ଅତାବିରା,୨୨ା୧୦(ଯୁଧିଷ୍ଠିର ମହାପାତ୍ର): ବରଗଡ଼ ଜିଲା ଅତାବିରା ବ୍ଲକ ଲରମ୍ଭା ପ୍ରାଥମିକ କୃଷି ସମବାୟ ସମିତି ଲିଃ (ପ୍ୟାକ୍ସ)ର ପୂର୍ବତନ ସହକାରୀ ସମ୍ପାଦକ ସନ୍ତୋଷ କୁମାର ପଣ୍ଡା ତାଙ୍କ ଉପରେ ଅନ୍ୟାୟ ଏବଂ ଲରମ୍ଭା ପ୍ୟାକ୍ସରେ ଦୁର୍ନୀତି ହୋଇଥିବା ଅଭିଯୋଗ କରି ବୁଧବାର ପୂର୍ବାହ୍ନ ୧୧ଟାରୁ ଉଭୟ ଦମ୍ପତି ଧାରଣାରେ ବସିଛନ୍ତି।
ପ୍ରାପ୍ତ ଅଭିଯୋଗରୁ ପ୍ରକାଶ ଯେ, ଗତ ୧୯୬୯ ଜୁନ୍ ୧୬ରୁ ୨୦୧୧ ମାର୍ଚ୍ଚ ୩୧ ଯାଏ ଦୀର୍ଘ ୪୨ ବର୍ଷ ଅଭିଯୋଗକରି ପଣ୍ଡା ସହକାରୀ ସମ୍ପାଦକ ଭାବେ କାର୍ଯ୍ୟ କରିଥିଲେ। ସେ ଅଭିଯୋଗ କରିଛନ୍ତି ଯେ, ୧୯୭୪ରୁ ଆଜି ଯାଏ ବିଭିନ୍ନ ସମୟରେ ସମିତି ତାଙ୍କ ଉପରେ ଭିନ୍ନଭିନ୍ନ ଅନ୍ୟାୟ ତଥା ବେଆଇନ କାର୍ଯ୍ୟାନୁଷ୍ଠାନ ଦେଇ ପାରିବାରିକ, ସାମାଜିକ, ଆର୍ଥିକ, ଶାରୀରିକ, ବଳପୂର୍ବକ ଆକ୍ରୋଶମୂଳକ ଭାବେ ନିର୍ଯାତନା ଦେଇ ଆସିଛନ୍ତି। ଶ୍ରମ ଅଦାଲତ ମୋକଦ୍ଦମା ଉପରେ ଓଡ଼ିଶା ଉଚ୍ଚତମ ନ୍ୟାୟାଳୟ ମୋକଦ୍ଦମା ନଂ ୧୦୬୬/୧୯୭୭ ଉପରେ ୧୫/୯/୧୯୮୧ ଅନୁସାରେ ପଣ୍ଡାଙ୍କୁ ୨୦/୫/୧୯୮୨ ତାରିଖରେ ପୁନଃ ଲରମ୍ଭା ପ୍ୟାକ୍ସରେ ନିଯୁକ୍ତି କରି ବକେୟା ଦରମା ପ୍ରଦାନ କରିବାକୁ ରାୟ ପ୍ରକାଶ ପାଇଥିଲା ବୋଲି ଅଭିଯୋଗକାରୀ କହିଛନ୍ତି। ତେବେ ଏ ସବୁ ହେବା ସତ୍ତ୍ୱେ ଲରମ୍ଭା ପ୍ୟାକ୍ସ ପୂର୍ବତନ ସହ ସମ୍ପାଦକ ପଣ୍ଡାଙ୍କ ବକେୟା ଦରମାକୁ ସମିତି ପକ୍ଷରୁ ସେଟେଲମେଣ୍ଟ କରିଦେବା ଏବଂ ନୂତନ ସ୍କେଲ ଅନୁସାରେ ଦରମା ଦିଆଯାଇ ନ ଥିବା ଅଭିଯୋଗ କରିଛନ୍ତି। ଏ ନେଇ ଗତ ସେପ୍ଟେମ୍ବର ୧ ଲରମ୍ଭା ସଭାପତିଙ୍କ ସମେତ ଭୁବନେଶ୍ୱର ସମବାୟ ସମିତି ସମୂହ ନିବନ୍ଧକ, କମିଶନର, ଅଡିଟର ଜେନେରାଲ ଅଫ୍ କୋଅପରେଟିଭ୍ ସୋସାଇଟି ଓଡ଼ିଶା ଆଦି ବିଭିନ୍ନ ପ୍ରମୁଖ ଅଧିକାରୀଙ୍କୁ ତାଙ୍କ ପ୍ରତି ହୋଇଥିବା ଅନ୍ୟାୟ ପ୍ରତିବାଦରେ ନ୍ୟାୟ ଦାବି କରି ୭ ଦଫା ଦାବି ସମ୍ବଳିତ ଏକ ସ୍ମାରକପତ୍ର ପ୍ରଦାନ କରିଥିଲେ। ତେବେ ଏହା ସତ୍ତ୍ୱେ ନ୍ୟାୟ ନ ମିଳିବାରୁ ଗତ ସେପ୍ଟେମ୍ବର ୩୦ରେ ପୁନଃ ଏକ ପତ୍ର ସମ୍ପୃକ୍ତ ସମସ୍ତ ପ୍ରଶାସନିକ ଅଧିକାରୀ ଏବଂ ଖବରଦାତା ସମୂହଙ୍କୁ ପଠାଇ ବୁଧବାର ଅକ୍ଟୋବର ୨୨ରୁ ଧର୍ମପତ୍ନୀ ତରଙ୍ଗିଣୀ ପଣ୍ଡାଙ୍କ ସହ ଲରମ୍ଭା ପ୍ରାଥମିକ କୃଷି ସମବାୟ ସମିତି ବାରଣ୍ଡାରେ ଅହୋରାତ୍ର ଧାରଣା ଦେବାକୁ ଅଭିଯୋଗକାରୀ ସନ୍ତୋଷ କୁମାର ପଣ୍ଡା ଲିଖିତ ଭାବେ ଜଣାଇ ଧାରଣାରେ ବସିଛନ୍ତି। ଏ ନେଇ ଉତ୍ତରାଞ୍ଚଳ ରାଜସ୍ବ କମିଶନର ସମ୍ବଲପୁର ଡିଭିଜନ ପତ୍ର ସଂଖ୍ୟା ୧୧୬୮୯/୯.୧୦.୨୫ ଅନୁସାରେ ବରଗଡ଼ ଜିଲାପାଳଙ୍କୁ ଏହାର ବିଧିବଦ୍ଧ ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଇତି ମଧ୍ୟରେ ଲରମ୍ଭା ପ୍ୟାକ୍ସରେ ସଦସ୍ୟଙ୍କୁ ନେଇ ଏକ ବୈଠକ ବସି ଏହା ଉପରେ ଆଲୋଚନା ହୋଇଥିବା ଜଣାପଡ଼ିଛି।
Dharitri – The Largest & Most Trusted Odia Daily
