ଯାଜପୁରରୋଡ୍,୨୧ା୮(ପବିତ୍ର ରଞ୍ଜନ ମହାନ୍ତି):ଭାରତୀୟ ଜାତୀୟ ରାଜପଥ କର୍ତ୍ତୃପକ୍ଷଙ୍କ ଦୂରଦୃଷ୍ଟ ଅଭାବ ଯୋଗୁ ଫାୟାର ଷ୍ଟେଶନ ଗୋଲେଇ ଛକ ମରଣଯନ୍ତା ପାଲଟିଛି। ୨ ବର୍ଷ ପୂର୍ବରୁ ୨୧୫ ଜାତୀୟ ରାଜପଥର ନାମ ପରିବର୍ତ୍ତନ କରାଯାଇ ଏହାକୁ ୨୦ନଂ. ଜାତୀୟ ରାଜପଥ ନାମକରଣ କରାଯାଇଛି। ଏହି ରାଜପଥଟି ୧୬ନଂ. ଜାତୀୟ ରାଜପଥର ପାଣିକୋଇଲିଠାରୁ ରଜାମୁଣ୍ଡା ପର୍ଯ୍ୟନ୍ତ ଏକ ଠିକା ସଂସ୍ଥା ଦ୍ୱାରା ସମ୍ପ୍ରସାରଣ କରାଯାଇଥିଲା। ହେଲେ ଏହି ଜାତୀୟ ରାଜପଥ ଦେଇ ଯାଜପୁରରୋଡ୍ ସହରକୁ ସଂଯୋଗ କରୁଥିବା ୨ ପ୍ରବେଶ ଦ୍ୱାର ବେଣାପୁର ଓ ଫାୟାର ଷ୍ଟେଶନ ଗୋଲେଇ ଛକ ନକ୍ସାରେ ତ୍ରୁଟି ପରିଲକ୍ଷିତ ହୋଇଥିଲା। ଏହି ତ୍ରୁଟି ଯୋଗୁ ଉଭୟ ସ୍ଥାନରେ ବାରମ୍ବାର ଦୁର୍ଘଟଣା ଘଟିବା ସହ ବହୁ ଧନଜୀବନ ହାନି ଘଟୁଛି। ସାମାଜିକ ସଂଗଠନଗୁଡ଼ିକ ଦ୍ୱାରା ବାରମ୍ବାର ଆନ୍ଦୋଳନ ପରେ ବେଣାପୁର ଛକଠାରେ ଏକ ଗଳିପୋଲ ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ହେଲେ ଫାୟାର ଷ୍ଟେଶନ ବାଇପାସ ଛକଟି ଗୁରୁତ୍ୱପୂର୍ଣ୍ଣ ହୋଇଥିଲେ ମଧ୍ୟ ରାଜପଥ କର୍ତ୍ତୃପକ୍ଷଙ୍କ ଦୃଷ୍ଟି ପଡ଼ୁନାହିଁ।
କଳିଙ୍ଗନଗର ଶିଳ୍ପାଞ୍ଚଳକୁ ସଂଯୋଗ କରୁଥିବା ବିଜୁ ପଟ୍ଟନାୟକ ମାର୍ଗ, ଯାଜପୁରରୋଡ୍, କେନ୍ଦୁଝର ତଥା ପାଣିକୋଇଲି ସହ କୋରେଇ ବ୍ଲକ ଆଦି ୫ଟି ରାସ୍ତାର ସଂଯୋଗସ୍ଥଳକୁ ନେଇ ଛକଟି ସବୁବେଳେ ଚଳଚଞ୍ଚଳ। ଯାନବାହନ ନିୟନ୍ତ୍ରଣ ପାଇଁ ଟ୍ରାଫିକ୍ ବ୍ୟବସ୍ଥା ନ ଥିବାରୁ ବହୁ ସମୟରେ ଏଠାରେ ଦୁର୍ଘଟଣା ଘଟି ଧନଜୀବନ ହାନି ହେଉଛି। ୨ ବର୍ଷ ମଧ୍ୟରେ ୩ଜଣ ବ୍ୟକ୍ତିଙ୍କ ମୃତ୍ୟୁ ହୋଇଥିବାବେଳେ ୨୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ବେପରୁଆ ଗାଡ଼ିଚାଳନା ପାଇଁ ଦୁର୍ଘଟଣା ଘଟୁଛି ବୋଲି ଅଭିଯୋଗ ହେଉଛି। ଦୈନିକ ସୁକିନ୍ଦା ଖଣି ଅଞ୍ଚଳ, କଳିଙ୍ଗନଗର ଶିଳ୍ପାଞ୍ଚଳ, କେନ୍ଦୁଝର ଖଣି ଅଞ୍ଚଳ ଓ ଅନ୍ୟାନ୍ୟ କାର୍ଯ୍ୟରେ ନିୟୋଜିତ ହଜାରହଜାର ଭାରିଯାନ ଏହି ଛକ ଦେଇ ଚଳାଚଳ କରିଥାନ୍ତି। ବସ୍ ଯାତ୍ରୀଙ୍କୁ ବିଭିନ୍ନ ସ୍ଥାନକୁ ଯିବାଆସିବା ପାଇଁ ଏହି ଛକ ଉପରେ ନିର୍ଭର କରିବାକୁ ପଡ଼ିଥାଏ। ତତ୍ସହିତ ବହୁ ଛୋଟ ଗାଡ଼ି, ବାଇକ୍ ଓ ସାଇକେଲ ଆରୋହୀ ଏହି ଛକ ଦେଇ ଯିବା ଆସିବା କରିଥାନ୍ତି। ନିକଟରେ ଥିବା ଯାଜପୁରରୋଡ୍ ଥାନା, ଶିକ୍ଷାନୁଷ୍ଠାନ, ଅଗ୍ନିଶମ ବିଭାଗ କାର୍ଯ୍ୟାଳୟକୁ ଲୋକେ ଏହି ବାଟେ ଯାତାୟାତ କରିଥାଆନ୍ତି, ଯଦ୍ଦ୍ବାରା ସବୁସମୟରେ ଟ୍ରାଫିକ ସମସ୍ୟା ସୃଷ୍ଟି ହୋଇଥାଏ। ମାତ୍ର ବାରମ୍ବାର ଦୃଷ୍ଟି ଆକର୍ଷଣ ସତ୍ତ୍ୱେ ଏଭଳି ଏକ ଗୁରୁତପୂର୍ଣ୍ଣ ଛକରେ ରାଜପଥ କର୍ତ୍ତୃପକ୍ଷ ଓ ଜିଲା ପ୍ରଶାସନ ଟ୍ରାଫିକ ସମସ୍ୟା ସମାଧାନ କ୍ଷେତ୍ରରେ ପଛଘୁଞ୍ଚା ଦେଉଥିବା ସାଧାରଣରେ ଅଭିଯୋଗ ହେଉଛି।
୪ ବର୍ଷ ତଳେ କୋରେଇ ସଂଗ୍ରାମ ସମିତି ବେଣାପୁର ଛକ ଓ ଫାୟାର ଷ୍ଟେଶନ ଛକରେ ଟ୍ରାଫିକ ପୋଷ୍ଟ ନିର୍ମାଣ ସହ ଗଳିପୋଲ ନିର୍ମାଣ ପାଇଁ ଧାରଣା ଦେଇଥିଲା। ପରେ ତତ୍କାଳୀନ କଳିଙ୍ଗନଗର ଏଡିଏମ୍ ଓ ଜାତୀୟ ରାଜପଥ କର୍ତ୍ତୃପକ୍ଷ ସଂଗ୍ରାମ ସମିତି ସହ ମିଳିତ ଆଲୋଚନା କରିଥିଲେ। ଆଲୋଚନାରେ ୨ ଛକର ତ୍ରୁଟିପୂର୍ଣ୍ଣ ନକ୍ସାକୁ ପରିବର୍ତ୍ତନ କରିବା ସହ ନୂତନ ନକ୍ସା କରାଯାଇ ବେଣାପୁରଠାରେ ଗଳିପୋଲ ନିର୍ମାଣ କରିବାକୁ ପ୍ରତିଶ୍ରୁତି ଦେଇଥିଲେ। ହେଲେ ଜାତୀୟ ରାଜପଥ କର୍ତ୍ତୃପକ୍ଷ ଗଳିପୋଲ ନିର୍ମାଣରେ ବିଳମ୍ବ କରିବାରୁ ଯାଜପୁର ଏମ୍ପି ଶର୍ମିଷ୍ଠା ସେଠୀ ଏଥିରେ ହସ୍ତକ୍ଷେପ କରିଥିଲେ। ପରେ ବେଣାପୁରଠାରେ ଗଳିପୋଲ କାର୍ଯ୍ୟ ଚାଲିଛି। ମାତ୍ର ଏହି ଛକଠାରୁ ଅଧିକ ଗୁରୁତ୍ୱପୂର୍ଣ୍ଣ ଫାୟାର ଷ୍ଟେଶନ ଛକକୁ ଅଦ୍ୟାବଧି ପ୍ରାଧାନ୍ୟ ଦିଆଯାଉନାହିଁ। ଏଠାରେ ତୁରନ୍ତ ଅତ୍ୟାଧୁନିକ ଟ୍ରାଫିକ୍ ବ୍ୟବସ୍ଥା କରିବାକୁ ବାରମ୍ବାର ସ୍ଥାନୀୟ ଜନସାଧାରଣଙ୍କ ପକ୍ଷରୁ ଦାବି ହୋଇଆସୁଛି। ତେଣୁ ଜାତୀୟ ରାଜପଥ କର୍ତ୍ତୃପକ୍ଷ ଏବଂ ଜିଲା ପ୍ରଶାସନ ଏଦିଗରେ ପଦକ୍ଷେପ ନେଇ ସମସ୍ୟା ସମାଧାନ କରିବାକୁ କୋରେଇ ସଂଗ୍ରାମ ସମିତି ଦାବି କରିଛି। ଶୀଘ୍ର ସମସ୍ୟାର ସମାଧାନ କରା ନ ଗଲେ ସମିତି ଆନ୍ଦୋଳନକୁ ଓହ୍ଲାଇବ ବୋଲି ସଭାପତି ବିଦ୍ୟାଧର ମହାନ୍ତି ଚେତାବନୀ ଦେଇଛନ୍ତି।
