କେନ୍ଦ୍ରାପଡ଼ା ଅଫିସ, ୧୪ା୧୨: ଦେହ ମନ କଷ୍ଟ ହେଲେ ଆଖିରୁ ଲୁହ ଝରିପଡେ। ଏହି ଲୁହକୁ ହାତରେ ପୋଛିଲା ସମୟରେ ଅନୁଭବ ହୁଏ। ମାତ୍ର ଏହାକୁ ଦେଖି ହୁଏନା। ଯେତେବେଳେ ବଡ ସାର ଆଶ୍ରମକୁ ଆସନ୍ତି, ସେହି ସମୟରେ ପାଠ ପଢ଼ି ବଡ ସାର ହେବାକୁ ଇଚ୍ଛା ହୁଏ। ମାତ୍ର ଦୃଷ୍ଟିଶକ୍ତି ନ ଥିବାରୁ ସାଧାରଣ ପିଲାଙ୍କ ପରି ଭାରି ମନକଷ୍ଟ ହୁଏ। ଆଖପାଖରେ କେହି ନ ଥିବା ବେଳେ ଖୁବ କାନ୍ଦେ। ଭଗବାନଙ୍କୁ ପ୍ରାର୍ଥନା ସମୟରେ ମୋର ଏହି ଦୁର୍ଦ୍ଦଶା କାହିଁକି ବୋଲି ପ୍ରଶ୍ନ ପଚାରେ। ସେହି ଭଗବାନ ମୋର ଦୁଃଖ ଶୁଣିଛନ୍ତି। ଆଖି ଅପରେଶନ ପରେ ବହୁତ କିଛି ଦେଖୁଛି। ଏବେ ବ୍ରେଲ୍ ଅକ୍ଷରରେ ପଢ଼ିବା ଆବଶ୍ୟକ ନାହିଁ ବୋଲି ଭାବୁଛି। ବ୍ରେଲି ବଦଳରେ ଅଙ୍ଗୁଳି ଏବେ କମ୍ପ୍ୟୁଟର ଚଳାଇବ ଜାଣି ଖୁବ୍ ଖୁସି ଲାଗୁଛି। କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକ ଦରବଚ୍ଛାସ୍ଥିତ ଆରତୀ ଦେବୀ ଦୃଷ୍ଟିହୀନ ଆବାସିକ ବିଦ୍ୟାଳୟର ଅନ୍ତେବାସୀ ୧୦ ବର୍ଷୀୟ ଶଙ୍କର ଦାସଙ୍କ ଏହି ବୟାନ ତାଙ୍କ ପାଇଁ ଏକ ନୂଆ ପୃଥିବୀ ସୃଷ୍ଟି କରିଛି। ଅଗଷ୍ଟ ୧୦ ରେ ରାଜ୍ୟପାଳ ପ୍ରଫେସର ଗଣେଶୀ ଲାଲ କେନ୍ଦ୍ରାପଡ଼ା ଜିଲା ଗସ୍ତ କରିଥିଲେ। ଏହି ଅବସରରେ କେନ୍ଦ୍ରାପଡ଼ା ପୌର ସଂସ୍ଥା ଦୃଷ୍ଟିହୀନ ବିଦ୍ୟାଳୟକୁ ପରିଦର୍ଶନ କରିଥିଲେ। ପରୀକ୍ଷା ପରେ ଚକ୍ଷୁରେ ଜ୍ୟୋତି ଫେରିବା ନେଇ ଜିଲା ସାମାଜିକ ସୁରକ୍ଷା ଅଧିକାରୀ ପ୍ରଭାସ ଚନ୍ଦ୍ର ଦାସଙ୍କ ସହ ଆଲୋଚନା କରିଥିଲେ। ଏଥିସହ ଅନ୍ତେବାସୀ ଦୃଷ୍ଟିବାଧିତ ଛାତ୍ରୀଛାତ୍ରଙ୍କ ପରୀକ୍ଷା ପାଇଁ ନିର୍ଦ୍ଦେଶ ଦେଇଥିଲେ। ଏହିକ୍ରମରେ ମୋଟ ୩୯ ଦୃଷ୍ଟିହୀନ ଛାତ୍ରୀଛାତ୍ରଙ୍କ ପରୀକ୍ଷା ହୋଇଥିବା ବେଳେ ପ୍ରଥମ ପର୍ଯ୍ୟାୟରେ ୨ ଛାତ୍ରଙ୍କ ଆଖିର ଜ୍ୟୋତି ଫେରି ଆସିଛି।
ଏ ସମ୍ପର୍କରେ ଆରତୀ ଦେବୀ ବିଦ୍ୟାଳୟ ଅଧ୍ୟକ୍ଷ ପବିତ୍ର ମୋହନ ଦାସ କହିଛନ୍ତି, ଶଙ୍କରଙ୍କ ଚକ୍ଷୁ ଅପରେଶନ ପରେ ମଙ୍ଗଳବାର ଏଠାକୁ ଆସିଛନ୍ତି। ଚିକିତ୍ସାଧୀନ ଥିବାରୁ ସାମୟିକ ବିଶ୍ରାମ ନେଉଛନ୍ତି। ତେବେ ପାଠ ପଢ଼ିବା ଉତ୍ସାହ ବଢ଼ିଯାଇଛି। ଗତ ୧୮ ଘଣ୍ଟା ମଧ୍ୟରେ ନୂଆ ଦୁନିଆର ରୂପରେଖ ଦେଖି ତତ୍ତ୍ୱାବଧାରକଙ୍କୁ ବହୁ ପ୍ରଶ୍ନ ପଚାରୁଛନ୍ତି। ସେହିପରି ପୌରସଂସ୍ଥା ଦୃଷ୍ଟିହୀନ ବିଦ୍ୟାଳୟର ଛାତ୍ର ରାଜେଶ ମଲ୍ଲିକ ଚକ୍ଷୁ ଅପରେଶନ ପରେ ନିଜ ଘର ଡେରାବିଶ ବ୍ଲକ କୁରୁଜଙ୍ଗା ପଞ୍ଚାୟତ ନୂଆଗଁାରେ ଅଛନ୍ତି। ଅପରେଶନ ଓ ଭବିଷ୍ୟତ କାର୍ଯ୍ୟକ୍ରମକୁ ନେଇ ସେ କୁହନ୍ତି, ଆସନ୍ତା ମାସରେ ସେ ପୁରୀ ଯାଇ ଜଗନ୍ନାଥଙ୍କୁ ଦର୍ଶନ କରିବେ। ଜନ୍ମରୁ ପ୍ରାୟ ୬ ବର୍ଷ ଯାଏ ଆଦୌ ଦେଖାଯାଉ ନ ଥିଲା। ଏହାପରେ ଚକ୍ଷୁ ଅପରେଶନ ହୋଇଥିଲା। ମାତ୍ର ସଫଳ ହୋଇ ନ ଥିଲା। ସାମାନ୍ୟ ପରିମାଣରେ ଦେଖା ଯାଉଥିବାରୁ ପରିବାର ସଦସ୍ୟ ଓ ସାଙ୍ଗସାଥୀଙ୍କ ସହଯୋଗ ନେଇ ଜୀବନଯାପନ କରୁଥିଲି। ତେବେ ଆଶ୍ରମ ସ୍କୁଲକୁ ରାଜ୍ୟପାଳ ଆସି ଜୀବନପଥକୁ ସିଧା ଚାଲିବା ପାଇଁ ବାଟ ଦେଖାଇଛନ୍ତି। ଏହାସହ ଜିଲା ପ୍ରଶାସନ ଓ ଆଶ୍ରମ ସ୍କୁଲର ଶିକ୍ଷକଙ୍କ ଉଦ୍ୟମ ପାଇଁ ଆମକୁ ନୂଆ କରି ବଞ୍ଚତ୍ବାର ବାଟ ଦେଖାଇଛି। ଏଥିସହ ସେ କ୍ଷୋଭ ପ୍ରକାଶ କରିଛନ୍ତି, ୧୪ବର୍ଷ ହୋଇଥିଲେ ମଧ୍ୟ ଏବେ ଚତୁର୍ଥ ଶ୍ରେଣୀରେ ପଢ଼ୁଛନ୍ତି। ସାଙ୍ଗମାନେ ବହୁ ଅଧିକ ପାଠ ପଢ଼ିଲେଣି। ଏ ସମ୍ପର୍କରେ ରାଜେଶଙ୍କ ବାପା ଲକ୍ଷ୍ମଣ କୁହନ୍ତି, ଦିନ ମଜୁରିରେ ଘର ଚଳେ। ବୋଉଙ୍କର ଆଖି ଦୋଷ ଅଛି। ଏହାପରେ ଭାଇ ଓ ନିଜର ଆଖିକୁ ଅଳ୍ପ ଦେଖାଯାଉଛି। ଏହି ପରିସ୍ଥିତିରେ ପୁଅ ରାଜେଶର ଦୃଷ୍ଟିଶକ୍ତି ନ ଥିବା ଜାଣି ପରିବାର ଓ ପଡୋଶୀଙ୍କ ମନରେ ଦୁଃଖ ହୋଇଥିଲା। ଏବେ ଅପରେଶନ ପରେ ରାଜେଶଙ୍କ ଆଖିକୁ ଦେଖା ଯାଉଥିବା ଜାଣି ଖୁବ୍ ଖୁସି ଲାଗୁଛି। ଜିଲା ସାମାଜିକ ସୁରକ୍ଷା ଅଧିକାରୀ ଦାସ କହିଛନ୍ତି, ରାଜ୍ୟପାଳଙ୍କ ଏହି ଗସ୍ତ ରାଜ୍ୟର କେତେକ ଦୃଷ୍ଟିହୀନ ଛାତ୍ରୀଛାତ୍ରଙ୍କ ପାଇଁ ଆଶୀର୍ବାଦ ହୋଇଛି। ରାଜ୍ୟପାଳ ପ୍ରଫେସର ଲାଲଙ୍କ ନିର୍ଦ୍ଦେଶକ୍ରମେ ଜିଲାର ମୋଟ ୩୯ ଜଣ ଶିକ୍ଷାର୍ଥୀଙ୍କ ଚକ୍ଷୁ ପରୀକ୍ଷା ହୋଇଥିଲା। ସେମାନଙ୍କ ମଧ୍ୟରୁ ୪ ଜଣଙ୍କର ଆଖି ଅପରେଶନ ପରେ ସମ୍ଭାବନା ଥିବା ଜଣାପଡିଛି। ପ୍ରଥମ ପର୍ଯ୍ୟାୟରେ ୨ ଜଣଙ୍କର ଅପରେଶନ ହୋଇଛି। ଏଥିସହ କେତେଜଣ ଦୃଷ୍ଟିବାଧିତ ଶିକ୍ଷାର୍ଥୀଙ୍କୁ ପଢ଼ିବା ପାଇଁ ଅତ୍ୟାଧୁନିକ ଯନ୍ତ୍ର ଜିଲା ପ୍ରଶାସନ ମାଧ୍ୟମରେ ବଣ୍ଟନ ବ୍ୟବସ୍ଥା କରିଛନ୍ତି।
