କେନ୍ଦ୍ରାପଡ଼ା ଅଫିସ,୩୦।୧୦: କରୋନା ସଂକ୍ରମଣ ଭୟ ଚଳିତବର୍ଷ କେନ୍ଦ୍ରାପଡ଼ା ଜିଲାର ଗଣପର୍ବ ମା’ ଗଜଲକ୍ଷ୍ମୀଙ୍କ ପୂଜାକୁ ଫିକା ପକାଇବ। କୋଭିଡ୍ ୧୯ର ସମସ୍ତ ନିୟମ ପାଳନ ହେବ ବୋଲି ପ୍ରଶାସନ ପକ୍ଷରୁ ପ୍ରସ୍ତୁତି ଚାଲିଥିବାରୁ ସ୍ଥାନୀୟ ବ୍ୟବସାୟୀ ଚିନ୍ତାରେ ଅଛନ୍ତି। ଏଥିପ୍ରତି ଲାଗିଥିବା ରୋକ୍କୁ ନେଇ ଶ୍ରଦ୍ଧାଳୁ ଅସନ୍ତୋଷ ବ୍ୟକ୍ତ କରିଛନ୍ତି। ଅପରପକ୍ଷେ ଆଉ ଦୁଇଦିନ ପରେ ମା’ଙ୍କ ପୂଜା ଆରମ୍ଭ ହେବାକୁ ଥିବାବେଳେ କୌଣସି ମଣ୍ଡପରେ ତୋରଣ ନାହିଁ।ମା’ଙ୍କ ମୃଣ୍ମୟୀ ମୂର୍ତ୍ତି ୪ ଫୁଟ ଉଚ୍ଚତା ରଖିବା ସର୍ତ୍ତରେ ଜିଲା ପ୍ରଶାସନ ପକ୍ଷରୁ ଜିଲାରେ ମୋଟ ୨୧୧ ପୂଜା କମିଟିକୁ ଅନୁମତି ଦିଆଯାଇଛି।
ସହରର ଉପେନ୍ଦ୍ର ବେହେରା କୁହନ୍ତି, ମା’ଙ୍କ ଏହି ଗଣପୂଜାକୁ ଜିଲାବାସୀ ଚାତକ ପରି ଚାହିଁଥାନ୍ତି। ଜିଲାରେ ଅର୍ଥନୈତିକ ଭିତ୍ତିଭୂମି କୃଷିଭିତ୍ତିକ। ଏଠାରେ ଶିଳ୍ପ ନ ଥିବାରୁ ଯୁବବର୍ଗ ବାହାରକୁ ଯାଇ ପରିବାର ପ୍ରତିପୋଷଣ କରିଥାନ୍ତି। ତେବେ ମା’ଙ୍କ ପୂଜା ସମୟ ଆସିଲେ ସମସ୍ତେ ଘରକୁ ଫେରିଥାନ୍ତି। ପୂଜା ପରେ ପୁନର୍ବାର ବର୍ଷଟିଏ ପାଇଁ କର୍ମ ଅନ୍ବେଷଣରେ ବାହାରିଯାଆନ୍ତି। ତେବେ ଚଳିତବର୍ଷ ଏଥିରେ ବ୍ୟତିକ୍ରମ ଦେଖିବାକୁ ମିଳିଛି। ଗତ ମାର୍ଚ୍ଚରୁ କରୋନା ସଂକ୍ରମଣ ପାଇଁ ଜିଲାକୁ ଆସିଥିବା ବେଳେ ପରିବାର ପ୍ରତିପୋଷଣ ପାଇଁ ମାସକ ପୂର୍ବରୁ ଦେଶବିଦେଶକୁ ବାହାରି ଗଲେଣି। ପୂଜା କଟକଣା ଯୋଗୁ ଏଥର ବନ୍ଧୁବାନ୍ଧବ ଘରକୁ ଆସିବେ ନାହିଁ ବୋଲି ସେ କ୍ଷୋଭର ସହ କହିଛନ୍ତି। ଶିଳ୍ପୀ ବାସୁଦେବ ମହାରଣା କହନ୍ତି, କରୋନା