ଡେରାବିଶ, ୪ା୮(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକ ଇନ୍ଦାଳୋ ପଞ୍ଚାୟତ ଅଢ଼ଙ୍ଗା ଗାଁର ଜଣେ ବ୍ୟକ୍ତି ବାସଗୃହ ଯୋଜନାରେ ମିଳିଥିବା ଗୃହଟି ୫ବର୍ଷ ତଳେ ସମ୍ପୂର୍ଣ୍ଣ କରିଥିଲେ। ହେଲେ ନିର୍ମାଣ କରିଥିବା ଗୃହର ଫାଇନାଲ ବିଲ୍ ପାଇବାକୁ ପଞ୍ଚାୟତ ସରପଞ୍ଚଙ୍କଠାରୁ ଆରମ୍ଭ କରି ବ୍ଲକ ଓ ଜିଲା ପ୍ରଶାସନ ଯାଏ ଦଉଡ଼ି ଦଉଡ଼ି ନୟାନ୍ତ ହୋଇଥିଲେ ହେଁ ହିତାଧିକାରୀ ତାଙ୍କ ଖର୍ଚ୍ଚ ଟଙ୍କା ପାଉନାହାନ୍ତି। ହିତାଧିକାରୀ ଜଣକ ହେଲେ ଅଢ଼ଙ୍ଗା ଗାଁର ସଞ୍ଜୟ କୁମାର ଲେଙ୍କା। ପିତା ଭୂମିହୀନ ଥିବାରୁ ଅଢ଼ଙ୍ଗା ଗଁାରେ ୪ ଡିସିମିଲ୍ ଘରଡିହ ଜମି ସରକାରଙ୍କ ପକ୍ଷରୁ ଯୋଗାଇ ଦିଆଯାଇଥିଲା। ସେତେବେଳେ ଇନ୍ଦିରା ଆବାସ ଯୋଜନାରେ ପକ୍କାଘର କରିଥିଲେ। ଏବେ ସେଥିରେ ସଞ୍ଜୟଙ୍କ ବଡ଼ଭାଇ ରହୁଛନ୍ତି। ବଡ଼ଭାଇଙ୍କଠାରୁ ପୃଥକ୍ ବାସ କରୁଥିବା ସଞ୍ଜୟ ଅଲଗା ହୋଲ୍ଡିଂ ନମ୍ବରରେ ଏକ ବିଜୁ ପକ୍କାଘର ପାଇବାକୁ ଯୋଗ୍ୟ ହୋଇ ୨୦୧୭ ମାର୍ଚ୍ଚ ୨୫ରେ ଗୃହ ନିର୍ମାଣ ନିମନ୍ତେ କାର୍ଯ୍ୟାଦେଶ ପାଇଥିଲେ। ଏହି ନିର୍ମାଣ କାର୍ଯ୍ୟ ୪ ମାସ ମଧ୍ୟରେ ସମ୍ପୂର୍ଣ୍ଣ କଲେ ସରକାରଙ୍କ ଘୋଷଣା ଅନୁଯାୟୀ, ପୁରସ୍କାର ପାଇବା ଆଶାରେ ସଞ୍ଜୟ ଧାର କରଜ କରି ଗୃହ କାର୍ଯ୍ୟ ଶେଷ କରିଥିଲେ। ନିୟମ ଅନୁଯାୟୀ, ୩ଟି କିସ୍ତିରେ ୯୦ହଜାର ଟଙ୍କା ଚେକ୍ ମାଧ୍ୟମରେ ସେ ପାଇଥିଲେ। ୪ର୍ଥ ତଥା ଶେଷ କିସ୍ତି ଛାତ ପଡ଼ି କବାଟ ଝରକା ଲଗାଇ ବାସୋପଯୋଗୀ କରିବା ପରେ ମିଳିବାର ନିୟମ ଥିଲା। ସଞ୍ଜୟ ସେସବୁ ସାରିଲା ପରେ ବି ଦୀର୍ଘ ୫ ବର୍ଷରୁ ଊର୍ଦ୍ଧ୍ୱ ସମୟ ବିତିଗଲାଣି। ଅଥଚ ବାକିଥିବା ୩୦ ହଜାର ଟଙ୍କା ସେ ଅଦ୍ୟାବଧି ପାଇନାହାନ୍ତି। ବିଭିନ୍ନ ସମୟରେ ବ୍ଲକ ଓ ଜିଲାପାଳଙ୍କ ଜନଶୁଣାଣି ଶିବିରରେ ଏ ସମ୍ପର୍କରେ ଅଭିଯୋଗ କରିଆସୁଛନ୍ତି। ହେଲେ କୌଣସି ସୁଫଳ ମିଳୁନାହିଁ। ଗତ ସୋମବାର ଇନ୍ଦାଳୋ ପଞ୍ଚାୟତରେ ହୋଇଥିବା ପଲ୍ଲୀରେ ପ୍ରଶାସନ କାର୍ଯ୍ୟକ୍ରମରେ ବିଡିଓ ନମିତା ବାରିକଙ୍କ ନିକଟରେ ୩ୟ ଥର ପାଇଁ ସେ ଅଭିଯୋଗ କରିଛନ୍ତି। ସଞ୍ଜୟ ଧାର କରଜ ଶୁଝି ନ ପାରି ମାନସିକ ସ୍ତରରେ ଭାଙ୍ଗି ପଡ଼ିଛନ୍ତି। ତାଙ୍କ ପ୍ରତି ସୁବିଚାର ନ ହେଲେ ପଞ୍ଚାୟତ ସମ୍ମୁଖରେ ଧାରଣା ଦେବେ ବୋଲି ପ୍ରକାଶ କରିଛନ୍ତି। ଏ ସମ୍ପର୍କରେ ବିଡିଓ ବାରିକଙ୍କୁ ପଚାରିବାରେ ସଞ୍ଜୟଙ୍କ ବାସଗୃହ ଯୋଜନାକୁ ନେଇ ନ୍ୟାୟାଳୟରେ ମାମଲା ଚାଲିଥିବାରୁ ତାଙ୍କର ଫାଇନାଲ ବିଲ୍ କରିବା ସମ୍ଭବପର ନୁହେଁ। ତେବେ ନ୍ୟାୟାଳୟର ବିଚାର ପରେ ଯାହା କିଛି ପଦକ୍ଷେପ ନିଆଯିବ ବୋଲି ସେ କହିଛନ୍ତି।
