ନୂଆଦିଲ୍ଲୀ,୯।୮: କରୋନା ମହାମାରୀ ଯୋଗୁ ଗତ ଦେଢ଼ ବର୍ଷରୁ ଊର୍ଦ୍ଧ୍ୱ ହେବ ଦେଶରେ ସ୍କୁଲ ବନ୍ଦ ରହିଥିବାରୁ ପିଲାଙ୍କ ଭବିଷ୍ୟତ ନଷ୍ଟ ହେବା ସହ ପାଠପଢ଼ାରେ ବହୁତ କ୍ଷତି ହୋଇଛି। ଏନେଇ ସୋମବାର ପାର୍ଲାମେଣ୍ଟାରୀ କମିଟି ପ୍ରତିକ୍ରିୟା ରଖିଛି। କମିଟି ପକ୍ଷରୁ କୁହାଯାଇଛି ଯେ, ବିଶେଷକରି ପିଲାଙ୍କ ଗଣିତ, ବିଜ୍ଞାନ ଏବଂ ଭାଷା ସମ୍ବନ୍ଧୀୟ ବିଷୟଗୁଡ଼ିକରେ ମୌଳିିକ ଜ୍ଞାନ ଦୁର୍ବଳ ହେବାରେ ଲାଗିଛି। ଶିକ୍ଷା, ମହିଳା, ଶିଶୁ, ଯୁବକ ଏବଂ କ୍ରୀଡ଼ା ସମ୍ବନ୍ଧୀୟ ପାର୍ଲାମେଣ୍ଟାରୀର ସ୍ଥାୟୀ କମିଟି ଏକ ରିପୋର୍ଟରେ ଏନେଇ ମନ୍ତବ୍ୟ ରଖିଛି। ଦେଶରେ ସ୍କୁଲ ନ ଖୋଲିବାର ବିପଦ ଏତେ ଗୁରୁତର ଯେ, ଏହାକୁ ଅଣଦେଖା କରାଯାଇପାରିବ ନାହିଁ ବୋଲି ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି। ବର୍ଷେରୁ ଅଧିକ ସମୟ ଧରି ପିଲାଙ୍କ ପାଠପଢ଼ା ନଷ୍ଟ ହେବା ସହ ତାଙ୍କର ମୌଳିକ ଜ୍ଞାନ ମଧ୍ୟ ଦୁର୍ବଳ ହେଉଥିବା ପରିଲିଖିତ ହେଉଛି। ଏହାଦ୍ୱାରା ପିଲାଙ୍କର ଶିକ୍ଷା ସହ ଜ୍ଞାନଗତ କ୍ଷମତା ମଧ୍ୟ ଦୁର୍ବଳ ହେବାରେ ଲାଗିଛି। ସ୍କୁଲ ବନ୍ଦ ହେବାରୁ ପିଲାମାନଙ୍କ ଶିକ୍ଷା, ଖାଦ୍ୟ, ମାନସିକ ସ୍ବାସ୍ଥ୍ୟ ଏବଂ ସର୍ବଦଳୀୟ ବିକାଶ ପାଇଁ ବିପଦ ସୃଷ୍ଟି କରିଛି। କେବଳ ସେତିକି ନୁହେଁ କିଛି ଛାତ୍ର, ବିଶେଷକରି ବାଳିକାମାନେ ଆଉ ବିଦ୍ୟାଳୟକୁ ଫେରିବେ ନାହିଁ ବୋଲି ଆଶଙ୍କା କରାଯାଉଛି। ତେବେ କରୋନା କାଳରେ ଶିକ୍ଷାର ଡିଜିଟାଲକୁ ଦୃଷ୍ଟିରେ ରଖି ପ୍ରତ୍ୟେକ ବିଦ୍ୟାଳୟ ଏଥିପାଇଁ ପ୍ରସ୍ତୁତ ହେବା ଆବଶ୍ୟକ। ଏଥିସହ ବିଦ୍ୟାଳୟରେ ପିଲାଙ୍କ ସଂଖ୍ୟା ହ୍ରାସ କରିବା ପାଇଁ ବିକଳ୍ପ ଦିନରେ କିମ୍ବା ଦୁଇଟି ସିଫ୍ଟରେ କ୍ଲାସ ଆୟୋଜନ କରାଯିବା ଉଚିତ୍। ଏଥିସହ ସାମାଜିକ ଦୂରତ୍ୱ, ଫେସ୍ ମାସ୍କ ପିନ୍ଧିବା ଏବଂ ବାରମ୍ବାର ହାତ ଧୋଇବା ଭଳି କୋଭିଡ ପ୍ରୋଟୋକଲ ଅନୁସରଣ କରିବା ବାଧ୍ୟତାମୂଳକ କରାଯିବା ଉଚିତ୍ ବୋଲି କମିଟି ପକ୍ଷରୁ ପରାମର୍ଶ ଦିଆଯାଇଛି। ଏତଦ୍ ବ୍ୟତୀତ ସମସ୍ତ ଛାତ୍ରୀଛାତ୍ର, ଶିକ୍ଷକ ଏବଂ କର୍ମଚାରୀଙ୍କ ପାଇଁ ଟିକାକରଣକୁ ତ୍ୱରାନ୍ବିତ କରାଯିବା ଉଚିତ ବୋଲି କମିଟି ପରାମର୍ଶ ଦେଇଛି। ଯାହାଦ୍ୱାରା ଯଥାଶୀଘ୍ର ସାଧାରଣ ଭାବରେ ସ୍କୁଲ କାର୍ଯ୍ୟ ଆରମ୍ଭ ହୋଇପାରିବ।
