ନୂଆଦିଲ୍ଲୀ,୨୯।୧୨: ଭାରତର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ୨୬ ଡିସେମ୍ବର ୨୦୨୪ରେ ୯୨ ବର୍ଷରେ ପରଲୋକ ଘଟିଛି। ତାଙ୍କ ବିୟୋଗରେ ଦେଶର ରାଜନୈତିକ ତଥା ଅର୍ଥବ୍ୟବସ୍ଥାରେ ଗଭୀର ଶୂନ୍ୟସ୍ଥାନ ସୃଷ୍ଟି ହୋଇଛି। ତେବେ କୋଇଲା ଦୁର୍ନୀତି ମାମଲାରେ ଲାଗିଥିବା ଦାଗକୁ ଧୋଇବା ଲାଗି ତାଙ୍କର ଇଚ୍ଛା ଅଧାରେ ରହି ଯାଇଛି। ଦିଲ୍ଲୀର ଏକ କୋର୍ଟ ତାଙ୍କୁ କୋଇଲା ବ୍ଲକ ଆବଣ୍ଟନ ମାମଲାରେ ଦୋଷୀ ସାବ୍ୟସ୍ତ କରିଥିଲେ। ଯଦି ଏହି ମାମଲାରେ ତାଙ୍କୁ ଆଶ୍ୱସ୍ତି ମିଳିଥାନ୍ତା ତେବେ ତାଙ୍କ ସ୍ବଚ୍ଛ ପତିଆରା ବଜାୟ ରଖିବାରେ ସହାୟକ ହୋଇଥାନ୍ତା।
ଗଣମାଧ୍ୟମ ରିପୋର୍ଟ ମୁତାବକ, ୨୦୧୫ ମାର୍ଚ୍ଚରେ ପୂର୍ବତନ ପ୍ରଧାନମନ୍ତ୍ରୀଙ୍କୁ ଏକ ସ୍ବତନ୍ତ୍ର ସିବିଆଇ କୋର୍ଟ କୋଇଲା ଦୁର୍ନୀତି ମାମଲାରେ ଅଭିଯୁକ୍ତ ଭାବେ ସମନ କରିଥିଲେ। ଯେଉଁଥିରେ ପାରଦର୍ଶିତା ନ ଥାଇ କୋଇଲା ଉତ୍ପାଦନ ଲାଗି ଘରୋଇ କମ୍ପାନୀକୁ ଅଧିକାର ଦିଆଯାଇଥିବା କୁହାଯାଇଥିଲା। ସେତେବେଳେ ମନମୋହନ କହିଥିଲେ ଯେ, ମୁଁ ଚିନ୍ତିତ, ହେଲେ ଏହା ଜୀବନର ଏକ ଅଂଶ।
୨୦୧୫ରେ ସିବିଆଇ ନିଜର କ୍ଲୋଜର ରିପୋର୍ଟ ଦାଖଲ କରିଥିଲେ, ଯେଉଁଥିରେ କୁହାଯାଇଥିଲା ଯେ କାହା ବିରୋଧରେ ମୋକଦ୍ଦମା ଚାଲିବା ନେଇ କୌଣସି ପ୍ରମାଣ ନାହିଁ। ଏହି ମାମଲା ୨୦୦୫ରେ ଓଡ଼ିଶାର ତାଲବିରା ବ୍ଲକର କୋଇଲା ଅଞ୍ଚଳରେ ଆଦିତ୍ୟ ବିର୍ଲା ଗ୍ରୁପ୍ର ଅଂଶକୁ ଅନ୍ୟ ଏକ କମ୍ପାନୀକୁ ଆବଣ୍ଟିତ କରିବା ସହ ଜଡ଼ିତ ଥିଲା। ସେତେବେଳେ ପ୍ରଧାନମନ୍ତ୍ରୀ ଥିବା ମନମୋହନଙ୍କ ନିକଟରେ କୋଇଲା ମନ୍ତ୍ରଣାଳୟର ଦାୟିତ୍ୱ ଥିଲା।
ଏପ୍ରିଲ ୨୦୧୫ରେ ସୁପ୍ରିମକୋର୍ଟ ମନମୋହନଙ୍କୁ ସମନ ପଠାଇବା ଲାଗି ଟ୍ରାଏଲ୍ କୋର୍ଟର ଆଦେଶ ଉପରେ ରୋକ ଲଗାଇଥିଲେ। ଅକ୍ଟୋବର ୨୦୧୫ରେ କୋର୍ଟ କହିଥିଲେ ଯେ କୋଇଲା ସଚିବ ଗୁପ୍ତା ମନମୋହନଙ୍କୁ ଅନ୍ଧାରରେ ରଖିଥିଲେ ଏବଂ ଗୁପ୍ତା ଏବଂ ୫ ଅନ୍ୟ ଅଧିକାରୀଙ୍କ ବିରୋଧରେ ଅଭିଯୋଗ ସାବ୍ୟସ୍ତ ହୋଇଥିଲା। ୨୦୧୭ରେ ଏକ ସ୍ପେଶାଲ ସିବିଆଇ କୋର୍ଟ କୋଇଲା ଘୋଟାଲା ସହ ସମ୍ବନ୍ଧିତ ମାମଲାରେ ଗୁପ୍ତା, କୋଇଲା ମନ୍ତ୍ରଣାଳୟର ପୂର୍ବ ସଂଯୁକ୍ତ ସଚିବ କେ ଏସ୍ କ୍ରୋଫା ଏବଂ ପ୍ରଭାରୀ ନିର୍ଦ୍ଦେଶକ କେ ସି ସମରିଆ ସମେତ କୋଇଲା ମନ୍ତ୍ରଣାଳୟର ୩ ପୂର୍ବ ଅଧିକାରୀଙ୍କୁ ଦୋଷୀ ସାବ୍ୟସ୍ତ କରିଥିଲେ। ଏହାଦ୍ୱାରା ମନମୋହନଙ୍କୁ ବଡ଼ ଆଶ୍ୱସ୍ତି ମିଳିଥିଲା।
ନିଜର ଅବସର ପରେ ସୁପ୍ରିମକୋର୍ଟର ବିଚାରପତି ଦତ୍ତୁ ଟାଇମ୍ସ ଅଫ୍ ଇଣ୍ଡିଆକୁ କହିଥିଲେ ଯେ, ସେ ଜଣେ ସ୍ବଚ୍ଛ ତଥା ନିର୍ମଳ ଛବି ଥିବା ପୂର୍ବତନ ପ୍ରଧାନମନ୍ତ୍ରୀ। ତାଙ୍କୁ ଏଭଳି ମାମଲାରେ ଅଭିଯୁକ୍ତ ଭାବେ ମୋକଦ୍ଦମାର ସମ୍ମୁଖୀନ ହେଉଥିବା ଦେଖି ପାରି ନ ଥାନ୍ତି, ଯାହାର ଆଧାର ତାଙ୍କ ଦଳର ରାଜନୈତିକ ନିଷ୍ପତ୍ତି ଥିଲା।
