ଅମରପାଲି,୧୩ା୧୧(ପୀତାମ୍ବର ସାହୁ):ପେଶାରେ ଜଣେ ଶିକ୍ଷକ, ହେଲେ ନିଶା ତାଙ୍କର ସଙ୍ଗୀତ। ଶ୍ରେଣୀଗୃହରେ ପିଲାଙ୍କୁ ଶିକ୍ଷାଦାନ କରୁଥିବାବେଳେ ମଞ୍ଚରେ ସେ ପାଲଟି ଯାଆନ୍ତି ଜଣେ ସୁନ୍ଦର କଣ୍ଠଶିଳ୍ପୀ ଓ ଲୋକକଳାର ସାଧକ। ନିଜର ପ୍ରତିଭା, ନିଷ୍ଠା ଓ ସାଧନା ବଳରେ ପଶ୍ଚିମ ଓଡ଼ିଶାର ସଙ୍ଗୀତ ଜଗତରେ ଏକ ପରିଚିତ ନାମ ମଦନ ସୁନ୍ଦର ଭୋଇ (୩୬) ହୋଇପାରିଛନ୍ତି। ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ କେନଝିରିଆପାଲି ଗ୍ରାମର ମଦନ ୨୦୧୧ରୁ ଶିକ୍ଷକତା ଆରମ୍ଭ କରିଥିଲେ। ବର୍ତ୍ତମାନ ସେ ଘିଚାପାଲି ସରକାରୀ ୟୁପି ସ୍କୁଲରେ ଶିକ୍ଷକ ଭାବେ କାର୍ଯ୍ୟରତ। ପିଲାଙ୍କୁ ପାଠ ପଢ଼ାଇବା ସହ ସଙ୍ଗୀତ ସାଧନାକୁ ମଧ୍ୟ ସେ ସମାନ ଗୁରୁତ୍ୱ ଦେଇଆସୁଛନ୍ତି। ତାଙ୍କ ସ୍ତ୍ରୀ ସୁକାନ୍ତି ଜଗଦଲା ଜଣେ ଗୃହିଣୀ। ୨ ଯାଅଁାଳା ଝିଅ ସିଦ୍ଧି ବୈଷ୍ଣବୀ ଓ ଶକ୍ତି ବୈଷ୍ଣବୀଙ୍କୁ ନେଇ ତାଙ୍କ ପରିବାର। ମଦନଙ୍କ ସଙ୍ଗୀତ ପ୍ରତି ଆକର୍ଷଣ ପଛରେ ରହିଛି ଏକ ସୁନ୍ଦର ପାରିବାରିକ ପ୍ରେରଣା। ତାଙ୍କ ସ୍ବର୍ଗତ ପିତା ମହେନ୍ଦ୍ର ଭୋଇ ଜଣେ ସଙ୍କୀର୍ତ୍ତନ ଗାୟକ ଥିଲେ। ପିଲାଦିନେ ବାପାଙ୍କ ମୁହଁରୁ ସଙ୍କୀର୍ତ୍ତନ ଶୁଣିବା ସହ ଅଞ୍ଚଳର ବିଭିନ୍ନ ଗ୍ରାମରେ ଆୟୋଜିତ ନାମଯଜ୍ଞକୁ ତାଙ୍କ ସହ ଯାଇ ସଙ୍କୀର୍ତ୍ତନ ଦେଖିବାର ସୁଯୋଗ ପାଉଥିଲେ। ଏହି ପରିବେଶ ତାଙ୍କ ମନରେ ସଙ୍ଗୀତ ପ୍ରତି ଗଭୀର ଆଗ୍ରହ ସୃଷ୍ଟି କରିଥିଲା। ବାପା ମହେନ୍ଦ୍ର ହିଁ ଥିଲେ ତାଙ୍କର ପ୍ରଥମ ସଙ୍ଗୀତ ଗୁରୁ। ସେ ତୃତୀୟ ଶ୍ରେଣୀରେ ପଢ଼ୁଥିବା ସମୟରେ ଗଁା ସ୍କୁଲରେ ଆୟୋଜିତ ସଙ୍ଗୀତ ପ୍ରତିଯୋଗିତାରେ ଭାଗନେଇ ପ୍ରଥମ ସ୍ଥାନ ହାସଲ କରିଥିଲେ। ଏହି ସଫଳତା ତାଙ୍କ ମନରେ ସଙ୍ଗୀତ ପ୍ରତି ଆଗ୍ରହକୁ ଆହୁରି ବଢ଼ାଇ ଦେଇଥିଲା। ପରବର୍ତ୍ତୀ ସମୟରେ ସ୍କୁଲ, କଲେଜ, ପ୍ରଶିକ୍ଷଣ କେନ୍ଦ୍ର ଏବଂ ଶିକ୍ଷକତା ସମୟରେ ବିଭିନ୍ନ ତାଲିମ କାର୍ଯ୍ୟକ୍ରମରେ ତାଙ୍କ ସଙ୍ଗୀତ ପରିବେଷଣକୁ ସହପାଠୀ ଓ ସହକର୍ମୀମାନେ ବେଶ ପସନ୍ଦ କରିବା ସହ ଉତ୍ସାହିତ କରିଥିଲେ। ସଙ୍ଗୀତ ପ୍ରତି ଏହି ଆଗ୍ରହକୁ ନେଇ ମଦନ ‘ଭୀମଭୋଇ କଳା ନିକେତନ’ ନାମକ ଏକ ଲୋକନୃତ୍ୟ ଦଳ ଗଢ଼ିଛନ୍ତି। ଏହି ଦଳରେ ପ୍ରାୟ ୨୦ ଜଣ କଳାକାର ରହିଛନ୍ତି। ଦଳ ମାଧ୍ୟମରେ ସେ ନିଜେ ରୋଜଗାର କରିବା ସହ ଅନ୍ୟ କଳାକାରମାନଙ୍କୁ ମଧ୍ୟ ଜୀବିକା ନିର୍ବାହର ସୁଯୋଗ ଯୋଗାଇ ଦେଇପାରିଛନ୍ତି। ଏହି ଦଳକୁ ନେଇ ରାଜ୍ୟର ବିଭିନ୍ନ ସ୍ଥାନ ସମେତ ରାଜ୍ୟ ବାହାରକୁ ଯାଇ ପଶ୍ଚିମ ଓଡ଼ିଶାର ଲୋକଗୀତ ଓ ଲୋକନୃତ୍ୟର ପ୍ରଚାର ପ୍ରସାର କରୁଛନ୍ତି। ସୁବର୍ଣ୍ଣପୁର ଜିଲା ସମେତ ସମ୍ବଲପୁର, ଦେବଗଡ଼, ବଲାଙ୍ଗୀର, ବରଗଡ଼, ବୌଦ୍ଧ, ଖୋର୍ଦ୍ଧା, ଭୁବନେଶ୍ୱର, ସୁନ୍ଦରଗଡ଼ ଓ କୋରାପୁଟ ଆଦି ଅଞ୍ଚଳରେ ସେ ସଙ୍ଗୀତ ପରିବେଷଣ କରି ଦର୍ଶକଙ୍କ ପ୍ରଶଂସା ସାଉଁଟିଛନ୍ତି। ଏଥିସହ ସଙ୍ଗୀତ ଓ ଲୋକନୃତ୍ୟ ପରିବେଷଣ କରି ସେ ବିଭିନ୍ନ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ ହୋଇଛନ୍ତି। କେବଳ ମଞ୍ଚରେ ସଙ୍ଗୀତ ପରିବେଷଣ ନୁହେଁ, ସଙ୍ଗୀତ ରଚନା ଓ ନିର୍ଦ୍ଦେଶନା କ୍ଷେତ୍ରରେ ମଧ୍ୟ ତାଙ୍କର ରୁଚି ରହିଛି। ସମ୍ବଲପୁରୀ ଓ କୋଶଳୀ ଭାଷାରେ ୧୦ରୁ ଅଧିକ ଗୀତରେ ସେ କଣ୍ଠଦାନ କରିଛନ୍ତି। ତାଙ୍କର ଲୋକପ୍ରିୟ ଗୀତ ମଧ୍ୟରେ ‘ନୂଆଁଖାଇ ତିହାର’, ‘ମହିଷା ମର୍ଦ୍ଦିନୀ’, ‘୫୦୫ ଦେଇ ଦେଲାନ’, ‘ସେଟିଙ୍ଗ ହେବୁ’ ଓ ‘ଚିକିନି ଗାଲି’ ଆଦି ରହିଛି। ନିଜର ସଙ୍ଗୀତ ସାଧନା ସହ ନୂଆ ପିଢ଼ିକୁ ଲୋକକଳା ଓ ସଙ୍ଗୀତ ପ୍ରତି ଆକୃଷ୍ଟ କରିବା ମଧ୍ୟ ମଦନଙ୍କ ଅନ୍ୟତମ ଲକ୍ଷ୍ୟ। ଏଥିପାଇଁ ସେ ଅଞ୍ଚଳର ଛୋଟ ଛୋଟ ପିଲାଙ୍କୁ ବିନା ପାରିଶ୍ରମିକରେ ସଙ୍ଗୀତ ଶିକ୍ଷା ପ୍ରଦାନ କରୁଛନ୍ତି। ଜଣେ ଶିକ୍ଷକ ଭାବେ ଶିକ୍ଷାଦାନ ଓ ଜଣେ କଳାକାର ଭାବେ ଲୋକକଳାର ସୁରକ୍ଷା ତଥା ପ୍ରଚାର ପ୍ରସାରରେ ତାଙ୍କର ଏହି ଉଦ୍ୟମ ନିଶ୍ଚିତ ଭାବେ ପ୍ରଶଂସନୀୟ।
Dharitri – Odisha’s No.1 Odia Daily
