ଚଣ୍ଡିଗଡ଼,୧୪ ।୮: ବାହାର ରାଜ୍ୟରୁ ଏବେ ପଞ୍ଜାବ ଯାଉଥିବା ଲୋକଙ୍କ ପାଇଁ ବଡ ସୂଚନା । କରୋନାର ଦୁଇଟି ଯାକ ଟିକା ଅଥବା କରୋନା ଆର୍ଟିପିସିଆର୍ ନେଗେଟିଭ୍ ରିପୋର୍ଟ ଧରିଥିଲେ ଯାଇ ଜଣେ ବ୍ୟକ୍ତି ବାହାର ରାଜ୍ୟରୁ ପଞ୍ଜାବ ଭିତରକୁ ପ୍ରବେଶ କରି ପାରିବ ବୋଲି କହିଛନ୍ତି ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ । ସୋମବାରଠାରୁ ଏହି ନିୟମ ଲାଗୁ କରାଯିବ । ତେବେ ହିମାଚଳ ପ୍ରଦେଶ ଓ ଜମ୍ମୁରୁ ଆସୁଥିବା ଲୋକଙ୍କ ଉପରେ ବିଶେଷ ଦୃଷ୍ଟି ଦେବାକୁ ସରକାର ନିର୍ଦ୍ଦେଶ ଜାରି କରିଛନ୍ତି । କାରଣ ସେଠାରେ ଏହି ନିକଟରେ ପୁଣିଥରେ କରୋନା ସଂକ୍ରମଣ ବୃଦ୍ଧି ପାଇଥିଲା । ଅନ୍ୟପଟେ ସ୍କୁଲ ଖୋଲିବା ପରେ ପୁଣିଥରେ ସଂକ୍ରମଣ ବଢି ଯାଇଥିବାରୁ ଯେଉଁ ଶିକ୍ଷୟିତ୍ରୀ/ଶିକ୍ଷକ ତଥା ନନ୍ ଟିଚିଙ୍ଗ ଷ୍ଟାଫ କରୋନାର ଦୁଇଟି ଯାକ ଡୋଜ ଟିକା ନେଇଛନ୍ତି ବା ଯେଉଁମାନେ କରୋନାରୁ ସୁସ୍ଥ ହୋଇଛନ୍ତି ସେମାନଙ୍କୁ ସ୍କୁଲ ଯିବାଲାଗି ଅନୁମତି ମିଳିଛି । ଅନ୍ୟମାନଙ୍କ ପାଇଁ ଅନଲାଇନ୍ ଭଳି ବିକଳ୍ପ ରହିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେହିପରି ସାରା ରାଜ୍ୟରେ ସ୍କୁଲର ସମସ୍ତ କର୍ମଚାରୀ ଓ ଶିକ୍ଷୟିତ୍ରୀ/ଶିକ୍ଷକଙ୍କୁ ପ୍ରାଥମିକତା ଭାବେ ଟିକା ଦେବାକୁ ନିର୍ଦ୍ଦେଶ ଦିଆଯାଇଛି ।
