କେର୍ନସ (ଅଷ୍ଟ୍ରେଲିଆ), ୧୧ା୯(ଏପି): ରବିବାର ନ୍ୟୁଜିଲାଣ୍ଡ ବିପକ୍ଷ ତୃତୀୟ ତଥା ଅନ୍ତିମ ଅନ୍ତର୍ଜାତୀୟ ଦିନିକିଆ ମ୍ୟାଚ ପରେ ଅଷ୍ଟ୍ରେଲିଆ ଅଧିନାୟକ ଆରୋନ୍ ପିଞ୍ଚ୍ ଅନ୍ତର୍ଜାତୀୟ ଦିନିକିଆ କ୍ରିକେଟରୁ ଅବସର ନେବେ। ୩୫ ବର୍ଷୀୟ ଫିଞ୍ଚ୍ କିଛି ଦିନ ହେଲା ଭଲ ଫର୍ମରେ ନାହାନ୍ତି। ବର୍ତ୍ତମାନ ତାଙ୍କ ଆଭରେଜ ୩.୭ ରହିଛି। ଜୁନ୍ରେ ଶ୍ରୀଲଙ୍କା ବିପକ୍ଷ ଏକ ଅନ୍ତର୍ଜାତୀୟ ଦିନିକିଆରେ ୬୨ ରନ ସ୍କୋର କରିବା ପରଠାରୁ ସେ ୬୨ ରନ କରିଛନ୍ତି। ସେ ୩ଥର ବିନା କୌଣସି ରନରେ ଆଉଟ ହୋଇଛନ୍ତି। ଏଣେ କ୍ରିକେଟ ଅଷ୍ଟ୍ରେଲିଆ ଶନିବାର କହିଛି ଫିଞ୍ଚ୍ ଅଷ୍ଟ୍ରେଲିଆ ଟି୨୦ ଦଳର ଅଧିନାୟକ ପଦ ବଜାୟ ରଖିବେ। ସେ ଅଷ୍ଟ୍ରେଲିଆରେ ଅକ୍ଟୋବର ଓ ନଭେମ୍ବରରେ ହେବାକୁଥିବା ଟି୨୦ ବିଶ୍ୱକପ୍ରେ ଅଷ୍ଟ୍ରେଲିଆ ଟି୨୦ ଦଳର ନେତୃତ୍ୱ ନେବେ। ଫିଞ୍ଚ୍ ଇତିମଧ୍ୟରେ ୧୪୫ ଅନ୍ତର୍ଜାତୀୟ ଦିନିକିଆ ଖେଳି ସାରିଛନ୍ତି। ତନ୍ମଧ୍ୟରୁ ୫୪ଟି ମ୍ୟାଚରେ ଅଧିନାୟକତ୍ୱ କରିଛନ୍ତି। ଫିଞ୍ଚ୍ଙ୍କୁ ଏକଦା ବିଶ୍ୱର ଅନ୍ୟତମ ଶ୍ରେଷ୍ଠ ବିଧ୍ୱଂସକାରୀ ଓପନିଂ ବ୍ୟାଟର ଭାବେ ବିବେଚନା କରାଯାଉଥିଲା। ଅନ୍ତର୍ଜାତୀୟ ଦିନିକିଆ ଫର୍ମାଟରେ ସେ ପାଖାପାଖି ୪୦ ଆଭରେଜରେ ୫,୪୦୧ ରନ ସଂଗ୍ରହ କରିଥିଲେ। ତନ୍ମଧ୍ୟରେ ତାଙ୍କର ୧୭ଟି ଶତକ ଅନ୍ତର୍ଭୁକ୍ତ। ଗତ ୭ଟି ଇନିଂସରେ ସେ ୨୦ ରନ ଅତିକ୍ରମ କରିବାରେ ସଫଳ ହୋଇପାରି ନାହାନ୍ତି। ତେଣୁ ଦଳରେ ସ୍ଥାନ ବଜାୟ ରଖିବା ନେଇ ସନ୍ଦେହ ସୃଷ୍ଟି ହୋଇଥିଲା। ଫିଞ୍ଚ୍ଙ୍କ ଏହି ନିଷ୍ପତ୍ତି ଫଳରେ ଅଷ୍ଟ୍ରେଲିଆ ଆସନ୍ତାବର୍ଷ ଭାରତରେ ହେବାକୁଥିବା ୫୦ଓଭର ବିଶ୍ୱକପ୍ ପୂର୍ବରୁ ଅଷ୍ଟ୍ରେଲିଆକୁ ଜଣେ ନୂଆ ଅଧିନାୟକ ବାଛିବାକୁ ପଡ଼ିବ।
