ବିଂଶ ଶତାବ୍ଦୀ ପରେ ମଧ୍ୟ ଆମ ଦେଶରେ ଏମିତି କିଛି ସ୍ଥାନ ଅଛି, ଯେଉଁଠି ଆଜି ବି ଅନ୍ଧବିଶ୍ୱାସକୁ ଲୋକେ ସମ୍ପୂର୍ଣ୍ଣ ଜାବୁଡ଼ି ଧରିଛନ୍ତି। ଏମିତି ଏକ ଘଟଣା ଦେଖିବାକୁ ମିଳିଛି ମଧ୍ୟପ୍ରଦେଶର ଛିନ୍ଦଓ୍ବାଡାରେ। ଏଠାକାର ଜଣେ ଯୁବତୀ ସ୍ବପ୍ନରେ ନାଗସାପ ଦେଖିଥିଲେ। ପରେ ସେ ନାଗଦେବତାଙ୍କୁ ବିବାହ କରିବା ସହ ନିଜେ ନାଗିନ୍ ହେବାକୁ ଚାହୁଁଛନ୍ତି।
ଛିନ୍ଦଓ୍ବାଡା ଜିଲାର ପରାସିୟା ତହସିଲର ଏକ ଗାଁରେ ରହୁଥିବା ଯୁବତୀ ସ୍ବପ୍ନରେ ନାଗସାପ ଦେଖିଥିଲେ। ଏହା ପରେ ତାଙ୍କ ଆଦେଶ ଅନୁଯାୟୀ, ସେ ନାଗସାପକୁ ବିବାହ କରିବା ପାଇଁ ମନ୍ଦିରରେ ପହଞ୍ଚିଥିଲେ। ସେଠାରେ ସେ ନାଗିନ୍ ବା ନାଗୁଣୀ ପରି ନାଚିବାକୁ ଲାଗିଲେ। ଅନ୍ଧବିଶ୍ୱାସର ଏହି ଖେଳ ଦେଖିବାକୁ ଶହଶହ ସଂଖ୍ୟାରେ ଲୋକେ ଏକଜୁଟ୍ ହୋଇଥିଲେ। ଯୁବତୀ ଯେତେବେଳେ ଗ୍ରାମବାସୀଙ୍କୁ କହିଲେ, ତାଙ୍କୁ ନାଗ ସହ ବିବାହ କରନ୍ତୁ। ସେତେବେଳେ ଗ୍ରାମବାସୀ ଆଶ୍ଚର୍ଯ୍ୟ ହୋଇଯାଇଥିଲେ। ଯୁବତୀ ଜଣକ କହିଥିଲେ, ତାଙ୍କୁ ବିବାହ କରିବା ପାଇଁ ଖୋଦ୍ ନାଗ ଦେବତା ଆସିବେ। ଏହା କହିବା ପରେ ଗ୍ରାମବାସୀ ଚାହିଁ ରହିଥିଲେ କେତେବେଳେ ନାଗଦେବତା ଆସିବେ ଆଉ ଏହି ଯୁବତୀଙ୍କୁ ବିବାହ କରିବେ। ମାତ୍ର ତାହା ହେଲା ନାହିଁ। କିନ୍ତୁ ଯୁବତୀ ଜଣକ ଜିଦ୍ ଧରିଲେ ସେ ନାଗଦେବତାଙ୍କୁ ବିବାହ କରିବେ। ଶେଷରେ ତାହା ହିଁ ହେଲା। ଯୁବତୀ ନାଗ ମନ୍ଦିର ସମ୍ମୁଖରେ କନ୍ୟା ବେଶରେ ସଜ୍ଜିତ ହୋଇ ନିଆଁ ଚାରିପାଖରେ ସାତଫେରା ନେଇ ନାଗକୁ ସ୍ବାମୀ ଭାବରେ ବରଣ କରିଥିଲେ।
ଯୁବତୀ ଜଣକ ଆହୁରି ମଧ୍ୟ କହିଛନ୍ତି, ଛୋଟବେଳୁ ମୋ’ ପରିବାର ମୋତେ ଧ୍ୟାନ ଦିଅନ୍ତି ନାହିଁ। ତେଣୁ ନାଗଦେବତାଙ୍କୁ ବିବାହ କଲି। ଏହି ସମସ୍ତ ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓ ଯୁବତୀଙ୍କୁ ଜଣେ ମହିଳା ଧରି ଠିଆ ହୋଇଛନ୍ତି। ଏହା ପରେ ଯୁବତୀ ଜଣକ ନାଗୁଣୀ ପରି ଧୀରେ ଧୀରେ ନାଚୁଛନ୍ତି।