ସଂକ୍ରମଣ ପୂଜା କଟକଣାର କାରଣ ସାଜିଛି। ଏହି କଟକଣା ମୂର୍ତ୍ତି କାରିଗରଙ୍କ ସମେତ ବାଜା, ରୋଶଣି, ତୋରଣ ବ୍ୟବସାୟୀଙ୍କ ରୋଜଗାର ବନ୍ଦ କରିଦେଇଛି। ଚଳିତବର୍ଷ ୪ ଫୁଟ ଉଚ୍ଚର ମୂର୍ତ୍ତି ନିର୍ମାଣ କରିବାକୁ ବରାଦ ଥିବାରୁ ପୂର୍ବପରି ଆକର୍ଷଣୀୟ ହେବ ନାହିଁ। ପୁରୁଣା ବସ୍ଷ୍ଟାଣ୍ଡର ବ୍ୟବସାୟୀ ସେକ ଜାକିରିଆ କୁହନ୍ତି, ମା’ଙ୍କ ଏହି ଗଣପର୍ବ ଭାଇଚାରର ଏକ ନମୁନା। ଏହି ସମୟରେ ବିଭିନ୍ନ ବ୍ୟବସାୟୀ ନିଜର ସାମଗ୍ରୀ ବିକ୍ରି ପାଇଁ ସୁଯୋଗ ପାଇଥାନ୍ତି। ଏପରି କି ସୁଦୂର ଜମ୍ମୁ କଶ୍ମୀର, ଉତ୍ତରପ୍ରଦେଶ, ମହାରାଷ୍ଟ୍ରରୁ ବ୍ୟବସାୟୀ ପସରା ମେଲାଇଥିବା ବେଳେ ଘରକରଣା ସାମଗ୍ରୀ ବିକ୍ରି ଅଧିକ ହୋଇଥାଏ। ସେହିପରି ରଙ୍ଗବେରଙ୍ଗ ତୋରଣ ଓ ମା’ଙ୍କ ସାଜସଜ୍ଜା ଦେଖିବା ପାଇଁ ଭିଡ଼ ଲାଗିଥାଏ। ମା’ଙ୍କ ଗଣପର୍ବ ମାତ୍ର ଦୁଇଦିନ ବାକି ଥିଲେ ମଧ୍ୟ ଚଳିତବର୍ଷ ଏ ନେଇ କୌଣସି ଚମକ ନ ଥିବାରୁ ବ୍ୟବସାୟ ମାନ୍ଦା ରହିଛି। ଏ ସମ୍ପର୍କରେ ଏଏସ୍ପି ବ୍ରହ୍ମାନନ୍ଦ ଗାଗାରିନ ମହାନ୍ତି କୁହନ୍ତି, ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁଯାୟୀ କୋଭିଡ୍ ନିୟମାବଳୀର ସମସ୍ତ ନିୟମ ମଧ୍ୟରେ ଚଳିତବର୍ଷ ଏହି ଗଣପର୍ବ ପାଳନ ହେବ। ମା’ଙ୍କ ମୃଣ୍ମୟୀ ମୂର୍ତ୍ତିର ଉଚ୍ଚତା ୪ ଫୁଟ ମଧ୍ୟରେ ରହିବା ସହିତ ମଣ୍ଡପର ୩ ପାର୍ଶ୍ୱ ବନ୍ଦ ରହିବ। ଚତୁର୍ଥ ପାର୍ଶ୍ୱରେ କର୍ମକର୍ତ୍ତାଙ୍କ ଯାତାୟାତ ହେବ। ପୂଜାକର୍ମରେ ୭ ଜଣ ସାମିଲ ହୋଇପାରିବେ ବୋଲି ନିୟମ ହୋଇଥିବା ବେଳେ ପୂଜା ପାଇଁ ଜିଲାପାଳଙ୍କ ଅନୁମତି ନେବାକୁ ପଡିବ।
