ଭୁବନ, ୨୪।୨( ବିପିନ ବିହାରୀ ସେଠୀ): ଢେଙ୍କାନାଳ ଜିଲା ଭୁବନ ଥାନା ଧଳପଡା ଗ୍ରାମର ଜଣେ ୨୧ ବର୍ଷିଆ ଯୁବତୀଙ୍କୁ ୪ ଜଣ ଗଣବଳାତ୍କାର କରିଥିବା ଯୁବତୀଜଣଙ୍କ ରବିବାର ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପାଇ ଭୁବନ ଥାନା ପୋଲିସ କେସ୍ ନମ୍ବର ୧୦୯/୨୦୨୬ରେ ମାମଲା ରୁଜୁ କରି ସୋମବାର ବିଭିନ୍ନ ସ୍ଥାନରେ ଚଢାଉ କରି ଅଭିଯୁକ୍ତଙ୍କୁ ଅଟକ ରଖିବା ପରେ ଡାକ୍ତରୀ ମାଇନା କରାଯାଇଛି। ଡାକ୍ତରୀ ମାଇନା ପରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ଥାନା ଅଧିକାରିଣୀ ରେଣୁାଳା ସାହୁ କହିଛନ୍ତି । ଯୁବତୀଙ୍କର ମା’ଙ୍କ ଦେହାନ୍ତ ହେବା ପରେ ବାପା ସେମାନଙ୍କ ଦାୟିତ୍ୱ ଠିକ୍ ଭାବେ ନେଉନଥିଲେ । ଯୁବତୀଙ୍କର ୪ ଜଣ ଛୋଟ ଭଉଣୀ ଅଛନ୍ତି। ଅଭାବ ଅନାଟନ ପାଇଁ ସେ ଦିନ ମଜୁରୀଆ ଭାବେ କାମ କରି ସାନ ଭଉଣୀମାନଙ୍କୁ ପାଠ ପଢ଼ାଇବା ସହିତ ଭରଣ ପୋଷଣ କରୁଥିଲେ । ତାଙ୍କର ଦୁର୍ବଳତାର ସୁଯୋଗ ନେଇ ସେହି ଗ୍ରାମର ପିତା ଦେହୁରୀ, ଯଦୁମଣୀ ଦେହୁରୀ, ଭୁବନ ଥାନା କୁମର୍ଦା ଗ୍ରାମର ଶିବରାମ ଦେହୁରୀ ଓ ଯାଜପୁର ଜିଲା କେନ୍ଦୁଢିପି ଗ୍ରାମର ରଞ୍ଜନ ଦିଆଣି ମିଳିମିଶି ଯୁବତୀଙ୍କୁ ଭୟଭୀତ କରି ଶାରୀରିକ ସମ୍ପର୍କ ବାରମ୍ବାର ରଖିଥିଲେ । ଯୁବତୀ ଜଣଙ୍କ ଦେହ ଅସୁସ୍ଥ ହେବା ପରେ ସେ ଗ୍ରାମର ଆଶା ଦିଦିଙ୍କ ସହାୟତାରେ ଭୁବନ ଡାକ୍ତରଖାନାକୁ ଚିକିତ୍ସା ପାଇଁ ଆସିଥିଲେ। ସେଠାରେ ଯୁବତୀ ଜଣଙ୍କ ଗର୍ଭବତୀ ଥିବାର ଜଣାପଡିଥିଲା । ସଙ୍ଗେ ସଙ୍ଗେ ଯୁବତୀଙ୍କୁ ନେଇ ସଖି ଓ୍ବାନଷ଼ଟପ ସେଣ୍ଟରରେ ରଖାଯାଇଥିଲା। ପରେ ଯୁବତୀ ଜଣଙ୍କ ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଅଭିଯୁକ୍ତମାନଙ୍କୁ ବିଭିନ୍ନ ସ୍ଥାନରୁ ଆଣି ଅଟକ ରଖିଛି।
