କେନ୍ଦୁଝର,୧୦ା୩ (ସ୍ବ.ପ୍ର.): କେନ୍ଦୁଝର ଚିଫ ଜୁଡିସିଆଲ ମାଜିଷ୍ଟ୍ରେଟ ରଞ୍ଜୁଲତା ଲେଙ୍କା ଏକ ମରଣାନ୍ତକ ଆକ୍ରମଣ ଘଟଣାର ବୁଧବାର ରାୟ ଶୁଣାଇ ଅଭିଯୁକ୍ତ ଲଛମନ ପରିଡାଙ୍କୁ ୫ବର୍ଷ ସଶ୍ରମ କାରାଦଣ୍ଡ ଶୁଣାଇଛନ୍ତି। ଜରିମାନା ଅନାଦାୟ ଅତିରିକ୍ତ ୬ ମାସ ଜେଲ ଦଣ୍ଡ ଭୋଗିବାକୁ ପଡିବ ବୋଲି ରାୟରେ କୁହାଯାଇଥିବା ସରକାରୀ ବରିଷ୍ଠ ଆଇନଜୀବୀ ଅଶୋକ କୁମାର ଦାସ ସୂଚନା ଦେଇଛନ୍ତି।
ଘଟଣାରୁ ପ୍ରକାଶ ଯେ, ୨୦୧୪ ମସିହା ମେ’ ୨୮ ତାରିଖ ମଧ୍ୟାହ୍ନରେ ପଣ୍ଡାପଡା ଥାନା ଅନ୍ତର୍ଗତ ଖୁଦପଶି ଗ୍ରାମର ଅଲେଖ ପରିଡା ପୋଖରୀରୁ ଗାଧୋଇ ଫେରୁଥିବାବେଳେ ପୂର୍ବ ଶତ୍ରୁତାକୁ ନେଇ ଉକ୍ତ ଗ୍ରାମର ଲଛମନ ଓ ତାଙ୍କ ପୁଅ ଶାନ୍ତନୁ ତାଙ୍କ ଉପରକୁ ପଥର ପକାଇ ଆକ୍ରମଣ କରିଥିଲେ। ଏହାର ପ୍ରତିରୋଧ କରିବାରୁ ଲଛମନ ଧରିଥିବା ବନ୍ଧୁକରୁ ଅଲେଖଙ୍କ ଉପରକୁ ଗୁଳି ଚଳାଇଥିଲେ। ଏଥିରେ ଅଲେଖ ଗୁରୁତର ହୋଇ କେନ୍ଦୁଝର ମୁଖ୍ୟ ଚିକିସତ୍ାଳୟ ଏବଂ ପରେ କଟକ ବଡ ଡାକ୍ତରଖାନାରେ ଚିକିତ୍ସିତ ହୋଇଥିଲେ। ଏନେଇ ଅଲେଖଙ୍କ ସ୍ତ୍ରୀ କୌତୁକୀ ପଣ୍ଡାପଡା ଥାନାରେ ଏତଲା ଦେଇଥିଲେ। ପଣ୍ଡାପଡା ପୋଲିସ ଏକ ମାମଲା (ନଂ ୩୩/୨୦୧୪) ରୁଜୁ କରି ଲଛମନ ଏବଂ ଶାନ୍ତନୁଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ବୁଧବାର ୧୩ ଜଣ ସାକ୍ଷୀ ଓ ପୋଲିସ ତଦନ୍ତ ରିପୋର୍ଟକୁ ଆଧାର କରି ସିଜେଏମ କୋର୍ଟ ଲଛମନଙ୍କୁ ୫ବର୍ଷ କାରାଦଣ୍ଡ ସହିତ ୨ହଜାର ଟଙ୍କା ଜରିମାନା ଆଦେଶ ଶୁଣାଇଛନ୍ତି। ପ୍ରମାଣ ଅଭାବରୁ କୋର୍ଟ ଶାନ୍ତନୁଙ୍କୁ ନିର୍ଦ୍ଦୋଷରେ ଖଲାସ କରିଛି।
