ଭୁବନେଶ୍ୱର, ୧ା୧୦ (ବ୍ୟୁରୋ):ରାଜ୍ୟରେ କରୋନା ପରିସ୍ଥିତି ମେ’ ପର୍ଯ୍ୟନ୍ତ ଠିକ୍ଠାକ୍ ଚାଲିଥିଲା। ହେଲେ ରାଜ୍ୟ ସରକାର ପ୍ରବାସୀ ଓଡ଼ିଆଙ୍କୁ ଆଣି ଭୁଲ୍ କଲେ। ବିଭିନ୍ନ ଷ୍ଟେଶନରେ ସେମାନେ ଓହ୍ଲାଇବା ଫଳରେ ରାଜ୍ୟ ସାରା ସଂକ୍ରମଣ ବ୍ୟାପିଲା। ଗଞ୍ଜାମ ଓ ଖୋର୍ଦ୍ଧା ଜିଲା ବିଶେଷକରି ଭୁବନେଶ୍ୱରରେ ଏବେ ସେଥିପାଇଁ ପରିସ୍ଥିତି ଭୟଙ୍କର ହୋଇଛି ବୋଲି କଂଗ୍ରେସ ବିଧାୟକ ସୁରେଶ କୁମାର ରାଉତରାୟ ବିଧାନସଭାରେ କହିଛନ୍ତି। ରାଜ୍ୟ ସରକାର ପ୍ରବାସୀଙ୍କୁ ଡାକି କୋଭିଡ୍କୁ ନିମନ୍ତ୍ରଣ କରିଛନ୍ତି। ଭୁବନେଶ୍ୱର, ଜଟଣୀ ଓ ଆଖପାଖରେ ପ୍ରତିଦିନ ଏବେ ୨୦୦ ଲୋକ ଜୀବନ ହରାଉଛନ୍ତି। ଡାକ୍ତରମାନେ ରୋଗୀଙ୍କୁ ଛୁଁ ନାହାନ୍ତି। କୋଭିଡ୍ ରୋଗୀଙ୍କର ଯେତିକି ମୃତ୍ୟୁ ହେଉନି, ସେତିକି ସାଧାରଣ ରୋଗୀଙ୍କର ମୃତ୍ୟୁ ଘଟୁଛି। ଏଭଳିସ୍ଥିତିରେ ମୁଖ୍ୟମନ୍ତ୍ରୀ ଘରୁ ବାହାରି ପରିସ୍ଥିତିକୁ ନିଜେ ଦେଖନ୍ତୁ ବୋଲି ସେ କହିଥିଲେ।
କୋଭିଡ୍ ସେଣ୍ଟରରେ ମହିଳାଙ୍କୁ ଦୁର୍ବ୍ୟବହାର ପ୍ରସଙ୍ଗ ଉଠାଇଲେ ନରସିଂହ
କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ବୁଧବାର ବିଧାନସଭାରେ ବଲାଙ୍ଗୀର ସହରର ଏକ କୋଭିଡ୍ ସେଣ୍ଟରରେ ମହିଳାଙ୍କୁ ଦୁର୍ବ୍ୟବହାର ପ୍ରସଙ୍ଗ ଉଠାଇଥିଲେ। ଏହାର ତଦନ୍ତ ସହ ଦୋଷୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଥିଲେ। ଉକ୍ତ କୋଭିଡ୍ ସେଣ୍ଟରରେ ଠିକାରେ ନିଯୁକ୍ତ ହୋଇଥିବା ଆୟୁର୍ବେଦିକ୍ ଡାକ୍ତର ରାତି ୧୨ଟାରେ ଜଣେ ମହିଳା କୋଭିଡ୍ ରୋଗୀଙ୍କ ବେଡ୍ ନିକଟକୁ ଯାଇ ତାଙ୍କୁ ଦୁର୍ବ୍ୟବହାର କରିଥିଲେ। ଅଭିଯୋଗ ସତ୍ତ୍ୱେ ପୋଲିସ ସମ୍ପୃକ୍ତ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉନାହିଁ। ଓଲଟା ଡାକ୍ତରଙ୍କୁ ବଞ୍ଚାଇବାକୁ ପ୍ରଚେଷ୍ଟା କରାଯାଉଥିବା ସେ କହିଥିଲେ।
ରାଜ୍ୟରେ ୧୬.୫ ଲକ୍ଷ ବେକାରି
ରାଜ୍ୟ ସରକାରଙ୍କ ଦୂରଦୃଷ୍ଟି ଅଭାବରୁ ରାଜ୍ୟରେ ବେକାରି ସମସ୍ୟା ବଢୁଛି। ରହିଥିବା ସୁଯୋଗକୁ ସରକାର ତା’ର ଉପଯୋଗ କରିପାରୁନାହାନ୍ତି। ରାଜ୍ୟରେ କେତେ ବେକାରି ଅଛନ୍ତି ତା’ର ତଥ୍ୟ ମଧ୍ୟ ନାହିଁ। ମୁଖ୍ୟମନ୍ତ୍ରୀ ୧୦ ଲକ୍ଷ କହୁଥିବାବେଳେ ମୁଖ୍ୟ ଶାସନ ସଚିବ ୧୨ ଲକ୍ଷ କହୁଛନ୍ତି। ମାତ୍ର ବାସ୍ତବରେ ଓଡ଼ିଶାରେ ୧୬.୫ ଲକ୍ଷ ବେକାରି ଯୁବତୀ, ଯୁବକ ଅଛନ୍ତି ବୋଲି ବିରୋଧୀ ଦଳ ନେତା ପ୍ରଦୀପ୍ତ ନାଏକ କହିଛନ୍ତି। ଛୋଟ ଛୋଟ ସାମଗ୍ରୀ ପାଇଁ ଆମକୁ ଅନ୍ୟ ରାଜ୍ୟ ଉପରେ ନିର୍ଭର କରିବାକୁ ପଡ଼ୁଛି। ବିଭିନ୍ନ ଛୋଟ ବଡ଼ ଫ୍ୟାକ୍ଟ୍ରି ପ୍ରତିଷ୍ଠା ଦ୍ୱାରା ବହୁ ସଂଖ୍ୟାରେ କର୍ମନିଯୁକ୍ତି ସୃଷ୍ଟି କରାଯାଇପାରନ୍ତା। ମାତ୍ର ସରକାରଙ୍କର ଅପାରଗତା ଯୋଗୁ ଆଜି ଓଡ଼ିଶାର ଲୋକେ ବାହାରକୁ ଦାଦନ ଖଟିବାକୁ ଯାଉଛନ୍ତି। ସେହିଭଳି ଏଠାରେ ରହିଥିବା ଶିଳ୍ପାନୁଷ୍ଠାନରେ ଓଡ଼ିଆଙ୍କୁ ନିଯୁକ୍ତି ଦିଆଯାଉନି। ୮୦ ପ୍ରତିଶତ ସ୍ଥାନୀୟ ଲୋକ ନିଯୁକ୍ତି ପାଇବାର ବ୍ୟବସ୍ଥା ଥିଲେ ମଧ୍ୟ ଓଡ଼ିଶାରେ ଏହାକୁ ପାଳନ କରାଯାଉ ନ ଥିବା ସେ କହିଥିଲେ।
