ଦାରିଙ୍ଗବାଡି, ୨୦।୪ (ଅରୁଣ ସାହୁ):ଏବେ ଗ୍ରୀଷ୍ମ ପ୍ରବାହ ଜାରି ରହିଛି। ଗରମ ଗୁଳଗୁଳି ବୃଦ୍ଧି ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ଏହି ସମୟରେ ଜଙ୍ଗଲରେ ନିଆଁ ଲାଗିବାରୁ ଗରମ ଗୁଳଗୁଳି ବୃଦ୍ଧି ସହ ପରିବେଶ ନଷ୍ଟ ହେବାରେ ବସିଛି। ଜଙ୍ଗଲରେ ନିଆଁ ଲାଗିବା ସମୟରେ ବନ କର୍ମଚାରୀ ପହଞ୍ଚୁ ନ ଥିବା ଓ ନିଆଁ ଲିଭାଇବାରେ ସହଯୋଗ କରୁ ନ ଥିବା ଅଭିଯୋଗ ହେଉଛି। ଏହି ଅଭିଯୋଗ ଦାରିଙ୍ଗବାଡି ଅଗ୍ନିଶମ ବିଭାଗର ଅଧିକାରୀ ଧବଳେଶ୍ୱର ପ୍ରଧାନ କହିଛନ୍ତି।
ପ୍ରକାଶ ଯେ, ସୋମବାର ସନ୍ଧ୍ୟାରେ ଦାରିଙ୍ଗବାଡି ବନାଞ୍ଚଳ କାର୍ଯ୍ୟାଳୟ ନିକଟ ପାଇନ ବଣରେ ନିଆଁ ଲାଗିଥିଲା। ନିଆଁ ଏତେ ଜୋରରେ ଲାଗିଥିଲା ଯେ, ୫୯ ନଂ ଜାତୀୟ ରାଜପଥ ଉପରେ ଯାତାୟାତ କରୁଥିବା ଯାତ୍ରୀ ବନ ବିଭାଗକୁ ଖବର ଦେଇଥିଲେ। ହେଲେ ବନ କର୍ମଚାରୀ କିମ୍ବା ଅଧିକାରୀ କେହି ଘଟଣାସ୍ଥଳରେ ପହଞ୍ଚି ନ ଥିଲେ। ଖବର ପାଇ ଦାରିଙ୍ଗବାଡି ଅଗ୍ନିଶମ ବିଭାଗର ଅଧିକାରୀ ଧବଳେଶ୍ୱର ପ୍ରଧାନଙ୍କ ନେତୃତ୍ୱରେ ଅଗ୍ନିବୀରମାନେ ପହଞ୍ଚି ପାହାଡ଼ ଉପରେ ଲାଗିଥିବା ପାଇନ ବଣର ନିଆଁକୁ ଆୟତ୍ତ କରିବାକୁ ପ୍ରୟାସ ଜାରି ରଖିଛନ୍ତି।
ଦୀର୍ଘ ୨ ଘଣ୍ଟାରୁ ଉର୍ଦ୍ଧ ସମୟ ନିଆଁ ଲିଭାଇବାକୁ ଉଦ୍ୟମ କରିବା ପରେ ବନ ବିଭାଗ। କିଛି ଅସ୍ଥାୟୀ କର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ। ଏଥିରେ ତାଙ୍କ ଦାୟିତ୍ୱ ସଠିକ ଭାବରେ କରୁ ନ ଥିବା ଓ ଜଙ୍ଗଲରେ ନିଆଁ ଲାଗିଲେ ବନ କର୍ମଚାରୀ କିମ୍ବା ଅଧିକାରୀ ପହଞ୍ଚୁ ନ ଥିବା ନେଇ ଅଗ୍ନିଶମ ଅଧିକାରୀ ଅସନ୍ତୋଷ ବ୍ୟକ୍ତ କରିଥିଲେ। ପ୍ରତ୍ୟେକ ବର୍ଷ ଗ୍ରୀଷ୍ମ ପ୍ରବାହ ପୁର୍ବରୁ ଜଙ୍ଗଲ ନିଆଁ ଦାଉରୁ ଜଙ୍ଗଲକୁ ସୁରକ୍ଷା ଦେବା ପାଇ ଜଙ୍ଗଲ ବିଭାଗ ପଦକ୍ଷେପ ନେବା ବଦଳରେ ଚଳିତ ବର୍ଷ ପାଇନ ବଣ ସମେତ ଚଳିତ ସପ୍ତାହରେ ଉକ୍ତ ବନାଞ୍ଚଳର ତିଲୋରୀ ଓ ଅନ୍ୟ ଜଙ୍ଗଲରେ ନିଆଁ ଲିଭାଇବାକୁ ଅଗ୍ନିଶମ ବିଭାଗ ହିଁ ପ୍ରଥମେ ପହଞ୍ଚି ନିଆଁକୁ ଆୟତ୍ତ କରୁଥିବା ଓ ଏହି ଦାୟିତ୍ୱ ବନ ବିଭାଗର ହୋଇଥିବାବେଳେ ଅଗ୍ନିଶମ ବିଭାଗ ଜଙ୍ଗଲରେ ନିଆଁ ଲିଭାଉଥିବା ଅଗ୍ନିଶମ ଅଧିକାରୀ କହିଛନ୍ତି।
ଏନେଇ ବନାଞ୍ଚଳ ଅଧିକାରୀ ମାଧବ ଚନ୍ଦ୍ର ବେହେରାଙ୍କ ସହ ଯୋଗାଯୋଗ କରାଯିବାରୁ ସେ କୌଣସି ଉତ୍ତର ଦେଇ ନ ଥିଲେ। ବନପାଳ ବିଶ୍ୱଜିତ ମିଶ୍ର ପ୍ରତିକ୍ରିୟାରେ କହିଛନ୍ତି, ସେ ସିଆଙ୍ଗବାଲି ପଞ୍ଚାୟତ ସୀତାପାଙ୍ଗା ଜଙ୍ଗଲକୁ ନିଆଁ ଲିଭାଇବାକୁ ଯାଇଥିବା କହିଛନ୍ତି। ଏନେଇ ବାଲିଗୁଡା ଡିଏଫଓ ଘନଶ୍ୟାମ ମହନ୍ତଙ୍କ ସହ ଯୋଗାଯୋଗ କରାଯିବାରୁ ସେ ଘଟଣାର ତଦନ୍ତ କରିବେ ବୋଲି କହିଛନ୍ତି ଏବଂ ଘଟଣାସ୍ଥଳକୁ ବନ କର୍ମଚାରୀ ଓ ଅଧିକାରୀଙ୍କୁ ପଠାଇବୁ ବୋଲି କହିଛନ୍ତି।
Dharitri – Odisha’s No.1 Odia Daily
