ଦିଗପହଣ୍ଡି,୩୦।୪(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଳକ କାର୍ଯ୍ୟାଳୟକୁ ଜିଲାପାଳ ବିଜୟ ଅମୃତା କୁଲାଙ୍ଗେ ଶୁକ୍ରବାର ଗସ୍ତ କରିଥିଲେ। ଏହି ଅବସରରେ ସେ ସ୍ଥାନୀୟ ବ୍ଲକ କାର୍ଯ୍ୟାଳୟ ସମ୍ମୁଖରେ ବିଭିନ୍ନ ପଞ୍ଚାୟତରୁ ଆସିଥିବା ନିର୍ବାଚିତ ଜନପ୍ରତିନିଧିଙ୍କ ସହ କରୋନା ମୁକାବିଲା ନେଇ ସବିଶେଷ ଆଲୋଚନା କରିଥିଲେ। ମହାମାରୀ କରୋନାର ମୁକାବିଲା କରିବାରେ ଗତ ଥର ଯେପରି ସରପଞ୍ଚ ମାନେ କାର୍ଯ୍ୟ କରିଥିଲେ ସେହିପରି ଏଥର ମଧ୍ୟ ସମ୍ପୂର୍ଣ୍ଣ ଦାୟିତ୍ୱ ବହନ କରିବାକୁ ଉପସ୍ଥିତ ଜନପ୍ରତିନିଧିମାନଙ୍କୁ ନିବେଦନ କରିଥିଲେ। ଚଳିତଥରର ସ୍ଲୋଗାନ ଆମ ଗାଁ ଆମ ସହର ଏବଂ ଆମ ୱାର୍ଡ ଆମ ଦାୟିତ୍ୱ ବୋଲି ସେ କହିବା ସହ ସେହି ଅନୁସାରେ କରୋନା ମୁକାବିଲା ନେଇ ସମସ୍ତ ସୂଚନା ପଞ୍ଚାୟତ ପ୍ରତିନିଧିମାନଙ୍କ ନିକଟରେ ରହିବା ଆବଶ୍ୟକ ବୋଲି ଜିଲାପାଳ କହିଥିଲେ।
ଏହି ଗସ୍ତ କାଳରେ ଜିଲାପାଳ ଉପସ୍ଥିତ ତହସିଲଦାର ଅଦୈତ କୁମାର ସ୍ବାଇଁ, ବିଡିଓ ହଳଧର ଶବର, ଥାନା ଆଇଆଇସି ବସନ୍ତ କୁମାର ସେଠୀ, ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ପ୍ରଫୁଲ୍ଲ ଚନ୍ଦ୍ର ଡାକୁଆ ଏବଂ ସିଡିପିଓ ପୁଷ୍ପାଞ୍ଜଳି ଶତପଥୀ ପ୍ରମୁଖ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ। ସେମାନଙ୍କଠାରୁ ଜିଲାପାଳ ଦିଗପହଣ୍ଡି ଅଞ୍ଚଳରେ କୋଭିଡ୍ର ସ୍ଥିତି ନେଇ ପଚାରି ବୁଝିବା ସହ ସମଗ୍ର ଅଞ୍ଚଳକୁ ଗ୍ରୀନ ଜୋନରେ ପରିଣତ କରିବା ପାଇଁ ସମସ୍ତ ପ୍ରକାର ପଦକ୍ଷେପ ନେବାକୁ ପରାମର୍ଶ ଦେଇଥିଲେ। ସହର ଓ ଗ୍ରାମାଞ୍ଚଳକୁ ଆସୁଥିବା ପ୍ରବାସୀଙ୍କ ସମ୍ପର୍କରେ ଟିକି ନିଖି ଖବର ରଖିବା ସହ ସେମାନଙ୍କୁ ସଙ୍ଗରୋଧରେ ରହିବା ପାଇଁ ବ୍ୟାପକ ପଦକ୍ଷେପ ନେବା ଉଚିତ ବୋଲି ସେ ମତପ୍ରକାଶ କରିଥିଲେ। କୋଭିଡ୍ ମନିଟର, କ୍ଷେତ୍ର କର୍ମଚାରୀ ଏବଂ ପଞ୍ଚାୟତ ପ୍ରତିନିଧିମାନଙ୍କ ମଧ୍ୟରେ ସମନ୍ବୟ ରଖି ସ୍ଥାନୀୟ ବ୍ଳକ ଓ ତହସିଲ ପ୍ରଶାସନ ପକ୍ଷରୁ ସମସ୍ତ ପ୍ରକାର ମନିଟରିଂ କରାଯିବା ଉପରେ ସେ ଗୁରୁତ୍ୱାରୋପ କରିଥିଲେ। ପାନୀୟ ଜଳ ଓ ବିଦ୍ୟୁତ୍ ଯୋଗାଣ କ୍ଷେତ୍ରରେ ଯେପରି କୌଣସି ସମସ୍ୟା ସୃଷ୍ଟି ନ ହୁଏ ସେଥିପାଇଁ ସମ୍ପୃକ୍ତ ବିଭାଗ ସତର୍କ ରହିବାକୁ ଜିଲାପାଳ କହିଥିଲେ।
