ଗଞ୍ଜାମ,୧୭ା୮(ଡି.ଏନ୍.ଏ.): ମହାମାରୀ କରୋନା ଯୋଗୁ ସରକାର ବିଭିନ୍ନ ଭତ୍ତା ଆଗୁଆ ୪ ମାସର ହିତାଧିକାରୀଙ୍କୁ ପ୍ରଦାନ କରିଛନ୍ତି। ବର୍ତ୍ତମାନ କରୋନା ସାମାନ୍ୟ ଥମିଥିଲେ ମଧ୍ୟ ଚଳିତ ମାସ ଭତ୍ତା ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ପଠାଯିବା ବ୍ୟବସ୍ଥା କରାଯାଇଥିବା ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ପ୍ରଭୁ କଲ୍ୟାଣ ଦାସ କହିଛନ୍ତି। ପ୍ରଥମ ଥର ପାଇଁ ଏହି ବ୍ୟବସ୍ଥା କରାଯାଇଛି ବୋଲି ସେ କହିଛନ୍ତି। ଯେଉଁମାନେ ଆଧାର କାର୍ଡ ଓ ଆକାଉଣ୍ଟ ନମ୍ବର ଦେଇନାହାନ୍ତି ସେମାନଙ୍କ ଘରକୁ ଏନ୍ଏସି କର୍ମଚାରୀ ଯାଇ ଭତ୍ତା ଟଙ୍କା ପ୍ରଦାନ କରିବେ ବୋଲି ସେ କହିଛନ୍ତି। କୋଭିଡ୍ ମୁକାବିଲାକୁ ସ୍ଥାନୀୟ ପ୍ରଶାସନ ସୂଚାରୁରୂପେ ତୁଲାଇ ଆସିଥିବା ଯୋଗୁ ଏହି ଏନ୍ଏସି ଅଞ୍ଚଳରେ କରୋନା ଆକ୍ରାନ୍ତଙ୍କ ସଂଖ୍ୟା କମ୍ ରହିଛି। ଗତ ଜୁନ ୪ ତାରିଖରେ ଏହି ଏନ୍ଏସିରେ ପ୍ରଥମ କରୋନା ଆକ୍ରାନ୍ତ ଚି଼ହ୍ନଟ ହୋଇଥିବା ବେଳେ ଅଗଷ୍ଟ ଶେଷ ସୁଦ୍ଧା ୫୪ ଜଣ ପଜିଟିଭ୍ ଥିବା ଏନ୍ଏସି ପ୍ରଶାସନ ପକ୍ଷରୁ କୁହାଯାଇଛି। ସେଥିରୁ ୧୭ ଆକ୍ଟିଭ କେସ୍ ଥିବା ବେଳେ ସୁସ୍ଥହାର ୬୬ ପ୍ରତିଶତ ଥିବା ଜଣାପଡ଼ିଛି। ଏଥିପାଇଁ ସ୍ଥାନୀୟ ପ୍ରଶାସନ ତଥା ଏନ୍ଏସି ଇଓ ଦାସଙ୍କ ସମେତ ତହସିଲଦାର ଅବନୀ କୁମାର ସାହୁ, ଥାନା ଆଇଆଇସି ଦିଲ୍ଲୀପ କୁମାର ସାହୁ ପ୍ରମୁଖ କରୋନା ଯୋଦ୍ଧାଙ୍କ ପାଇଁ ଗଞ୍ଜାମ ସହରରେ କରୋନା ଆକ୍ରାନ୍ତ ସଂଖ୍ୟା ଦୁଇ ଅଙ୍କରେ ସୀମିତ ରହିଥିବା ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି।
