ବେଜିଂ,୭ା୯: କମଳା ଜୁସ୍ ସମଗ୍ର ବିଶ୍ୱରେ ସବୁଠାରୁ ଅଧିକ ପସନ୍ଦ କରାଯାଉଥିବା ପାନୀୟ ମଧ୍ୟରୁ ଅନ୍ୟତମ। କିନ୍ତୁ ଆଜିକାଲ ଏଥିରେ ରଙ୍ଗ ଏବଂ କେମିକାଲ ମିଶାଯାଉଥିବାରୁ ଏହାକୁ ନେଇ ଲୋକେ ଚିନ୍ତାରେ ପଡିଛନ୍ତି। ବାସ୍ତବରେ ଚାଇନା ରେଷ୍ଟୁରାଣ୍ଟର ଏକ ଭିଡିଓ ଭାଇରାଲ ହେବାରେ ଲାଗିଛି, ଯେଉଁଥିରେ ଜଣେ ଗ୍ରାହକ ରେଷ୍ଟୁରାଣ୍ଟ କର୍ମଚାରୀଙ୍କୁ ଜୁସ୍ରେ ମଇଳା ପାଣି ମିଶ୍ରଣ କରୁଥିବା ଦେଖିଥିଲେ। ଯେଉଁଠାରେ ଏହି ଅପମିଶ୍ରଣ କରାଯାଉଥିଲା, ସେହି ସ୍ଥାନ ରୋଷେଇ ଘର ପାଖରେ ଥିଲା ଏବଂ ସାଧାରଣତଃ ସେଠାରେ ମଇଳା ଜିନିଷ ଫିଙ୍ଗି ଦିଆଯାଇଥିଲା।
ଏକ ରିପୋର୍ଟ ଅନୁଯାୟୀ, ତାଇୟାନି ରେଷ୍ଟୁରାଣ୍ଟ ପୂର୍ବ ଚାଇନାର ଜେଜିଆଙ୍ଗ ପ୍ରଦେଶର ଓ୍ବେନ୍ଜୋ ଅଞ୍ଚଳରେ ଅବସ୍ଥିତ। ଜଣେ କର୍ମଚାରୀ ସିଙ୍କରେ ବାଲ୍ଟି ପରି ପାତ୍ରରେ ଟ୍ୟାପ ପାଣି ଢାଳୁଥିବା ଦେଖିବାକୁ ମିଳିଛି। ସେଠାରେ ସଫା କରିବା ଓ୍ବାଇପ୍ ରଖାଯାଇଥିଲା। ସମାନ ସିଙ୍କ୍ରେ ଏକ ପ୍ଲାଷ୍ଟିକ ବ୍ରମ ଏବଂ ଏକ ମଇଳା ଡଷ୍ଟବିନ ମଧ୍ୟ ଦେଖିବାକୁ ମିଳିଥିଲା। ଯେତେବେଳେ କର୍ମଚାରୀମାନେ ଅନୁଭବ କଲେ ସେମାନଙ୍କର ଭିଡିଓ କରାଯାଉଛି, ସେମାନେ ତୁରନ୍ତ କମଳା ଜୁସ୍ର ପାତ୍ରଟି ଅନ୍ୟ ସ୍ଲାବକୁ ସ୍ଥାନାନ୍ତର କରିଦେଲେ ଏବଂ ଗ୍ରାହକଙ୍କୁ ଭିଡିଓ ବନ୍ଦ କରିବାକୁ କହିଥିଲେ। ଏହା ପରେ ଗ୍ରାହକ ହୋ-ହଲ୍ଲା କରିଥିଲେ।
ଉକ୍ତ ରେଷ୍ଟୁରାଣ୍ଟ ଏହି ଘଟଣା ପାଇଁ କ୍ଷମା ମାଗିଛି। ମନିଟରିଂ ଅଭାବରୁ ଏହି ଘଟଣା ଘଟିଛି ବୋଲି କହିଛନ୍ତି। କର୍ମଚାରୀଙ୍କୁ ନିଲମ୍ବିତ କରାଯାଇଛି ଏବଂ ରେଷ୍ଟୁରାଣ୍ଟର ମ୍ୟାନେଜରଙ୍କୁ ମଧ୍ୟ ହଟାଇ ଦିଆଯାଇଛି। ତେବେ ଲୋକମାନେ ଏହାକୁ ଘୃଣ୍ୟ ବୋଲି କହିଥିଲେ। ଜଣେ ୟୁଜର କହିଛନ୍ତି, ରେଷ୍ଟୁରାଣ୍ଟରେ ଏହା କିପରି ହୋଇପାରେ। ସେଠାରେ କୌଣସି ସିସିଟିଭି କ୍ୟାମେରା ନ ଥିଲା କି? ଅନ୍ୟ ଜଣେ କହିଛନ୍ତି, ଖର୍ଚ୍ଚ ହ୍ରାସ କରିବା ପାଇଁ ଏଭଳି ପଦକ୍ଷେପ ଆଶ୍ଚର୍ଯ୍ୟଜନକ।
