ଗାଲେ,୧୬।୧(ପି.ଟି.): ଅଧିନାୟକ ଜୋ ରୁଟ୍ଙ୍କ ଅପରାଜିତ ଶତକ (୧୬୮*, ୨୫୪ ବଲ, ୧୨ ଚୌକା) ବଳରେ ଇଂଲଣ୍ଡ ଘରୋଇ ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟରେ ବୃହତ୍ ଅଗ୍ରଣୀ ହାସଲ କରି ସ୍ଥିତି ଦୃଢ କରିଛି। ଟସ୍ ଜିତ ଶ୍ରୀଲଙ୍କା ପ୍ରଥମ ଇନିଂସରେ ୪୬.୧ ଓଭରରେ ୧୩୫ ରନକରି ଅଲଆଉଟ ହୋଇଥ ତ୍ଲା। ଜବାବରେ ପ୍ରଥମ ଇନିଂସ ଆରମ୍ଭ କରି ଇଂଲଣ୍ଡ ଶୁକ୍ରବାର ବର୍ଷା ବାଧାପ୍ରାପ୍ତ ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୯୪ ଓଭରରେ ୪ ଉଇକେଟ ହରାଇ ୩୨୦ ରନ ସଂଗ୍ରହ କରିଛି। ଫଳରେ ୬ ଉଇକେଟ ହାତରେ ରଖି ଇଂଲଣ୍ଡ ଏବେ ୧୮୫ ରନର ଅଗ୍ରଣୀ ହାସଲ କରିଛି। ଷ୍ଟମ୍ପ ଅପସାରଣ ବେଳକୁ ରୁଟ୍ ୧୬୮ ଓ ଉଇକେଟକିପର ବ୍ୟାଟ୍ସମ୍ୟାନ ଜୋଶ ବଟଲର ୭ ରନ କରି ଅପରାଜିତ ରହିଛନ୍ତି।
ଅସମାପ୍ତ ପ୍ରଥମ ଇନିଂସ ସ୍କୋର ୧୨୭/୨ରୁ ଖେଳ ଆରମ୍ଭ କରିଥିଲା ଇଂଲଣ୍ଡ। ଓଭରନାଇଟ୍ ବ୍ୟାଟ୍ସମ୍ୟାନ ରୁଟ ୬୬ରୁ ଖେଳ ଆରମ୍ଭ କରି କ୍ୟାରିୟରର ୧୮ତମ ଟେଷ୍ଟ ଶତକ ହାସଲ କରିଥିଲେ। ଏହାପୂର୍ବରୁ ରୁଟ୍ ୨୦୧୯ରେ ହାମିଲଟନରେ ନ୍ୟୁଜିଲାଣ୍ଡ ବିପକ୍ଷରେ ୨୨୬ ରନକରି ଶେଷଥର ପାଇଁ ଶତକ ଅର୍ଜନ କରିଥିଲେ। ସେହିପରି ଜନି ବେୟାରଷ୍ଟୋ ଓଭରନାଇଟ ସ୍କୋର ୪୭ରେ ଅଧିକ ରନ୍ ସଂଗ୍ରହ କରି ନ ପାରି ଲାସିଥ ଏମ୍ବୁଲଡେନିଆଙ୍କ ବଲ୍ରେ କୁଶଲ ମେଣ୍ଡିଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ପଦାର୍ପଣ କରିଥିବା ଏସେକ୍ସ ବ୍ୟାଟ୍ସମ୍ୟାନ ଡାନ ଲରେନ୍ସ ୧୫୦ ବଲର ସମ୍ମୁଖୀନ ହୋଇ ୬ ଚୌକା ଓ ୧ ଛକା ସହ ୭୩ ରନର ଇନିଂସ ଖେଳି ନିଜ ପ୍ରତିଭାର ପ୍ରମାଣ ଦେଇଛନ୍ତି। ସେ ଦିଲ୍ରିଓ୍ବାନ ପେରେରାଙ୍କ ବଲ୍ରେ କୁଶଲ ମେଣ୍ଡିସ୍ଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଚତୁର୍ଥ ଉଇକେଟରେ ରୁଟ୍ ଓ ଲରେନ୍ସ ୧୭୩ ରନ ସଂଗ୍ରହ କରିଥିଲେ। ସେହିପରି ତୃତୀୟ ଉଇକେଟରେ ରୁଟ୍ ଓ ବେୟାରଷ୍ଟୋ ୧୧୪ ରନ ସଂଗ୍ରହ କରି ଘରୋଇ ବୋଲରଙ୍କୁ ନିରାଶ କରିଥିଲେ। ବୋଲିଂରେ ଶ୍ରୀଲଙ୍କା ତରଫରୁ ଏମ୍ବୁଲଡେନିଆ ସର୍ବାଧିକ ୩ ଓ ପେରେରା ଗୋଟିଏ ଉଇକେଟ ଅକ୍ତିଆର କରିଥିଲେ। ସ୍ପିନରଙ୍କ ଉପରେ ଆଧିପତ୍ୟ ବିସ୍ତାର କରି ରୁଟ୍ ଖେଳିଥିଲେ।
ସଂକ୍ଷିପ୍ତ ସ୍କୋର:
ଶ୍ରୀଲଙ୍କା ପ୍ରଥମ ଇନିଂସରେ ୪୬.୧ ଓଭରରେ ୧୩୫ ଅଲଆଉଟ।
ଇଂଲଣ୍ଡ ପ୍ରଥମ ଇନିଂସରେ ୯୪ ଓଭରରେ ୩୨୦/୪
(ରୁଟ୍- ୧୬୮*, ଲରେନ୍ସ- ୭୩, ବେୟାରଷ୍ଟୋ- ୪୭, ଏମ୍ମୁଲଡେନିଆ- ୩/୧୩୧, ପେରେରା- ୧/୮୨)।
