ଗଜପତି,୧୧ା୧(ଗିରିଧାରୀ ପରିଛା): ଗଜପତି ଜିଲା ସଦରମହକୁମା ପାରଳାଖେମୁଣ୍ଡି ଠାରେ ଜିଲାସ୍ତରୀୟ ମହୋତ୍ସବ ଗଜପତି ଉତ୍ସବ-୨୦୨୫ ଉତ୍ସବ ପୂର୍ବରୁ ପାରଳାଖେମୁଣ୍ଡି ବଡ଼ଦାଣ୍ଡରେ ପ୍ରସାସନ ପକ୍ଷରୁ ରବିବାର ରାହାଗିରି ଅନୁଷ୍ଠିତ ହୋଇଯାଇଛି। ଆଜି ରାହାଗିରି ପାଇଁ ପୌରପାଳିକା ତରଫରୁ ସମସ୍ତ ଉଠାଦୋକାନୀ, ଯାନବାହନ ଚଳାଚଳ ସମ୍ପୂର୍ଣ୍ଣ ବନ୍ଦ ରହିଛି। ରାହାଗିରି ପାଇଁ ପାରଳାଖେମୁଣ୍ଡି ସହରବାସୀ ବେଶ୍ ଉତ୍ସାହର ସହ ଅପେକ୍ଷା କରିଥାନ୍ତି। ରାହାଗିରିରେ ସମସ୍ତ ପାରମ୍ପରିକ କଳା ସହ ଆଧୁନିକ କଳା ମଧ୍ୟ ଦେଖିବାକୁ ମିଳିଛି। ଗଜପତି ଜିଲାର ପାଇକ ଆଖଡ଼ା,ଗଜମୁହା ନୃତ୍ୟ, ଟାଇକୋଣ୍ଡୋ, ସ୍କେଟିଂ, ଆଦିବାସୀ ନୃତ୍ୟ, ଝୋଟି, ଚିତ୍ରାଙ୍କନ, ଗୀତ, ଆଧୁନିକ ନୃତ୍ୟ ସମସ୍ତ ପ୍ରକାର ମନୋରଞ୍ଜନ ଏହି ରାହଗିରିରେ ଦେଖିବାକୁ ମିଳିଥିଲେ। ଏହି ଉତ୍ସବରେ ସବୁ ବର୍ଗର ଲୋକେ ସମସ୍ତେ ଅନ୍ୟମାନଙ୍କ ଠାରୁ କିଛି ଅଲଗା ପ୍ରଦର୍ଶନ କରିବା ପ୍ରୟାସ ଦେଖିବାକୁ ମିଳିଥିଲା। ଦର୍ଶକମାନେ ମଧ୍ୟ ମନୋରଞ୍ଜନ କାର୍ଯ୍ୟକ୍ରମ ଦେଖି ବେଶ୍ ଝୁମିଥିଲେ।
ଶେଷରେ ପ୍ରଶାସନିକ ଅଧିକାରୀମାନେ ଆଦିବାସୀ ନୃତ୍ୟରେ ବିମୋହିତ ହୋଇ ଆଦିବାସୀଙ୍କ ତାଳେ ତାଳେ ନାଚିବାର ଦେଖିବାକୁ ମିଳିଥିଲା। ଆସନ୍ତା ୧୮ ତାରିଖରେ ହେବାକୁ ଥିବା ଜିଲାସ୍ତରୀୟ ମହୋତ୍ସବକୁ ଯେମିତି ସମସ୍ତେ ଭରପୂର ଉପଭୋଗ କରିବା ସହ ସମସ୍ତେ ଯୋଗ ଦେବା ପାଇଁ ପ୍ରଶାସନିକ ଅଧିକାରୀ ଓ ସ୍ଥାନୀୟ ବିଧାୟକ ନିବେଦନ କରିଛନ୍ତି।
