ରାୟଗଡ଼ା ଅଫିସ,୧୭ା୩: ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ଶିକରପାଇ ପଞ୍ଚାୟତ ସଦର ଅଞ୍ଚଳରେ ଗୁରୁବାର ଘରେ ନିଆଁ ଲାଗି ଗୋଟିଏ ପରିବାରର ୪ଜଣ ପୋଡ଼ି ଗୁରୁତର ଆହତ ହୋଇଛନ୍ତି। ସେମାନେ ହେଲେ ଦୟାନିଧି ବେହେରା, ସ୍ତ୍ରୀ ଲକ୍ଷ୍ମୀ, ବଡ଼ ବୋହୂ ସ୍ବପ୍ନା ଏବଂ ସାନ ପୁଅ ଅନିଲ।
ସୂଚନା ଅନୁଯାୟୀ, ଘରୁ ଚିତ୍କାର ଶୁଣି ପଡ଼ୋଶୀ ଏବଂ ସାହି ଲୋକେ ନିଆଁକୁ ସାମାନ୍ୟ ଆୟତ୍ତ କରିବା ସହ ୪ ଗୁରୁତରଙ୍କୁ ଉଦ୍ଧାର କରି ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ପରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲା। ଗ୍ୟାସ୍ ସିଲିଣ୍ଡର ଫାଟି ଅଗ୍ନିକାଣ୍ଡ ଘଟିଥିବା ସାହି ଲୋକେ ଅନୁମାନ କରିଛନ୍ତି। ତେବେ ପ୍ରାଥମିକ ତଦନ୍ତ ବେଳେ ଘରୁ ପେଟ୍ରୋଲ ଡବା ମିଳିଥିବାରୁ ଘଟଣାର ପ୍ରକୃତ କାରଣ ଅସ୍ପଷ୍ଟ ଥିବା କଲ୍ୟାଣସିଂହପୁର ଥାନା ଅଧିକାରୀ ସୁକୁମା ହାଁସଦା କହିଛନ୍ତି। ଏଥିସହ ଘଟଣା ବେଡ୍ରୁମ୍ରେ ଘଟିଥିବା ସେ କହିଛନ୍ତି। ତେଣୁ ଘଟଣାର କାରଣକୁ ନେଇ ସନ୍ଦେହ ସୃଷ୍ଟି ହୋଇଛି। ଅନ୍ୟପକ୍ଷରେ ସମସ୍ତ ଗୁରୁତରଙ୍କ ଶରୀରର ପ୍ରାୟ ୯୦ ପ୍ରତିଶତ ପୋଡ଼ିଯାଇଛି। ରାୟଗଡ଼ାରେ ପ୍ରାଥମିକ ଚିକିତ୍ସା ପରେ ସେମାନଙ୍କୁ ବ୍ରହ୍ମପୁର ପଠାଇ ଦିଆଯାଇଥିବା ସର୍ଜରି ବିଭାଗର ଡାକ୍ତର ବୀରେନ୍ କହିଛନ୍ତି। ଗୁରୁତର ସ୍ବପ୍ନାଙ୍କ ସ୍ବାମୀ ସୁନୀଲ ଶିକରପାଇରେ ଏକ ବେକେରି କରିଛନ୍ତି। ଘଟଣା ଘଟିବା ସମୟରେ ସେ ଏବଂ ଅନ୍ୟ ଜଣେ ଦିଅର ଘରେ ନ ଥିବା ଜଣାପଡ଼ିଛି।
