀଙ୍କୁ ପଚାରିବାରେ କାମରେ କୌଣସି ଅନିୟମିତତା ହୋଇ ନ ଥିବା କହିଛନ୍ତି ।
