ନୂଆଦିଲ୍ଲୀ,୧୩ା୩ (ପି.ଟି.)-ଭାରତ ଏହାର ଅବଶିଷ୍ଟ ୩ଟି ଫିଫା ବିଶ୍ୱକପ୍ ଯୋଗ୍ୟତା ପର୍ଯ୍ୟାୟ ମ୍ୟାଚ କାତାରରେ ଖେଳିବ। କରୋନା ଭାଇରସ୍ଜନିତ ଗସ୍ତ ଓ କ୍ୱାରାଣ୍ଟାଇନ୍ କଟକଣା ଯୋଗୁ ଏସିଆନ ଫୁଟ୍ବଲ କନ୍ଫେଡେରେଶନ (ଏଏଫ୍ସି) ମ୍ୟାଚଗୁଡ଼ିକ ନିର୍ଦ୍ଦିଷ୍ଟ ଭେନ୍ୟୁରେ ଆୟୋଜନ କରିବା ଲାଗି ନିଷ୍ପତ୍ତି ନେଇଛି। ମୂଳ କାର୍ଯ୍ୟସୂଚୀ ଅନୁସାରେ କାତାର ବିପକ୍ଷରେ ଭାରତୀୟ ଦଳ ନିଜ ଦେଶରେ, ବାଂଲାଦେଶ ବିପକ୍ଷରେ ଦେଶ ବାହାରେ ଏବଂ ଆଫଗାନିସ୍ତାନ ବିପକ୍ଷରେ ନିଜ ଦେଶରେ ଖେଳିଥାନ୍ତା। ମାତ୍ର ବିଶ୍ୱରେ କରୋନାଜନିତ ସମସ୍ୟା ଯୋଗୁ କାର୍ଯ୍ୟସୂଚୀରେ ବ୍ୟାପକ ପରିବର୍ତ୍ତନ କରାଯାଇଛି। ଫିଫା ବିଶ୍ୱକପ୍ ୨୦୨୧ ଆୟୋଜକ କାତାର ଗ୍ରୁପ୍ ଇ’ ପ୍ରତିପକ୍ଷ ଓମାନ, ଆଫଗାନିସ୍ତାନ, ଭାରତ ଏବଂ ଜାପାନ ସହ ବାଂଲାଦେଶ ବିପକ୍ଷ ମ୍ୟାଚ ଆୟୋଜନ କରିବ। ଏହାଛଡ଼ା କିରଗିଜ ରିପବ୍ଲିକ, ତାଜିକସ୍ତାନ, ମ୍ୟାନ୍ମାର ଓ ମଙ୍ଗୋଲିଆକୁ ନେଇ ଗ୍ରୁପ୍ ଏଫ୍’ର ମ୍ୟାଚଗୁଡ଼ିକ ମଧ୍ୟ ଆୟୋଜନ କରିବ ବୋଲି ଶୁକ୍ରବାର ଏଏଫ୍ସି ପକ୍ଷରୁ ଏକ ପ୍ରେସ୍ ଇସ୍ତାହାରରେ ପ୍ରକାଶ ପାଇଛି। ଫିଫା ବିଶ୍ୱକପ୍ କାତାର ୨୦୨୨ ଏବଂ ଏଏଫ୍ସି ଏସିଆନ କପ୍ ଚାଇନା ୨୦୨୩ ପାଇଁ ଏସିଆନ କ୍ୱାଲିଫାୟର୍ସ ମ୍ୟାଚଗୁଡ଼ିକ ଚଳିତବର୍ଷ ମେ’ ୩୧ରୁ ଜୁନ୍ ୧୫ ପର୍ଯ୍ୟନ୍ତ ଅନୁଷ୍ଠିତ ହେବ।
