ଆବୁଧାବି,୧୩।୩: ସ୍ଥାନୀୟ ଶେଖ ଜାଏଦ ଷ୍ଟାଡିୟମରେ ଚାଲିଥିବା ଆଫଗାନିସ୍ତାନ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଜିମ୍ବାଓ୍ବେ ଫଲୋଅନ ହୋଇଛି। ଟସ୍ ଜିତି ଆଫଗାନିସ୍ତାନ ପ୍ରଥମ ଇନିଂସରେ ହାଶମାତୁଲ୍ଲା ଶାହିଦିଙ୍କ ୨୦୦ ରନର ଅପରାଜିତ ଦ୍ୱିଶତକୀୟ ପାଳି ବଳରେ ୧୬୦.୪ ଓଭରରେ ୪ ଉଇକେଟ ହରାଇ ୫୪୫ ରନ କରି ଇନିଂସ ଘୋଷଣା କରିଥିଲା। ଜବାବରେ ଜିମ୍ବାଓ୍ବ ପ୍ରଥମେ ଇନିଂସ ଆରମ୍ଭ କରି ୯୧.୩ ଓଭରରେ ୨୮୭ ରନକରି ଅଲଆଉଟ ହୋଇଥିଲା। ଫଳରେ ଜିମ୍ବାଓ୍ବେ ପ୍ରଥମ ଇନିଂସ ଭିତ୍ତିରେ ୨୫୮ ରନ ପଛରେ ପଡି ଫଲୋଅନ ହୋଇଛି। ଫଲୋଅନ ହେବା ପରେ ଦ୍ୱିତୀୟ ଇିନିଂସ ଆରମ୍ଭ କରି ଜିମ୍ବାଓ୍ବେ ଶୁକ୍ରବାର ତୃତୀୟ ଦିବସ ଖେଳ ଶେଷ ସୁଦ୍ଧା ୧୩ ଓଭରରେ କୌଣସି ଉଇକେଟ ନ ହରାଇ ୨୪ ରନ ସଂଗ୍ରହ କରିଛି। ଏବେ ୧୦ ଉଇକେଟ ହାତରେ ରଖି ଜିମ୍ବାଓ୍ବେ ୨୩୪ ରନ ପଛରେ ପଡିଛି। ଷ୍ଟମ୍ପ ଅପସାରଣ ବେଳକୁ ପ୍ରିନ୍ସ ମାସଭାଉର ୩ ଓ କେଭିନ କାସୁଜା ୨୦ ରନ କରି ଅପରାଜିତ ରହିଛନ୍ତି।
ଅସମାପ୍ତ ପ୍ରଥମ ଇନିଂସ ସ୍କୋର ୫୦/୦ରୁ ଖେଳ ଆରମ୍ଭ କରି ଜମ୍ବାଓ୍ବେ ଶୁକ୍ରବାର ଅଲଆଉଟ ହୋଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ମାସଭାଉର ୨୯ରୁ ଖେଳ ଆରମ୍ଭ କରି ୬୫ ରନକରି ଆଉଟ ହୋଇଥିଲେ। ସେହିପରି କାସୁଜା ୧୪ ରନରୁ ଖେଳ ଆରମ୍ଭ କରି ୪୧ ରନ କରି ପ୍ୟାଭିଲିୟନ ଫେରିଥିଲେ। ଅନ୍ୟମାନଙ୍କ ମଧ୍ୟରେ ତାରିସାହି ମୁସାକାଣ୍ଡା ୪୧, ସିକନ୍ଦର ରାଜା ସର୍ବାଧିକ ୮୫, ଉଇକେଟକିପର ବ୍ୟାଟ୍ସମ୍ୟାନ ରେଗିସ ଚକଭା ୩୩ ରନକରି ଆଉଟ ହୋଇଥିବାବେଳେ ଅନ୍ୟମାନେ ଦୁଇଅଙ୍କ ଛୁଇଁ ପାରି ନ ଥିଲେ। ବୋଲିଂରେ ଆଫଗାନିସ୍ତାନ ତରଫରୁ ରସିଦ୍ ଖାଁ ସର୍ବାଧିକ ୪, ଅମୀର ହାମଜା ୩ ଓ ସୟେଦ ଶିର୍ଜାଦ ୨ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଆଫଗାନିସ୍ତାନ ପ୍ରଥମ ଇନିଂସ: ୧୬୦.୪ ଓଭରରେ ୫୪୫/୪ (ଇନିଂସ ଘୋଷଣା)।
ଜିମ୍ବାଓ୍ବେ ପ୍ରଥମ ଇନିଂସ: ୯୧.୩ ଓଭରରେ ୨୮୭
(ରାଜା- ୮୫, ମାସଭାଉର- ୬୫, କାସୁଜା- ୪୧, ମୁସାକାଣ୍ଡା- ୪୧, ଚକଭା- ୩୩, ରସିଦ- ୪/୧୩୮, ହମଜା- ୩/ ୭୩, ଶିରଜାଦ- ୨/୪୮)।
ଜିମ୍ବାଓ୍ବେ ଦ୍ୱିତୀୟ ଇନିଂସ: ୧୩ ଓଭରରେ ୨୪/୦
