ପର୍ଥ,୨୩ା୧୧: ପର୍ଥରେ ଅନୁଷ୍ଠିତ ବର୍ଡର-ଗାଭାସ୍କର ଟ୍ରଫିର ପ୍ରଥମ ଟେଷ୍ଟରେ ଦୃଢ ସ୍ଥିତିରେ ରହିଛି ଭାରତ। ଯଶପ୍ରୀତ୍ ବୁମ୍ରାଙ୍କ ୫ ଉଇକେଟ ସଫଳତା, ଅଷ୍ଟ୍ରେଲିଆ ମାଟିରେ ଜୟସ୍ବାଲଙ୍କ ପ୍ରଥମ ଅର୍ଦ୍ଧଶତକ ବଳରେ ଭାରତ ଦ୍ୱିତୀୟ ଦିନର ଷ୍ଟମ୍ପସ ବେଳକୁ ୨୧୮ ରନ୍ରେ ଆଗୁଆ ରହିଛି। ପ୍ରଥମ ଇନିଂସରେ ଅଷ୍ଟ୍ରେଲିଆକୁ ମାତ୍ର ୧୦୪ ରନ୍ରେ ସୀମିତ ରଖିବା ପରେ ଦ୍ୱିତୀୟ ଦିନର ଷ୍ଟମ୍ପ ଅପସାରଣ ବେଳକୁ ଭାରତ ବିନା କ୍ଷତିରେ ୧୭୨ ରନ୍ ସଂଗ୍ରହ କରିଛି। ଫଳରେ ହାତରେ ୧୦ ଉଇକେଟ ରହିଥିବା ବେଳେ ଭାରତ ୨୧୮ ରନ୍ରେ ଆଗୁଆ ରହିଛି। ପ୍ରଥମ ଦିନରେ ଭାରତ ୧୫୦ ରନ୍ରେ ସମସ୍ତ ଉଇକେଟ ହରାଇଥିବା ବେଳେ ଘରୋଇ ଦଳ ୬ ୭ ଉଇକେଟ ହରାଇ ସଙ୍କଟରେ ପଡିଥିଲା।
ପ୍ରଥମ ଦିନର ଅସମାପ୍ତ ସ୍କୋର ୬୭/୭ରୁ ଖେଳ ଆରମ୍ଭ କରି ଅଷ୍ଟ୍ରେଲିଆ ଆଉ ମାତ୍ର ୩୭ ରନ୍ ଯୋଡି ପାରିଥିଲା। ପୂର୍ବ ଦିନର ଅପରାଜିତ ବ୍ୟାଟର ଆଲେକ୍ସ କେରୀ ଦଳୀୟ ସ୍କୋରରେ ୩ ରନ୍ ଯୋଡି ପ୍ୟାଭିଲିୟନ ଫେରିଥିଲେ। କେରୀଙ୍କୁ ଆଉଟ କରିବା ସହ ବୁମ୍ରା ନିଜର ୫ ଉଇକେଟ ସଫଳତା ପୂରଣ କରିଥିଲେ। ତେବେ ନିମ୍ନକ୍ରମରେ ମିଚେଲ୍ ଷ୍ଟାର୍କ ଲଢୁଆ ୨୬ ରନ୍ କରିବାରୁ ଅଷ୍ଟ୍ରେଲିଆ ୧୦୪ ରନ୍ରେ ଅଲଆଉଟ ହୋଇଥିଲା। ଅଷ୍ଟ୍ରେଲୀୟ ଇନିଂସର ଟପ୍ ସ୍କୋରର ରହିଥିବା ଷ୍ଟାର୍କ ୧୧୨ ବଲ୍ ଖେଳି ୨ ଚୌକା ସହ ୨୬ ରନ୍ କରିଥିଲେ। ଅନ୍ୟ ମାନଙ୍କ ମଧ୍ୟରେ ଆଲେକ୍ସ କେରୀ ୨୧, ଟ୍ରାଭିସ୍ ହେଡ୍ ୧୧ ଓ ନାଥାନ ମ୍ୟାକ୍ସୁଇନି ୧୦ ୨ ଅଙ୍କ ସ୍କୋର ଛୁଇଁ ପାରିଥିଲେ। ୭ ଜଣ ବ୍ୟାଟର ୨ ଅଙ୍କ ଛୁଇଁ ପାରି ନ ଥିବା ବେଳେ ଭାରତୀୟ ଅଧିନାୟକ ଯଶପ୍ରୀତ୍ ବୁମ୍ରା ୧୧ତମ ଥର ପାଇଁ ଟେଷ୍ଟ କ୍ରିକେଟରେ ୫ ଉଇକେଟ ସଫଳତା ଅର୍ଜନ କରିଥିଲେ। ଅନ୍ୟମାନଙ୍କ ମଧ୍ୟରେ ଡେବ୍ୟୁଟାଣ୍ଟ ହର୍ଷିତ ରାଣା ୩ ଓ ମହମ୍ମଦ ସିରାଜ ୨ଟି ଲେଖାଏ ଉଇକେଟ ନେଇଥିଲେ।
୪୬ ରନ୍ରେ ଆଗୁଆ ରହିଥିବା ଭାରତର ଦ୍ୱିତୀୟ ଇନିଂସ ବେଶ ପ୍ରଭାବୀ ରହିଥିଲା। ଯଶସ୍ବୀ ଜୟସ୍ବାଲ ଓ ଲୋକେଶ ରାହୁଲ ଦୁଇଟି ସେସନ ମିଳିତ ଭାବରେ ବ୍ୟାଟିଂ କରିଥିଲେ। ଉଭୟ ଖେଳାଳି ନିଜର ଅର୍ଦ୍ଧଶତକ ପୂରଣ କରିଥିବା ବେଳେ ଭାରତ ଦ୍ୱିତୀୟ ଦିନର ଷ୍ଟମ୍ପସ ବେଳକୁ ବିନା କ୍ଷତିରେ ୧୭୨ ରନ୍ କରିଛି। ଯଶସ୍ବୀ ଜୟସ୍ବାଲ ପ୍ରଥମ ଇନିଂସ ବିଫଳତାକୁ ପଛରେ ପକାଇ ଅର୍ଦ୍ଧଶତକ ହାସଲ କରିଥିଲେ। ଷ୍ଟମ୍ପସ ବେଳକୁ ଜୟସ୍ବାଲ ୯୦ ଓ ଲୋକେଶ ରାହୁଲ ୬୨ ରନରେ ବ୍ୟାଟିଂ କରୁଛନ୍ତି।
