ଗାନ୍ଧୀନଗର,୨୪।୨: ଗଣତାନ୍ତ୍ରିକ ବ୍ୟବସ୍ଥାରେ ଉଭୟ ଶାସକ ଏବଂ ବିରୋଧୀ ଦଳର ଗୁରୁତ୍ୱ ସମାନ। ଯେଉଁଥିରେ କି ଶାସକ ଦଳ ନୀତି ଏବଂ ଯୋଜନା ମାଧ୍ୟମରେ ବିକାଶର ନୂତନ ଦିଗ ସୃଷ୍ଟି କରିବାକୁ ଆଲୋଚନା କରୁଥିବାବେଳେ ବିରୋଧୀ ତ୍ରୁଟି ଗଣନା କରି ସରକାରଙ୍କ ଉପରେ ଚାପ ପକାଇଥାନ୍ତି। କିନ୍ତୁ ଯଦି କୌଣସି ରାଜ୍ୟ ବିଧାନସଭାରେ ବିରେଧୀ ଦଳ ନେତା ନ ଥାନ୍ତି ତେବେ କ’ଣ ହେବ ଥରେ ଭାବନ୍ତୁ ତ। ଗୁଜରାଟ ବିଧାନସଭାରେ ସେଭଳି ପରିସ୍ଥିତି ଦେଖିବାକୁ ମିଳିଛି।
ବର୍ତ୍ତମାନ ରାଜ୍ୟରେ ବିଧାନସଭା ଅଧିବେଶନ ଚାଲିଛି। ଶାସକ ଦଳ ସାମ୍ନାରେ କଂଗ୍ରେସ ଏବଂ ଆମ ଆଦମୀ ପାର୍ଟି ବିରୋଧୀ ଭୂମିକାରେ ଅଛନ୍ତି। ହେଲେ ବିରୋଧୀ ଦଳର ନେତା ନାହାନ୍ତି। କାରଣ ବିରୋଧୀଦଳର ନେତା ହେବାକୁ ହେଲେ ଯେକୌଣସି ଦଳ ମୋଟ ଆସନର ୧୦ ପ୍ରତିଶତ ପାଇବା ଉଚିତ। କିନ୍ତୁ ଗୁଜରାଟର କଂଗ୍ରେସ ଏବଂ ଆମ ଆଦମୀ ପାର୍ଟି ସେହି ସର୍ତ୍ତ ପୂରଣ କରିପାରୁନାହାନ୍ତି। ଫେବୃୟାରୀ ୨୩, ବଜେଟ ଅଧିବେଶନର ପ୍ରଥମ ଦିନରେ କଂଗ୍ରେସ ଅମିତ ଚାଓ୍ବଡାଙ୍କୁ ବିରୋଧୀଦଳର ନେତା କରାଯାଉ ବୋଲି ବାଚସ୍ପତି ଶଙ୍କର ଲାଲ ଚୌଧୁରୀଙ୍କୁ ଅନୁରୋଧ କରିଥିଲା। ହେଲେ ସେଭଳି ନିୟମ ନ ଥିବା ଦର୍ଶାଇ ବାଚସ୍ପତି ଆବେଦନକୁ ପ୍ରତ୍ୟାଖ୍ୟାନ କରିଥିଲେ।
ବିରୋଧୀ ଦଳର ନେତା ହେବାର ନିୟମ:
ଗୁଜୁରାଟ ବିଧାନସଭାରେ ମୋଟ ୧୮୨ ଟି ଆସନ
ବିରୋଧୀଦଳର ନେତା ମାନ୍ୟତା ପାଇବାକୁ ୧୦ ପ୍ରତିଶତ ସିଟ ଆବଶ୍ୟକ
ଏହି ନିୟମ ଅନୁଯାୟୀ କଂଗ୍ରେସରେ ୧୮ ଜଣ ବିଧାୟକ ରହିବା ଉଚିତ। କିନ୍ତୁ କଂଗ୍ରେସ ମାତ୍ର ୧୭ ଟି ଆସନ ପାଇବାରେ ସଫଳ ହୋଇଛି।
୧୯୮୫ ରେ ଜନତା ପାର୍ଟି କଂଗ୍ରେସ ସମ୍ମୁଖରେ ବିରୋଧୀ ଦଳ ଭାବେ ଥିଲା। ଜନତା ପାର୍ଟି ନିକଟରେ ବିରୋଧୀଦଳର ନେତା ମାନ୍ୟତା ପାଇବାକୁ ମଧ୍ୟ ପର୍ଯ୍ୟାପ୍ତ ସଂଖ୍ୟା ନଥିଲା। ସେତେବେଳେ ବିଧାନସଭା ବାଚସ୍ପତି ଜନତା ଦଳକୁ ନିରାଶ କରି ନ ଥିଲେ। ଏବେ କିନ୍ତୁ ବାଚସ୍ପତିଙ୍କ ନିଷ୍ପତ୍ତିକୁ ନେଇ କଂଗ୍ରେସ ନେତା ମନୀଷ ଦୋଶି କହିଛନ୍ତି ଯେ ଭାଜପା ଏଭଳି ନିଷ୍ପତ୍ତି ନେଇପାରିଥାନ୍ତା। କିନ୍ତୁ ସେମାନେ ଆମର ଆବେଦନକୁ ପ୍ରତ୍ୟାଖ୍ୟାନ କଲେ। ଯଦିଓ ତାଙ୍କ ଦଳ ବିରୋଧୀ ଦଳର ନେତା ପଦବୀ ପାଇନାହାନ୍ତି, ତଥାପି ପୂର୍ବ ଭଳି ଜନସାଧାରଣଙ୍କ ସ୍ବାର୍ଥର ପ୍ରସଙ୍ଗ ଉଠାଇବେ ବୋଲି ମନୀଷ କହିଛନ୍ତି।
