ଅମରପାଲି, ୨୮/୬ (ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ସୁବଳୟା ଥାନା ଅନ୍ତର୍ଗତ ଟିକରାପଡ଼ା (ଗାନ୍ଧୀପଡ଼ା) ଛକରେ ଥିବା ବିଦେଶୀ ମଦ ଦୋକାନକୁ ତୁରନ୍ତ ସ୍ଥାନାନ୍ତର କରିବା ଦାବିରେ ଟିକରାପଡ଼ା ଓ ସାଲେପଦର ଗ୍ରାମର ମହିଳା ସ୍ୱୟଂ ସହାୟିକା ଗୋଷ୍ଠୀ ସଦସ୍ୟା ଏବଂ ଗ୍ରାମବାସୀମାନେ ସୁବର୍ଣ୍ଣପୁର ଜିଲାପାଳ ନୃପରାଜ ସାହୁଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ଅଭିଯୋଗ ଅନୁଯାୟୀ, ପ୍ରାୟ ପାଞ୍ଚ ବର୍ଷ ଧରି ମୁଖ୍ୟ ସଡ଼କ କଡ଼ରେ ଉକ୍ତ ବିଦେଶୀ ମଦ ଦୋକାନ ଚାଲିଆସୁଛି। ପ୍ରତିଦିନ ଏହି ରାସ୍ତା ଦେଇ ସ୍କୁଲ ଓ କଲେଜର ଛାତ୍ରୀଛାତ୍ର, ମହିଳା, ଯୁବତୀ ଏବଂ ସାଧାରଣ ଲୋକ ଯାତାୟାତ କରୁଥିବା ବେଳେ ଦୋକାନ ନିକଟରେ ମଦ୍ୟପଙ୍କ ଭିଡ଼ ଜମୁଥିବାରୁ ଅସୁରକ୍ଷିତ ପରିବେଶ ସୃଷ୍ଟି ହେଉଛି। ମଦ୍ୟପମାନେ ପ୍ରାୟତଃ ଅସଭ୍ୟ ଭାଷାରେ ଗାଳିଗୁଲଜ କରୁଥିବାରୁ ମହିଳା ଓ ଯୁବତୀମାନେ ଏହି ରାସ୍ତାରେ ଯାତାୟାତ ସମୟରେ ଲଜ୍ଜିତ ଓ ଅସୁରକ୍ଷିତ ଅନୁଭବ କରୁଥିବା ଦାବି କରିଛନ୍ତି।
ଏହାଛଡ଼ା ମଦ ଦୋକାନ ନିକଟରେ ଶ୍ରୀ ସିଦ୍ଧେଶ୍ୱର ବାବା ମନ୍ଦିର, ତାରିଣୀ ମନ୍ଦିର, ହନୁମାନ ମନ୍ଦିର, ଅଙ୍ଗନୱାଡ଼ି କେନ୍ଦ୍ର ଏବଂ ଏକ ସାଧାରଣ ନଳକୂପ ଥିବାରୁ ପ୍ରତିଦିନ ବହୁ ସଂଖ୍ୟକ ମହିଳା, ଶିଶୁ ଓ ଶ୍ରଦ୍ଧାଳୁ ସେହି ସ୍ଥାନକୁ ଆସିଥାନ୍ତି। ଏପରି ସମ୍ବେଦନଶୀଳ ସ୍ଥାନରେ ମଦ ଦୋକାନ ରହିବା ଫଳରେ ସାମାଜିକ ପରିବେଶ ନଷ୍ଟ ହେଉଥିବା ସହ ସାଧାରଣ ଲୋକଙ୍କ ସୁରକ୍ଷା ପ୍ରତି ମଧ୍ୟ ବିପଦ ସୃଷ୍ଟି ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି।
ଜନସ୍ୱାର୍ଥ ଦୃଷ୍ଟିରୁ ବିଦେଶୀ ମଦ ଦୋକାନକୁ ଅନ୍ୟତ୍ର ସ୍ଥାନାନ୍ତର କରିବାକୁ ମହିଳାମାନେ ଦୃଢ଼ ଦାବି ଜଣାଇଛନ୍ତି। ଦାବି ପୂରଣ ନ ହେଲେ ଆଗାମୀ ଦିନରେ ଗଣଆନ୍ଦୋଳନ ଆରମ୍ଭ କରାଯିବ ବୋଲି ସେମାନେ ଚେତାବନୀ ଦେଇଛନ୍ତି।
ଏହି ଅବସରରେ ଗ୍ରାମର ‘ମା ସୁରେଶ୍ୱରୀ’ ସ୍ୱୟଂ ସହାୟିକା ଗୋଷ୍ଠୀର ସଭାନେତ୍ରୀ ମାଳତୀ ମେହେର, ସମ୍ପାଦିକା କୁମୁଦିନୀ ମେହେରଙ୍କ ସମେତ ବିଜୁଳି ମେହେର, ନାମିତା ମେହେର, ପ୍ରମିଳା ଭୁଏଁ, ଉର୍ମିଳା ମେହେର, ଶକୁନ୍ତଳା ଦାସ, କୌଶଲ୍ୟା ମେହେର, ମନ୍ଦୋଦରୀ ମେହେର ପ୍ରମୁଖଙ୍କ ସହ ଶତାଧିକ ମହିଳା ଓ ଗ୍ରାମବାସୀଙ୍କ ସ୍ୱାକ୍ଷର ସମ୍ବଳିତ ଦାବିପତ୍ର ଜିଲାପାଳଙ୍କୁ ପ୍ରଦାନ କରାଯାଇଥିଲା।
ଦାବିପତ୍ର ଗ୍ରହଣ କରି ଜିଳାପାଳ ନୃପରାଜ ସାହୁ ଘଟଣାର ଗୁରୁତ୍ୱକୁ ବିଚାର କରି ତିନି ଦିନ ମଧ୍ୟରେ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିବା ସୂଚନା ଗ୍ରାମବାସୀ ପ୍ରକାଶ କରିଛନ୍ତି।
