ପାରଳାଖେମୁଣ୍ଡି,୧ା୮(ଗିରିଧାରୀ ପରିଚ୍ଛା):ଗଜପତି ଜିଲାର ଝିଅ ସ୍ବାଗତିକା ପାଣିଗ୍ରାହୀ ଜିଲା ଓ ରାଜ୍ୟ ପାଇଁ ଗୌରବ ଆଣିଛନ୍ତି। ଆନ୍ତର୍ଜାତିକ ସ୍ତରରେ ‘ମିସେସ୍ ଏସିଆ ୱାଲର୍ଡ-୨୦୨୬’ରେ ସ୍ବାଗତିକା ସଫଳତା ସାଉଁଟିଛନ୍ତି। ଥାଇଲାଣ୍ଡରେ ଆୟୋଜିତ ଏହି ପ୍ରତିଯୋଗିତାରେ ସେ ନିଜ ପ୍ରତିଭାର ପରିଚୟ ଦେଇଛନ୍ତି। ପାରଳାଖେମୁଣ୍ଡି ଚିତ୍ରକାର ସାହିର ବାସିନ୍ଦା ଭାସ୍କର ପାଣିଗ୍ରାହୀଙ୍କ ଝିଅ ସ୍ବାଗତିକା ମୁମ୍ବାଇ ଗ୍ଲୋବାଲ ପକ୍ଷରୁ ଆୟୋଜିତ ଏହି ପ୍ରତିଯୋଗିତାରେ ଓଡ଼ିଶାର ଏକମାତ୍ର ପ୍ରତିନିଧି ଭାବେ ଭାଗ ନେଇଥିଲେ। ବୁଧବାର ବିଜୟୀ ହେବା ପରେ ବଲିଉଡ୍ର ଅଭିନେତା ସୁରିନ୍ଦର ପାଲ ସିଂହ ତାଙ୍କୁ ‘ମିସେସ୍ ଏସିଆ ୱାଲର୍ଡ ୨୦୨୬’ ସମ୍ମାନରେ ସମ୍ମାନିତ କରିଥିଲେ। ଏହାପୂର୍ବରୁ ସ୍ବାଗତିକା ୨୦୨୫ରେ ‘ମିସେସ୍ ଇଣ୍ଡିଆ ପ୍ରାଇଡ୍ ଅଫ୍ ନେଶନ’ ପ୍ରତିଯୋଗିତାରେ ‘ଗୁଡ୍ ୱିଲ ଆମ୍ବାସାଡର’ ସମ୍ମାନ ହାସଲ କରି ଏସିଆ ମଞ୍ଚରେ ପ୍ରବେଶ କରିଥିଲେ। ଇଞ୍ଜିନିୟରିଂରେ ଡିଗ୍ରୀ ହାସଲ ପରେ ରୁର୍କିରେ ଉଚ୍ଚଶିକ୍ଷା ଶେଷ କରି ବର୍ତ୍ତମାନ ସେ ବେଙ୍ଗାଲୁରୁସ୍ଥିତ ଏକ ବହୁରାଷ୍ଟ୍ରୀୟ ଅଟୋମୋବାଇଲ କମ୍ପାନୀରେ ଆସୋସିଏଟ୍ ଟେକ୍ନିକାଲ ପ୍ରୋଜେକ୍ଟ ମ୍ୟାନେଜର ଭାବେ କାର୍ଯ୍ୟରତ ଅଛନ୍ତି। ବୃତ୍ତିଗତ ସଫଳତା ସହ ସେ ସମାଜସେବା କ୍ଷେତ୍ରରେ ମଧ୍ୟ ସକ୍ରିୟ ରହିଛନ୍ତି। ସ୍ବାଗତିକାଙ୍କ ଏହି ସଫଳତାକୁ ନେଇ ଗଜପତି ଜିଲାରେ ଖୁସିର ଲହରି ଖେଳିଯାଇଛି। ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛା ମିଳିବାରେ ଲାଗିଛି।
Dharitri – Odisha’s No.1 Odia Daily
