ଡେରାବିଶ, ୧୫ା୮(ସ୍ବ.ପ୍ର.): ଲଘୁଚାପଜନିତ ଲଗାଣ ବର୍ଷାରେ ମହାନଦୀ ସିଷ୍ଟମ୍ରେ ବନ୍ୟା ଆଶଙ୍କା ଦେଖାଦେଇଛି। ହୀରାକୁଦ ଡ୍ୟାମ୍ରୁ ଖୋଲାଯାଇଥିବା ୩୪ଟି ଗେଟ୍ ଯୋଗେ ପ୍ରବାହିତ ହେଉଥିବା ବନ୍ୟା ଜଳ ରବିବାର ସୁଦ୍ଧା ନରାଜଠାରେ ପହଞ୍ଚତ୍ଛି। ଏହି ବିନ୍ୟାଜଳ ନରାଜରୁ ନିଷ୍କାସନ ହେବା ପରେ ମହାନଦୀର ବିଭିନ୍ନ ଶାଖା ନଦୀ ଦେଇ ପ୍ରବାହିତ ହେବ। ଲୁଣା ଓ କରାଣ୍ଡିଆ ନଦୀରେ ଏହି ବନ୍ୟାଜଳ ପହଞ୍ଚତ୍ବା ପରେ ବନ୍ୟା ଆଶଙ୍କା ଥିବାରୁ ଡେରାବିଶ ବ୍ଲକ ଅଧୀନ ମୁକୁନ୍ଦପୁର, ଯଅଁରାବାରିମୂଳ, ହରିଅଙ୍କ, ଦାନପୁର, ଇନ୍ଦାଳୋ, ବସୁପୁର ପଞ୍ଚାୟତର ନଦୀକୂଳବାସୀ ଆତଙ୍କିତ ଅବସ୍ଥାରେ ଅଛନ୍ତି। ସମ୍ଭାବ୍ୟ ବନ୍ୟାକୁ ଦୃଷ୍ଟିରେ ରଖି କେନ୍ଦ୍ରାପଡ଼ା ଜିଲା ବନ୍ୟା ନିୟନ୍ତ୍ରଣ ଦାୟିତ୍ୱରେ ଥିବା ଜଳସମ୍ପଦ ବିଭାଗର ସହକାରୀ ମୁଖ୍ୟ ଯନ୍ତ୍ରୀ ପୂର୍ଣ୍ଣଚନ୍ଦ୍ର ରଥ ଓ କେନ୍ଦ୍ରାପଡ଼ାର ବିଭାଗୀୟ ଅଧୀକ୍ଷଣ ଯନ୍ତ୍ରୀ ଉମେଶ ଚନ୍ଦ୍ର ସେଠୀ, ସହକାରୀ ନିର୍ବାହୀ ଯନ୍ତ୍ରୀ ପ୍ରମୋଦ କୁମାର ରାୟଙ୍କ ସମେତ ବିଭାଗୀୟ କନିଷ୍ଠ ଯନ୍ତ୍ରୀମାନେ ରବିବାର ଲୁଣା ନଦୀବନ୍ଧ ପରିଦର୍ଶନ କରିଛନ୍ତି। ନଦୀବନ୍ଧର ଦୁର୍ବଳ ଥିବା ସ୍ଥାନରେ ବାଲିବସ୍ତା ମହଜୁଦ୍ ରଖାଯାଇଥିବା ଅଧୀକ୍ଷଣ ଯନ୍ତ୍ରୀ ସୂଚନା ଦେଇଛନ୍ତି। ତେବେ ଏହି ବନ୍ୟା ପାଇଁ ସାଧାରଣ ଲୋକେ ଆତଙ୍କିତ ନ ହେବା ଲାଗି ବିଭାଗ ପକ୍ଷରୁ ସୂଚନା ଦିଆଯାଇଛି। ଲୁଣା ଓ କରାଣ୍ଡିଆ ନଦୀରେ ବନ୍ୟା ହେଲେ ବସୁପୁର ପଞ୍ଚାୟତର ଢିଅବସୁପୁର ଓ ଇନ୍ଦାଳୋ ପଞ୍ଚାୟତର ପୁରୁଷୋତ୍ତମପୁର ଗ୍ରାମ ବିଶେଷ କ୍ଷତିଗ୍ରସ୍ତ ହେବା ଆଶଙ୍କା ଥିବାରୁ ପ୍ରଶାସନ ପକ୍ଷରୁ ଏହି ଦୁଇ ଗ୍ରାମ ପାଇଁ ସତର୍କ ଦୃଷ୍ଟି ରଖାଯାଇଛି। ଲୁଣାନଦୀର ପୁବଂଶଠାରେ ବିପଦସଙ୍କେତ ୩୫.୨୮ ଫୁଟ ରହିଥିବା ବେଳେ ଏଠାରେ ୨୮.୫୮ ଫୁଟ ବନ୍ୟାଜଳ ପ୍ରବାହିତ ହେଉଛି। ସେହିପରି ଦାନପୁରଠାରେ ବିପଦସଙ୍କେତ ୩୨.୫୫ ରହିଥିବା ବେଳେ ୨୬.୯୦ ଫୁଟ ବନ୍ୟାଜଳ ପ୍ରବାହିତ ହେଉଛି। ସେହିପରି ବସୁପୁରଠରେ ବିପଦସଙ୍କେତ ୩୦ ଫୁଟ ରହିଥିବା ବେଳେ ରବିବାର ଅପରାହ୍ନ ସୁଦ୍ଧା ୨୭ ଫୁଟ ଜଳ ପ୍ରବାହିତ ହେଉଥିବା ଅଧୀକ୍ଷଣ ଯନ୍ତ୍ରୀ ସେଠୀ ସୂଚନା ଦେଇଛନ୍ତି। ତେବେ ପାଣିପାଗ ବିଭାଗ ପକ୍ଷରୁ ମହାନଦୀର ଉପରମୁଣ୍ଡ ଓ ଉପକୂଳବର୍ତ୍ତୀ ଜିଲାଗୁଡ଼ିକରେ ଆଉ ୨ ଦିନ ବର୍ଷାର ପ୍ରଭାବ ରହିବ ବୋଲି ସତର୍କ ସୂଚନା ଦିଆଯାଇଛି। ଡେରାବିଶ ବ୍ଲକ ଅଞ୍ଚଳର ନଦୀକୂଳିଆ ଗ୍ରାମବାସୀ ସମ୍ଭାବ୍ୟ ବନ୍ୟା ନେଇ ଆଶା ଆଶଙ୍କାରେ ଦିନ କାଟୁଛନ୍ତି।
