ନୂଆଦିଲ୍ଲୀ,୩୧ା୧୦: ଚାଇନାର ଋଣ ଆପ୍ଗୁଡ଼ିକ ଜରିଆରେ ଭାରତରେ ଅନେକ ବଡ଼ ଧରଣର ଠକେଇ ସାମ୍ନାକୁ ଆସିଛି। ଏହି ଆପ୍ରେ ଋଣ ପ୍ରଦାନ ଆଳରେ ଲୋକଙ୍କୁ ହଇରାଣ, ବ୍ଲାକ୍ମେଲ କରାଯାଉଛି। ରିକଭରି ଏଜେଣ୍ଟମାନଙ୍କ ପ୍ରାଦୁର୍ଭାବ ବଢ଼ୁଥିବାରୁ ଲୋକେ ଆମତ୍ହତ୍ୟା କରିବାକୁ ମଧ୍ୟ ବାଧ୍ୟ ହେଉଛନ୍ତି। ତେଣୁ ଏପରି ଆପ୍ଗୁଡ଼ିକୁ ତୁରନ୍ତ ଚିହ୍ନଟ କରି କଡ଼ା କାର୍ଯ୍ୟାନୁଷ୍ଠାନ ନେବା ପାଇଁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି।
ସ୍ବରାଷ୍ଟ୍ର ମନ୍ତ୍ରଣାଳୟ ଚାଇନା ପରିଚାଳିତ ଲୋନ୍ ଆପ୍ଗୁଡ଼ିକୁ ଭାରତର ଜାତୀୟ ସୁରକ୍ଷା, ଅର୍ଥନୀତି ଓ ନାଗରିକଙ୍କ ନିରାପତ୍ତା ପାଇଁ ଏକ ବଡ଼ ବିପଦ ବୋଲି ଦର୍ଶାଇଛି। ମନ୍ତ୍ରଣାଳୟର ନିର୍ଦ୍ଦେଶନାମାରେ କୁହାଯାଇଛି ଯେ, ସାରା ଦେଶରେ ବେଆଇନ ଋଣପ୍ରଦାନକାରୀ ଡିଜିଟାଲ ଆପ୍ ସଂଖ୍ୟା ବଢ଼ିବାରେ ଲାଗିଛି। ଏହି ଆପ୍ଗୁଡ଼ିକ ଜରିଆରେ ଲୋକଙ୍କୁ ସ୍ବଳ୍ପକାଳୀନ ଋଣ ଓ ମାଇକ୍ରୋକ୍ରେଡିଟ୍ ଦିଆଯାଉଛି। ଋଣ ପ୍ରଦାନ ବାବଦକୁ ପ୍ରସେସିଂ ଫି ଓ ହିଡେନ୍ ଚାର୍ଜେସ୍ ସହ ଉଚ୍ଚ ହାରରେ ସୁଧ ଅସୁଲ କରାଯାଉଛି। ବିଶେଷକରି ସ୍ବଳ୍ପ ଆୟକାରୀ ଓ ଦୁର୍ବଳ ବର୍ଗର ଲୋକଙ୍କୁ ଟାର୍ଗେଟ କରାଯାଉଛି।
ଏପରି କି ଲ୍ୟାଣ୍ଡର୍ସ ଋଣ ଗ୍ରହୀତାଙ୍କ କଣ୍ଟାକ୍ଟ ନମ୍ବର, ଫଟୋ, ଭିଡିଓ ଭଳି ବ୍ୟକ୍ତିଗତ ଅନ୍ତରଙ୍ଗ ତଥ୍ୟ ହାତେଇ ପରବର୍ତ୍ତୀ ସମୟରେ ସେମାନଙ୍କୁ ବ୍ଲାକ୍ମେଲ ଓ ହଇରାଣ କରୁଛନ୍ତି। ଭାରତରେ ଏହି ବେଆଇନ ଆପ୍ ଜରିଆରେ ଋଣ ନେଇଥିବା ଅନେକ ବ୍ୟକ୍ତି ଆମତ୍ହତ୍ୟା କରିଥିବାର ବହୁ ନଜିର ରହିଛି। ସ୍ବରାଷ୍ଟ୍ର ମନ୍ତ୍ରଣାଳୟ ଆହୁରି କହିଛି, ଏପରି ବେଆଇନ ଲ୍ୟାଣ୍ଡିଂ ଆପ୍ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ର ରେଗୁଲେଟେଡ୍ ଏନ୍ଣ୍ଟିଟିଜ୍ (ଆର୍ଇ) ହୋଇ ନ ଥିବାରୁ ସେଗୁଡ଼ିକ ଏସ୍ଏମ୍ଏସ୍, ଡିଜିଟାଲ ବିଜ୍ଞାପନ, ଚାଟ୍ ମେସେଞ୍ଜର୍ସ ଏବଂ ମୋବାଇଲ୍ ଆପ୍ଲିକେଶନ୍ ଷ୍ଟୋରର ଫାଇଦା ଉଠାଇ ଲାଭବାନ ହେଉଛନ୍ତି। ଋଣ ଗ୍ରହୀତାମାନଙ୍କୁ ଲୋନ୍ ନେବା ପୂର୍ବରୁ ନିଜର କଣ୍ଟାକ୍ଟସ୍, ଲୋକେଶନ ଓ ଫୋନ୍ ଷ୍ଟୋରେଜ ସମ୍ପର୍କିତ ଡେଟା ଦେବାକୁ ପଡ଼ିଥାଏ।
ଏପରି ସମ୍ବେଦନଶୀଳ ତଥ୍ୟକୁ ନେଇ ଲ୍ୟାଣ୍ଡର୍ସ ସେମାନଙ୍କୁ ହଇରାଣ କରିଥାଆନ୍ତି, ଯାହାକି ଆର୍ବିଆଇର ଫେୟାର ପ୍ରାକ୍ଟିସେସ୍ କୋଡ୍ର ଖୋଲାଖୋଲି ଉଲ୍ଲଂଘନ। ତେଣୁ ଏପରି ସଙ୍ଗଠିତ ଅପରାଧ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବା ପାଇଁ ରାଜ୍ୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ଏଥିସହ ଏଭଳି ଆପ୍ଗୁଡ଼ିକୁ ବର୍ଜନ କରିବା ପାଇଁ ଜିଲା ସ୍ତରରେ ସଚେତନତା ସୃଷ୍ଟି ପାଇଁ ମଧ୍ୟ ପରାମର୍ଶ ଦିଆଯାଇଛି। ପ୍ରକାଶ ଯେ, ନିକଟରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମନିଲଣ୍ଡରିଂ ମାମଲାଗୁଡ଼ିକର ତଦନ୍ତ କରି ଚାଇନା ନିୟନ୍ତ୍ରିତ ଲୋନ୍ ଆପ୍ଗୁଡ଼ିକର ୯.୨୦ କୋଟି ଟଙ୍କା ଫ୍ରିଜ୍ କରିଛି।
