ଚିତ୍ରକୋଣ୍ଡା, ୫।୮(ଶିବଦତ୍ତ ସାହୁ): ମାଲକାନଗିରି ଜିଲା ଚିତ୍ରକୋଣ୍ଡା ଥାନା ଅଧୀନ ପେଟିଆଗୁଡା ଗ୍ରାମରେ ଘରୋଇ କଳହକୁ ନେଇ ସୋମବାର ରାତିରେ ଏକ ହତ୍ୟାକାଣ୍ଡ ଘଟିଛି। ଗ୍ରାମର ଶୁକ ରାସପେଦାଙ୍କ ଦ୍ୱିତୀୟ ସ୍ତ୍ରୀଙ୍କ ଆକ୍ରମଣରେ ପ୍ରଥମ ସ୍ତ୍ରୀ ସୁନିତା ରାସପେଦାଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି। ଏନେଇ ଶୁକ ଚିତ୍ରକୋଣ୍ଡା ଥାନାରେ ଅଭିଯୋଗ କରିଥିଲେ। ମାମଲା(ନଂ.୧୭୭/୨୬) ରୁଜୁ କରି ପୋଲିସ ଦ୍ୱିତୀୟ ସ୍ତ୍ରୀ ସିଲିମା ରାସପେଦାଙ୍କୁ ମଙ୍ଗଳବାର ଗିରଫ କରି କୋର୍ଟଚାଲାଣ କରିଛି। ସୂଚନା ଅନୁଯାୟୀ, ଶୁକ ରାସପେଦା ୨ ଜଣ ସ୍ତ୍ରୀଙ୍କ ସହିତ ରହୁଥିଲେ। ସୋମବାର ରାତିରେ ୨ ସ୍ତ୍ରୀଙ୍କ ମଧ୍ୟରେ ବଚସା ହେବା ସହିତ ଉଭୟଙ୍କ ମଧ୍ୟରେ ଠେଲାପେଲା ହୋଇଥିଲା। ଏହି ସମୟରେ ଦ୍ୱିତୀୟ ସ୍ତ୍ରୀ ସିଲିମା ହଠାତ ପ୍ରଥମ ସ୍ତ୍ରୀ ସୁନିତାଙ୍କୁ ଜୋରରେ ଠେଲି ଦେବାରୁ ସେ ସାମ୍ନାରେ ଥିବା କାନ୍ଥରେ ପିଟି ହୋଇଯାଇଥିଲେ। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା।
