ଦାରିଙ୍ଗବାଡି, ୬।୧୧ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସଭାଗୃହ ପରିସରରେ ଗୁରୁବାର ଅପରାହ୍ନରେ ଶୀତ ମହୋତ୍ସବ ନ ପାଇଁ ପ୍ରଥମ ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ଶୀତ ମହୋତ୍ସବ କମିଟିର ସମ୍ପାଦକ ତଥା ବିଡିଓ ପ୍ରୀତିରଞ୍ଜନ ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବ୍ଲକ ଅଧ୍ୟକ୍ଷ ସୁଶାନ୍ତ କୁମର ପ୍ରଧାନ, ତହସିଲଦାର ଧୀରୋଜ ପାତ୍ର, ଆଇଆଇଆସି ଜୟନ୍ତ କୁମାର ସେଠି, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ଜାକେଶ ସାମନ୍ତରାୟ, ସିଡିପିଓ ସନ୍ଧ୍ୟାରାଣୀ ପଣ୍ଡା, ଜିଲାପରିଷଦ ସଦସ୍ୟ ରଞ୍ଜନ ପ୍ରଧାନ ପ୍ରମୁଖ ମଞ୍ଚାସିନ ରହିଥିଲେ। ଗତ ଶୀତ ମହୋତ୍ସବ ଭଳି ଚଳିତ ବର୍ଷ ଏହି ମହୋତ୍ସବକୁ ଆହୁରି ଆଡମ୍ବର ଭାବେ ପାଳନ କରାଯିବାକୁ ପ୍ରାଥମିକ ଭାବେ ଆଲୋଚନାରେ ନିଷ୍ପତ୍ତି ଗ୍ରହଣ କରାଯାଇଛି । ସେହିପରି ଶୀତ ମହୋତ୍ସବ ଗତ ୨୦୧୫ରେ ରାଜ୍ୟସ୍ତରୀୟ ଶୀତ ମହୋତ୍ସବ ଭାବେ ଆରମ୍ଭ ହୋଇଥିଲେ ସୁଦ୍ଧା ପରବର୍ତ୍ତୀ ସମୟରେ ଏହା ଆଉ ରାଜ୍ୟସ୍ତରୀୟ ଭାବେ ପାଳନ କରାଯାଇପାରିନଥିଲା । ତେଣୁ ବ୍ଲକ, ଜିଲା ଏବଂ ସ୍ଥାନୀୟ ବିଭିନ୍ନ ସଂଗଠନର ପ୍ରଚେଷ୍ଟାରେ ଏହି ମହୋତ୍ସବ ପାଳନ କରି ଆସୁଛି । ଏହା ଆରମ୍ଭ ହେବାର ଏକ ଦଶନ୍ଧି ବିତିଯାଇଛି । ତେଣୁ ଚଳିତ ବର୍ଷ ଏହି ମହୋତ୍ସବକୁ ପୁଣି ରାଜ୍ୟସ୍ତରୀୟ ମାନ୍ୟତା ଦେବାକୁ ବୈଠକରେ ସରକାରଙ୍କୁ ଅବଗତ କରାଇବାକୁ ନିଷ୍ପତ୍ତି ହୋଇଛି। ଦୀର୍ଘ ବର୍ଷ ହେଲା ଏହି ଦିବସପାଳନ କରାଯାଉଥିବାରୁ ଏହା ରାଜ୍ୟସ୍ତରୀୟ ମାନ୍ୟତା ପାଇବାର ଅଧିକାର ବୋଲି ବରିଷ୍ଠ ନାଗରିକ ସଙ୍ଘର ସଭାପତି ରମେଶ ଚନ୍ଦ୍ର ସାହୁ କହିଥିଲେ। ସେହିପରି ଏହି ମହୋତ୍ସବରେ ପ୍ରଥମ ଦିନ ଉଦ୍ଘାଟନୀ ଉତ୍ସବରେ ରାଜ୍ୟର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ମୁଖ୍ୟ ଅତିଥିଭାବେ ନିମନ୍ତ୍ରଣ ପାଇଁ ନିଷ୍ପତ୍ତି ଗ୍ରହଣ କରାଯାଇଛି । ସେହିପରି ଏହି ଶୀତ ମହୋତ୍ସବରେ କ’ଣ ତ୍ରୁଟି ରହିଛି ଓ ତାକୁ କିଭଳି ସଂଶୋଧନ କରାଯାଇପାରିବ ସେନେଇ ଆଲୋଚନା କରାଯାଇଛି । ସେହିପରି ଶୀତ ମହୋତ୍ସବ ପୂର୍ବରୁ ଦାରିଙ୍ଗବାଡିର ପରିବେଶ ଓ ପରିମଳ ବ୍ୟବସ୍ଥାକୁ ଗୁରୁତ୍ୱ ଦିଆଯାଇଛି। ସେହିପରି ସାଂସ୍କୃତିକ କାର୍ଯ୍ୟକ୍ରମରେ ଅଞ୍ଚଳର କଳାକାରଙ୍କୁ ଅଗ୍ରାଧିକାର ଦିଆଯିବାକୁ ଆଲୋଚନା ହୋଇଛି। ଏହାସହ ରାଜ୍ୟ ଓ ରାଜ୍ୟ ବାହାରୁ ମଧ୍ୟ କଳାକାରଙ୍କୁ ଆଣିବାକୁ ଆଲୋଚନା କରାଯାଇଛି। ସେହିପରି ଏହି ମହୋତ୍ସବ ପାଇଁ ଆବଶ୍ୟକ ଅନୁଦାନ ପାଇଁ ଜିଲାଠାରୁ ଆରମ୍ଭ କରି ରାଜ୍ୟ ପର୍ଯ୍ୟନ୍ତ ଅନୁଦାନ ପାଇଁ ନିବେଦନ କରାଯିବାକୁ ନିଷ୍ପତ୍ତି ଗ୍ରହଣ କରାଯାଇଛି । ୨୦୨୫/୨୦୨୬ ବର୍ଷ ଏହି ମହୋତ୍ସବ ପାଳନ ପାଇଁ ଆସନ୍ତା ଜାନୁଆରୀରେ ପୂର୍ବ ନିର୍ଦ୍ଧାରିତ ଦିନରେ କରାଯିବାକୁ ନିଷ୍ପତ୍ତି ହୋଇଛି। ବୈଠକରେ ସ୍ଥାନୀୟ ସରପଞ୍ଚ ସୁଶ୍ରୀ ଚନ୍ଦ୍ରିକା ମଲିକ,ଯୁବନେତା ହରେନ କୁମାର ସାହୁଙ୍କ ସମେତ ମିଟୁ ସାହୁ, ଆଇନଜୀି ପ୍ରଦୀପ ସାହୁ, ଲେଙ୍କା ପ୍ରଧାନ,ଜୟ ପଡ୍ରା, ପତିତପାବନ ରାଉତ, ଦିଲୀପ ସାହୁ, ସନ୍ତୋଷ ସାହୁ, ପ୍ରଭାକର ସାହୁ, ମଣ୍ଟୁ ସାହୁ, ସବୁଜ ବୈଦ୍ୟ ସଂଗଠନର ସମ୍ପାଦକ ଦିନବନ୍ଧୁ ମହାରଣା, ପ୍ରଶାନ୍ତ ସାହୁ, ଅରୁଣ ପ୍ରଧାନ, ମୁନା ସାହୁ,ଜାଗୃତିର ରତିକାନ୍ତ ପଟ୍ଟନାୟକ, ଅନ୍ତରଙ୍ଗ ଯୁବ ମହାସଙ୍ଘର ଧନେଶ୍ୱର ସାହୁ ଉପସ୍ଥିତ ଥିଲେ।
Dharitri – The Largest & Most Trusted Odia Daily
\
