ଚଣ୍ଡିଖୋଲ,୮ା୩(ପ୍ରଦୀପ୍ତ କୁମାର ପୃଷ୍ଟି): ମହା ଶିବରାତ୍ରି ଜାଗର ଅବସରରେ ଯାଜପୁର ଜିଲାର ପ୍ରସିଦ୍ଧ ଶୈବ ପୀଠ ମହାବିନାୟକ ମନ୍ଦିରରେ ନିଆରା ପରମ୍ପରା ଦେଖିବାକୁ ମିଳିଥାଏ। ପ୍ରସିଦ୍ଧ ଶୈବ ପୀଠ ହେଇଥିଲେ ମଧ୍ୟ ପୁତ୍ର ମହାବିନାୟକଙ୍କ ନାମରେ ନାମିତ ମନ୍ଦିରରେ ପଞ୍ଚ ଦେବତା ଗଣେଶ, ବିଷ୍ଣୁ, ଦୁର୍ଗା, ସୂର୍ଯ୍ୟଦେବ ଓ ମହାଦେବ ପୂଜା ପାଇଥାନ୍ତି। ମହାଶିବରାତ୍ରିରେ ରାତ୍ରିର ତୃତୀୟ ପ୍ରହରରେ ପ୍ରଭୁ ଚନ୍ଦ୍ରଶେଖର ୩ ଥର ବେଢ଼ା ପରିକ୍ରମା କରିବା ପରେ ମହାଦୀପ ଉଠିଥାଏ। ଭକ୍ତମାନେ ମହାଦୀପ ଉଠିବାକୁ ଚାତକ ପରି ଚାହିଁ ରହି ଥାଆନ୍ତି। ଏଠାରେ ଗୋଟିଏ ମନ୍ତ୍ରରେ ପଞ୍ଚ ଦେବତାଙ୍କୁ ପୂଜା କରାଯାଏ ଏବଂ ସମସ୍ତେ ରାତି ସାରା ଉଜାଗର ରହିଥାନ୍ତି। ଆଉ ଏକ ନିଆରା ପରମ୍ପରା ଦେଖିବାକୁ ମିଳିଥାଏ ଯାହା ହେଉଛି ମହାଶିବରାତ୍ରି ୨ ଦିନ ପୂର୍ବରୁ ନାରାୟଣଙ୍କ ଉଦ୍ଦେଶ୍ୟରେ ମହାଯଜ୍ଞ ଆୟୋଜନ ହୋଇଥାଏ। ମହାଶିବରାତ୍ରିର ୨ ଦିନ ପରେ ପୂର୍ଣ୍ଣାହୁତି ହୋଇଥାଏ। ଜାଗର ଦିନ ପ୍ରାତଃ ୪ଟାରୁ ମଙ୍ଗଳ ଆଳତି, ବଡ଼ସିଂହାର ବେଶ, ଧୂପ ଲାଗି ପରେ ନୀତି ଭୋଗ ଓ ବାଲ୍ୟ ଭୋଗ କରାଯାଇଥାଏ। ସାରୁ ୪ ପ୍ରହର ଭିନ୍ନ କ୍ରମେ ପୂଜା କରାଯା ଥାଏ। ପ୍ରତ୍ୟେକ ପ୍ରହରରେ ଲଡୁ ଓ ପଣା ପ୍ରଦାନ କରାଯାଇ ଘର୍ଷଣ କରାଯିବା ସହ ମହାସ୍ନାନ, ମଙ୍ଗଳା ଆଳତୀ ଓ ଧୂପ ଲାଗି କରାଯାଇଥାଏ। ଚଳିତ ବର୍ଷ ଶୁକ୍ରବାର ମହା ଶିବରାତ୍ରି ପାଳନ କରାଯାଉଥିବାରୁ ଜିଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଦିନତମାମ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ପୋଲିସ ପକ୍ଷରୁ ଜଣେ ଅତିରିକ୍ତ ଏସ୍ପିଙ୍କ ନେତୃତ୍ୱରେ ବ୍ୟାପକ ପୋଲିସ ଫୋର୍ସ ମୁତୟନ ହେବେ ବୋଲି ସୂଚନା ମିଳିଛି। ମହାପ୍ରଭୁଙ୍କ କୃପାରୁ ଶାନ୍ତି ଶୃଙ୍ଖଳାର ସହ କାର୍ଯ୍ୟ ହୋଇଥାଏ ବୋଲି ମନ୍ଦିର ଟ୍ରଷ୍ଟି ଧନେଶ୍ୱର ସାମଲ ପ୍ରକାଶ କରିଛନ୍ତି।
