ଛତ୍ରପୁର,୩ା୯(ଦିଲ୍ଲୀପ ସାମଲ /ସନ୍ତୋଷ ପାଢ଼ୀ): ଗଞ୍ଜାମ ପୋଲିସ ଜିଲା ପକ୍ଷରୁ ସମୁଦ୍ରତଟ ସୁରକ୍ଷା ନେଇ ୨ଦିନିଆ ସାଗର କବଚ ସମରାଭ୍ୟାସ ଚାଲିଛି। ସମୁଦ୍ର ନିକଟ ଥାନା ଆର୍ଯ୍ୟପଲ୍ଲୀ, ଗଞ୍ଜାମ, ଛତ୍ରପୁର, ରମ୍ଭା, ଚମାଖଣ୍ଡି ପୋଲିସ ପକ୍ଷରୁ ଏହି ସମରାଭ୍ୟାସ କରାଯାଉଛି। ଜଳପଥ କିମ୍ବା ସ୍ଥଳପଥ ଯେଉଁବାଟ ଦେଇ ଶତ୍ରୁପକ୍ଷ ଆସିଲେ କିଭଳି କଡା ଜବାବ ଦିଆଯିବ ସେ ନେଇ ଅଭ୍ୟାସ କରାଯାଉଛି। ଗଞ୍ଜାମ ପୋଲିସ ଜିଲା ଆର୍ଯ୍ୟପଲ୍ଲୀ ମେରାଇନ ଥାନା ଅଧୀନରେ ପ୍ରୟାଗୀଠାରୁ ହରିପୁର ଦୀର୍ଘ ୪୦ କିମି ପର୍ଯ୍ୟନ୍ତ ପାଟ୍ରୋଲିଂ କରିଥାନ୍ତି। ଏହି ସମରାଭ୍ୟାସରେ ପୋଲିସ, ମତ୍ସ୍ୟ ବିଭାଗ, ଅଗ୍ନିଶମ ବିଭାଗ, ସ୍ବାସ୍ଥ୍ୟ ବିଭାଗ, କୋଷ୍ଟଗାର୍ଡ ସାମିଲ ହୋଇଥିଲେ। ପ୍ରତ୍ୟେକ ସ୍ଥାନରେ କଡାକଡି ଯାଞ୍ଚ କରାଯାଉଛି। ଏଥିପାଇଁ ବ୍ଲୁ ଓ ରେଡ ୨ଟି ଟିମ ଗଠନ ହୋଇଛି। ବ୍ଲୁ ଟିମର ନେତୃତ୍ୱ ନେଉଥିଲେ ଛତ୍ରପୁର ଏସ୍ଡିପିଓ ଚନ୍ଦନ ଘଡେଇ। ଏହି ଟିମ ଜଳପଥରେ ପାଟ୍ରୋଲିଂ କରିବା ବେଳେ ଏକ ବୋଟ ଯୋଗେ ଯାଉଥିବା ୪ଜଣ ଡମି ଆତଙ୍କବାଦୀଙ୍କୁ ଧରିଥିଲା। ସାଗର କବଚ-୨ କାର୍ଯ୍ୟକ୍ରମ ଗୁରୁବାର ଶେଷ ହେବ ବୋଲି ମେରାଇନ ଥାନା ଅଧିକାରୀ ବିଦ୍ୟାଭାରତୀ ନାୟକ କହିଛନ୍ତି। ସେହିପରି ବିଭିନ୍ନ ଛକରେ ମଧ୍ୟ ପୋଲିସ ଗାଡିମୋଟର ଯାଞ୍ଚ କରୁଛି। ମତ୍ସ୍ୟଜୀବୀମାନଙ୍କୁ ମଧ୍ୟ ସଚେତନ କରାଯାଉଛି। କେହି ଅପରିଚିତ ବ୍ୟକ୍ତି ଆସିଲେ ତୁରନ୍ତ ପୋଲିସକୁ ଅଗବତ କରାଇବା ପାଇଁ କୁହାଯାଇଛି।
